2 SAMUELI 10 - Biblía Axweesantá Hhohho' ar Mungú 2004

Daudi múk Amoni nee múk Ashuru nguwa baál

¹ Alaá deelór hhaawaaká iwa waaráhh waawutmo Nahashi, oo múk Amoni, iri gwaá'. Garmaawós kudá' ta bay Hanuni kuri waawutmoó wa qaás kitángw baabuúwós wa ale.

² Waawutmo Daudi iri oó', «Hanuni garmoó Nashashi u hhooeemií tleéhh, adoodá' baabuúwós naa aníng i tleéhh.» Daudi ya/abuuse gari ya/aáw amór Hanuni, as kuwa qaytsuú ay, asma baabuúwós iwa kahhuút. Ya/abuuseedár Daudi iwa hardát baraá yaamaá Amoni,

³ geeraharuusér uren ar múk Amoni aakooín guri beér, «Hanuúni, xáy, kawa xu' Daudi muu nguwa amoorógi ya/aáw uwa gurkwa/asi as baabuúwók nguwa ilaiwawá/i? Xáy, Daudi muu ngwa ya/aawikáhe, as gixsa ngiwa tsee/aarina' nee kawa tsawtsawusi aluuwo kari hayoh.»

⁴ Naagáy Hanuni ya/abuuseedár Daudi gari ohín, giri daamór bartá wák deequút umuúqo heewo, inqwaruuín guri feehhamiís ay gawaá gwe'eede, giri geemáy iwa tlaya' amor'ín ar ta slai.

⁵ Mukdá' iri muruút ki/imaá amór do'o, Daudi kuri kaangwí báy, muu guri ya/aáw as mukdá' kuwa al'ay, as tawa kángw kilá' wa muruút, giri báy, «Hooté' baraá gixsár Yerikór wa ale ay dír umuúqo heewo daamoórós ni ti'it, daqaní ni watlá' amór do'.»

⁶ Múk Amoni kawa tsaáhh adór Daudi kura buhhtís, múk slaqwara oo ya'ár hi'iít oo kume mibeeri tsár kuna tlaáxw amór múk Aramu wa ale, inooín a múk yaamaá Bet-rehobu, nee yaamaá Sobaro. Nee múk slaqwara oo kume mibaá nee tsár guri tlaaxw oo yaamaá Tobu, nee múk kumuú wák oo waawutmoó yaamaá Ma'aka.

⁷ Daudi kaangwí nguwa axaás, Yoabu guna ya/aáw tiwa kona' nee slaqwaruuse dinkwa nee miguuse.

⁸ Múk Amoni tindina ti'iít as slaqwara, tari amohhe'eesiyé' dír afkú slumtá gixsár Rabár wa ale, an gixsar'ín ar ur. Ala múk Aramu inooínaadá' Sobár dahhá' nee oo Rehobúr daáhh, nee mukdá' Tobúr daáhh, nee Ma'aka, tina amohhe'eesiyé' baraá tse/aá /awaák wa ale.

⁹ Yoabu ngiwa ár adór slaqwara ila' ngira da/atemís gawaawoósií ale, geera nee aluuwo, miguuse ar slaqwarár ngi baal gina tsawaár baraá mukduú slaqwara oo Israeliro, giri geera kawís, tari haraaganaaiyé' nee múk Aramu.

¹⁰ Yoabu mukduú hatlá' oo slaqwara guna saayín dír Abishai hhiyaawós, as mukwí nguwa geerahari, Abishai mukwí guri amohhe'eés tiwa haraaganaaiya' nee múk Amoni.

¹¹ Yoabu, Abishai guri báy, «Gám, barnaxes aníng tir ba/abaa/ /uuruwo, nee múk Aramu, daqaní kuúng haratla/a ngu eér as aníng iwa ale/iisár eer. Ala bar múk Amoni kuúng ur ba/abaa/ /uuruwo, aníng haratla/a ngu áw as kuúng uwa /iis.

¹² Ala /atláng, hhawaati'isáng, tawa slaqwaan as mukrén nee as gixsadaá Munguúrén, AAKOÓ MUNGÚ adoodá' atén wa qoom ngi tleehhi, adoodá' inós ngira ár.»

¹³ Naagáy, Yoabu nee mukós tana geerií hi'iít as tawa slaqwi nee múk Aramu, múk Aramu iri geeraaín wa goów.

¹⁴ Múk Amoni ngiwa ár adór múk Aramu ira goów, inooín sleeme tari goów geeraá Abishai wa ale, tari dáh baraá gixsa. Yoabu slaqwarár nee múk Amoni gari máy, iri kií/ ay Yerusalemu.

¹⁵ Ala múk Aramu kawa tsaáhh adór slaqwara kara harslaqaát nee múk Israeli, tiri dinkwari burumburiyé'.

¹⁶ Hadadeseri mukduú Aramu oo gayuú yaaér Eufrate guri i ya/abín kunguwa huwi. Kunguri huúw ay Helamu, kiwa geerahari nee Shobaki geeraharusmoó úr oo slawtá slaqwarár Hadadeseri.

¹⁷ Daudi kaangwí nguwa axaás, múk Israeli sleémeero guri dinkwárí burumbuúr, yaaér Yordani kari waaraáhh, tari hardáh ay Helamu. Múk Aramu tari amohhe'eés as tawa slaqwi nee Daudi, tari slaáqw nee inós.

¹⁸ Ala múk Aramu kuri baál, iri goów geeraá múk Israeli wa ale. Daudi múk Aramu oo tsiire faanqw guri tsuú/, kudaadá' gaardaá slaqwarár madiitá'. Nee kudá' faras ngwa tsa/ane' a kume mibeeri tsiyáhh oo aa tsuú/. Sleeme geeraharusmooín kudá' úr oo slawtá slaqwara, kudá' ta bay Shobaki, guri muút iri slahhaá', iri didár kilií gwaá'.

¹⁹ Naagáy waawitá sleémeero kuduú sagadiyuusér Hadadeseri kawa tsaáhh adór múk Israeli kura harslaqaát, tari al'axweés tari waydiín dír múk Israeli, inooín tari lawaalér múk Israeli. Gawaá adoorihe múk Aramu aa baloó qiitliiká múk Amoni nguwa ale/iisi.