2 SAMUELI 11 - Biblía Axweesantá Hhohho' ar Mungú 2004

Daudi nee Bat-sheba

¹ Umuúqo iimu/úngw kurkú /abene an qoomár waawitá iwa baraá slaqwaraárí tlaatlay. Daudi Yoabu guna ya/aáw nee geeraharuusero dinkwa nee múk Israeli sleémeero tawa slaqwarár ay. Inooín múk Amoni kuri baál, kuri barti'íni óh, nee gixsár Raba kari harweér. Ala Daudi iri meét Yerusalemu.

² Loarka wake, qoomár tsiindowo, Daudi ina qatuú wá tláy, iri tsa/án gawaá daanduú doó waawutmo. Qoomár iwa gawaá geehhoudá' wa hi'iimiti, /ameenír wák gana ár i hamtliín /ameenír tsataari hho', hhohh'ariro ila' gin hayót.

³ Daudi hee guri ya/aáw, /ameenidá' ngiwa yaahasi, axáy a harér heemá? Heedaádá' Daudi guri báy, «/Ameenirí a Bat-sheba, dasír Eliabu, nee a harér Uria heé xoorór Hiti.»

⁴ Naagáy Daudi muu guri ya/aáw as /ameenidá' kingiwa amoorósií huwi. Naagáy Bat-sheba iri hardát amór Daudi, Daudi nee /ameenidá' niri qaatiyé'. /Ameenirí hariímaarós ina sangw wátl, kár iri kí/ amór do'ós.

⁵ /Ameenidá' iri tsít, inós kaangwí iwa tsít guri ó' dír Daudi, adór tsiihaay tar kós.

⁶ Naagáy Daudi iri ya/abín amór Yoabu iri oó', «Uria heé xoorór Hiti amor'eé' ya/aawang.» Yoabu Uria guri ya/aáw amór Daudi.

⁷ Uria iwa hardáh amoorós, Daudi guri yaahaás saayuú Yoabuwo, nee oo muu sleémeero, nee adór slaqwara i diri'.

⁸ Daudi Uria guri báy, «Tláw ya'aawók hamaatleek, waátl amór do'ók.» Uria iri tláy dír doó waawutmoó wa ale. Hamtidár kilae waawutmo qeemuú muruú /ayma guri ya/aáw alaá Uria wa ale.

⁹ Ala Uria aa watliiká amór do'ós, aqo ina qaát dír afkú doó waawutmo, dinkwa nee sagadiyuusér waawutmo.

¹⁰ Daudi kuwa kaangwí báy adór Uria ira watliiká amór do'ós, Daudi Uria guri yaahaás, «Kuúng a baraá aa'aá dahhkáhe, masa watlká amór do'ók?»

¹¹ Uria Daudi guri báy, «Sandakmoó alqado dinkwa nee múk slaqwara sleémeero oo Israeli nee oo Yudawo ta baraá xafáy dirii' as slaqwara. Aakooeé' Yoabu nee sagadiyuuserós sleémeero xafaay kwa tleéhh baraá darma. Xáy, i qoónda aníng niwa waatl amór doo'eé' niwa iwtanángw aw, nee wahaangw nee /ayma, niri qaát nee harer'eé'? Aníng adoosíng a tleehhaaká, bara tleéhh tam ni gwaá'.»

¹² Naagáy Daudi Uria guri báy, «Diirií meeteek laarí, matlo ta wátl.» Baalaadae Uria ina meét baraá gixsár Yerusalemu. Looaytleérós,

¹³ Daudi Uria guri dah'ís amór do'ós ar muruú /ayma, nee muruú wahaango, Uria guri oonitiís. Tam adoorihe, xweeraadae Uria aa watliiká amór do'ós, aqo ina qaát gawaá qatanirós dinkwa nee sagadiyuusér aakoowós.

¹⁴ Matlaatlér taa káy Daudi slambare/i gari gooín amór Yoabu, gari ya/aáw ar dákw Uria amór Yoabu.

¹⁵ Baraá slambare/idae Daudi gár aa gooín a tí, «Uria hhayuú geera ti qase', didá' slaqwara iwa tsimaamíhh, kuungá' ni alií ki/á', as kahhó' inós kuwa didií gaasi.»

¹⁶ Naagáy, Yoabu qoomár iwa gixsár harweerár áy, Uria guri qaás didií xui ar miguuse slaqwarár baal.

¹⁷ Yaamuloousér gixsarí nina fi'ít baraá gixsadá' wa ale, as tawa slaqwi nee Yoabu, sagadiyuusér Daudi kari tsuú/. Uria kuduú xoorór Hiti kuri gaás sleeme.

¹⁸ Naagáy, Yoabu adoodá' slaqwara ira hi'ít gari alki/iít dír Daudi.

¹⁹ Yoabu sagadiyusmoowós kudá' aa ya/aáw guri báy, «Barnaxes kángw slaqwara ugwa alki/ít sleémeero dír waawutmo.

²⁰ Inós bira buúhh nee uri yaahaás bir kaahi, ‹Asma waáy, masa tseewuré' amór gixsa qoomár tawa slaqwa'? A xua'akáhe adór tundur baray tlaquuti ar maheeri gawaá koo/ír gixsar'ín wa ale?

²¹ Ahaá, heé Abimeleki garmoó Yerubesheti gwaa gaas a heemá? A /ameenír wák ar baraá gixsároóke, tidá' ta bay Tebesi, tlaa/ár xoosliingw ngiwa gawaá koo/ír wa kwáhh, tlaa/adá' Abimeleki guri gás? Asma milá masa tseewuuré' dír bihhaá koo/i?› Daqaní kuúng ku beer, ‹Tam sagadiyusmoowók Uria kuduú xoorór Hiti, inós sleeme aa gwaá'.› »

²² Ya/abusmoodá' iri tláy amór Daudi, umuú gaaro tidá' kunguwa ya/aáw nee Yoabu.

²³ Ya/abusmoodá' Daudi guri báy, «Wakuuseerén tina arbá/ /uuruwo, nari ti'iitiyé' tsee/aá gixsadu, nari haratlayé' amoorén baraá darmuudá' atén ti diriaan. Tam adoorihe atén inooín ina ki/isán ay afkú gixsa.

²⁴ Aluuwo inooín atén tina tlaqutiyé' ar maheeri gawaá koo/idá' wá ale. Baraá sagadiyuuseroge bahh'alé kaa tsuú/. Tam sagadiyusmoowók Uria, heé xoorór Hiti, inós aa gwaá'.»

²⁵ Daudi iri oó' dír ya/abusmoodá', «Yoabu ku beer, ‹Gaasíng ma tlaákw wa araar, asma paánga aqo heé ira sleér, baraá slaqwaraaro aqo heé tara sláy. Áx kuúng magaáhh, slaqwaraaro gawaá daanduú gixsaro, ay dír gixsasíng kay qororo'os.› Adoorí an adór Yoabu kur muunií qas.»

²⁶ Bat-sheba harér Uria kaangwí nguwa axás adór hhawaatuwós Uria ira gwaá', guri sa tsuunqumís.

²⁷ Qoomár /aa/aá Bat-sheba niwa faakiyé', Daudi iri ya/abín, Bat-sheba kawa huwi amór do'ós. Bat-sheba tari harér Daudi. Inós dír Daudiwo na/oó garma guri xwayluúr. Ala kaangwí Daudi aa tleéhh, AAKOÓ MUNGÚ guri buhhtís.