2 SAMUELI 12 - Biblía Axweesantá Hhohho' ar Mungú 2004

Ya/abtór Natani nee hhu'uu'úngw Daudi

¹ Naagáy AAKOÓ MUNGÚ aarusmo Natani guri ya/aáw amór Daudi. Natani iri daqáy amór Daudi, guri báy, «Hhawaate kaariya' tsár i dayá' awa baraá gixsarka wák, oo wák a daqarmo nee oo hatlá' a narkutmo.

² Daqarmoodá' bee/ángw yaariír gu kón nee hikwaá yaariire.

³ Ala heedaáduú narkutmo daremirós tookar bee/i ga kón, ar aa tlaáxw. Gari amohhe'eemiís, inós iri ureér dír do'ós wa ale dinkwa nee na/iiwós. Deelmoowuú bee/i guri /aymiís ar muruú /aymarós, tam slooqoó ira wahaán a kós, inós gan gawaá da/ewawósí ohaahín. Heewuú narkutmoowo deelmowuú bee/i a adór dasiirós.

⁴ Baalarka wake dahaaymoó heedaáduú daqarmo nina xáy. Naagáy daqarmoowí deelmoowós oo bee/i, laqaá sleerós, ngiwa gaasi as muruú /aymár dahaymoowós gaa slaiiká. Ala ina tláy, deelmooduú bee/i oo narkutmoodá' nguna hayóh, guri gaás as dahaymoowós.»

⁵ Daudi kaangwí nguwa axaás, ina daa/atúy buhhtaawo as daqaramoodá'. Iri oo dír aarusmo Natani, «Aníng lo'o a /aáy dír AAKOÓ MUNGUÚDÁ' daadawa, heé adoosíng gaa tleehh, gár kuwa hariím a gaasa.

⁶ Gár kuwa hariím aqo deelmoosuú bee/i oo narkutmo gun buu' sagaáwa tsiyáhh. Asma gár aa tleéhh ka tlaakw nee a heé gurtleemu wásl.»

⁷ Natani Daudi guri báy, «Heé tlehhmuuwí an kuúng! Hám daxta AAKOÓ MUNGÚ, Munguú múk Israeli i kaahi, ‹Aníng kuúng una iimbalaáx ar di/i as tawa waawutmo, uri tuú/ gawaá dabaá Saulowo.

⁸ Doó aakoowók nee tlaawaywose ngina dirógí haniís tawa kók, slám múk Israeli nee oo Yudawo nguna haniís kuwa sawaawuti'iin. Barnaxes adoorí ana hheerít, geera ngi doók sagaá wa tsár, laqaá adoosíng ba/a.

⁹ Aníng a AAKOÓ MUNGÚ, asma milá axweesante'eé' masa waaqá', tlakweemaá adór kuká' kari dír ilaaeé' wa tléhh? Uria heé xoorór Hiti kuri gás ar paánga, harerós kari tók tléhh, inós kuri hanís baraá dabaá múk Amoni as kuwa gaasi.

¹⁰ Gawaá adoorihe, as kuúng aníng iwa waaqá', nee harér Uria, heé xoorór Hiti, kari tók tléhh, dákw muu tsu/uta i hhooayká baraá múk do'oge.›

¹¹ Iia qaaseek, AAKOÓ MUNGÚ i kaahi, ‹Qaytsiít, kángw tlákw ngu tleéhh baraá múk do'óguú kilá'. Tlaawaywók unar tláw dír ilaawók wa ale, nee nguri dír inslaawmoowók haniís. Inós nee tlaawaywók tari fuquus dír ilaá múk wa alé.

¹² Kaangwí kuúng una tléhh baraá sufuú wa ale, ala aníng kaangwí un tleéhh tsee/aá wa ale dír ilaá múk Israeli sleémeero.› »

¹³ Naagáy Daudi Natani guri báy, «AAKOÓ MUNGÚ ugwa tlakweemií tleéhh.» Natani iri oó', «AAKOÓ MUNGÚ tlakweemaawók gaa gurtláy, kuúng a gwa'aká.

¹⁴ Tam adoorihe as tlehhmudá' alsi'ím taa tléhh, AAKOÓ MUNGÚ ugwa kángw kilá' wa waaqá', as adoorí na/aywók i gwaa'.»

¹⁵ Natani iri waátl amór do'ós. AAKOÓ MUNGÚ na/aydá' guri slaáhh, kudá' Bat-sheba harér Uria aa dír Daudi wa laqwál inós i slahhaa' tiqitiro.

Na/oó Daudi iwa kahhuút

¹⁶ Daudi Mungú guna firaarín as na/aay tsiní ngiwa slay. Iri gwaawín, ina dáh baraá kutuwirós, iri qaát yaamií ale iimír xweera ay iimi garwa /awakuúr.

¹⁷ Bariiseedá' gu ga/aw baraá kutuwirós i ale iri amoorós keér, guri harhheehhe'és niwa tlay. Ala inós iri sií', nee muruú /ayma gwa /ayiiká tumu niina dinkwa nee inooín.

¹⁸ Alaá deelo faanqw iwa waaráhh, na/aydá' iri gwaá'. Sagadiyuusér Daudi iri da'ayút gwa'arár na/aay ooaro. Tari oó', «Qoomár iwa deér inós un i axweemamisaán, ala ti iiárií qamaaminká. Hamí adór gwa'arár na/aywós kar ooaan? Ti hariiáyke?»

¹⁹ Daudi ngiwa ár sagadiyuuseerós iwa saasahhaan, gari tsaáhh adór na/aay ira gwaá'. Giri yaahaás, «Na/aay aa kahhuúti?» Inooín kuri mu/aywaáts, «Eeít! Aa kahhuút.»

²⁰ Naagáy Daudi adoorí ngiwa axaás, iri sihhiít yaamuú wa ale, iri hamtlín, tari sliík di/ito. Tlabaawós giri warqeés, iri tláy baraá Doó AAKOÓ MUNGÚ, guri sluufiís. Kár, nari kií/ amór do', muruú /ayma guri yaahaás, kuri sláy, inós iri /ayín.

²¹ Sagadiyuuserós guri yaahás, «Kaangwí a milá taa tléhh? Qoomár na/aay iwa slafi, kuúng ana gwaawiín nee una ale/aa/amamiín. Ala alaá iwa gwaá' tari sihhít muruú /ayma kuri /ák.»

²² Daudi giri báy, «Ar ló', qoomár na/aay iwa slafi, ana gwaawiím nee una ale/aa/amiím. Adoorí ana tleéhh asma ana oó', ‹Heé ga xuú'? Doóqa AAKOÓ MUNGÚ i gurtláy as na/aay iwa hunguu/i.›

²³ Ala hamí aa gwaá', gár nis gwaawiim a milá? Xáy, aníng ki/isár baraá yaamuwo u aleesláwa? Baalár wake aníng a tláw amoodá' aa káy, ala inós ki/imaá amor'eé' gi aleeslayká.»

Solomon kuwa laqwaál

²⁴ Daudi hareerós Bat-sheba gari gurkwa/amís. Iri amór hareerós káy, inós tsiihaay guri sleér, na/oó garma guri xwayluúr. Na/aydá' Daudi guri umií tsaát guri báy Solomon. AAKOÓ MUNGÚ na/aywí guri slaá'.

²⁵ Inós Natani guri ya/aáw amór Daudi, as umuú na/aywí nguwa bay Yedidia as AAKOÓ MUNGÚ.

Daudi gixsár Raba ngiwa hayóh

²⁶ Qoomaadae, Yoabu gixsár Raba ar múk Amoni gana i haratláy slaqwaraaro. Inós gixsadár waawuti'iima gari hayóh.

²⁷ Yoabu hee guri ya/aáw amór Daudi, guri báy, «Aga slaqwaán nee gixsár Raba. Aníng tlahhasar'ín tidár ma'aay nga hayóh.

²⁸ Gimáy, muu burumbureek sleémeero kudá' aa meet, xafaay sihheek, gixsa ka harwét nee ka hayót. Bar adooriheeká án bir nga hayóh, umuú gixsa kar ateeti a kwe'eé'.»

²⁹ Gawaá adoorihe Daudi muu sleémeero guri burumbuúr iri tláy ay Raba, tari slaáqw nee gixsadá' ngiri hayóh.

³⁰ Daudi slamangwduú waawutmooín gurir tláy gawaá sagós wa ale. Iiloeemaá slamangdá' taa tleéhh ar sahaábu a adór kílo mibeeri tám nee kooán, baraá guruuwose tlaa/anoó tlaxo úr i deer. Slamangwí kuri dahaás gawaá sákw Daudi. Slám muruú yaariír oo baraá gixsadá' guna hayóh.

³¹ Aluuwo múk gixsadá' guri ar tláy, giri qaás baraá gadiyeé. Xooslaá tar gadiyuusi a kuká': Masmeenadu nee sururuú muqsla, nee tsabuuwo, nee gadiyér matofaáli da/a/aangw kawa tleehhi. Adoorí an adór aa tlehhiít baraá gixsadu sleémeero awa múk Amoniwo. Alhhe'eesaywo Daudi nee muu sleémeero tari kií/ Yerusalemu.