2 SAMUELI 1 - Biblía Axweesantá Hhohho' ar Mungú 2004

Kángw gwa'arár Saulo kuwa oó' dír Daudi

¹ Alaá gwa'arár Saulowo, Daudi múk Amaleki guna baál baraá slaqwaraaro, niwa waátl iri Siklagír wa hoót deelo tsare.

² Bál tám iwa xeér, heeko wák oo amoodár kitángw slaqwaruusér Saulo i dirií', ina hardáh dír Daudi. Iri tumbarara'aát geeraá Daudi, guri xirfayeemiís. Heewí tlabaawós kinga feehhamamiís, nee sagós i teerír kón.

³ Daudi guri báy, «Kuúng a dáhh?» Inós iri oó', «Aníng nina /akuút baraá kitángw slaqwarár Israeli wa alé.»

⁴ Daudi heedaádá' guri báy, «Adór taa /imiís a adoomá? Dir'eé' ooang.» Heedaádá' guri mu/aywaáts, iri oó', «Muu naa baraá slaqwarár wa goów, slamí múk yaariír kwaa daásl. Saulo nee garmaawós Yonatan sleeme kaa tsuú/.»

⁵ Daudi garmaadá' kaangwí gwa dirósi huuw, guri báy, «Kuúng adór kar xu'. Saulo nee garmaawós Yonatanwo adór tara qaátl?»

⁶ Garmaadá' kaangwí ngwa huuw dirós i ale, iri oó', «Ar gitsee/aawo aníng a baraá tloomár Gilboár i dirií', naxés Saulo lwaalarós gaa i tlintií'. Slám múk gaardu nee farsuúwo ngaa i tsa/an, kuduú wakuuseerós, naa dirós i nakaá/.

⁷ Inós iwa aluuwós i qaytsiít, aníng ina ár, iri ateét. Aníng narí oó', ‹Aníng a diirí.›

⁸ Iri báy, ‹Kuúng a heemá?› Nguri mu/aywaáts, ‹Aníng a heé Amaleki.›

⁹ Iri báy, ‹Qwaláng, bihhaaeé' i tsewuwang án alhhe'eesáng gaasaro, asma aníng taa istá gwa'araárí qaás, aníng aga ló'wa slahhaá'.›

¹⁰ Gawaá adoorihe aníng nari tseewúw bihhaawós, nguri gaás. Asma aníng a xuú' looeemaá kilae i ya/aandaaká iwa kumiiti slafiingo alaá iwa huú'. Slamangwduú gawaá sagós nee mungayduú gawaá dakós ngiri duúx, nee hamí areeng ngaa huúw dír geeraawók, aakooeé'.»

¹¹ Daudi tlabaawós giri óh, giri feehhamiís. Mukdá' nee inós dinkwa tlabaaín sleeme ngiri feehhamisiyé'.

¹² Tari tsuunqumiís, tari /aa/amín, inooín tari gwaawín ay tsiindo, asma Saulo nee garmaawós Yonatan, nee múk AAKOÓ MUNGÚ, nee múk Israeli oo yaariír kuwa tsuú/ ar paangadu.

¹³ Daudi garmaadá' kaangwí ngwa huuw guri báy, «Kuúng a dáhh?» Garmaadá' iri mu/aywaáts, «Aníng a garmoó xoroór Amaleki.»

¹⁴ Daudi guri báy, «Kuúng adór tara qítl dakók tleesaro, heé taa iimbalaáx oo AAKOÓ MUNGÚ kuri gás.»

¹⁵ Daudi garmoó wák guri ateét, guri báy, «Heesíng gaaseek.» Guri hara suruúk, guri gaás.

¹⁶ Daudi guri báy, «Dakók oo kilá' kuúng un sakii/, asma afkóguú kilae ana lamabu'uún tawa ó', ‹Heedaádá' AAKOÓ MUNGÚ aa iimbalaáx aníng una gaás.› »

Tsuunqusmoó Daudi as gwa'arár Saulo nee Yonatan

¹⁷ Daudi iri tsuunqumiís as Saulo nee Yonatan.

¹⁸ Iri oó', «Múk Yuda ku intsaahhatimisi ar tsuunqumisuwí adoodá' kara gooín baraá kitaábuú Yashariwo.» Daudi iri oó',

¹⁹ «Mukduú xirfuuwók kwaa tsuú/ gawaá tlom'iiwók wa ale. A adoomá adór miguuse kara daásl!

²⁰ Kaangwí ló' mu ooara' dír Gatiro. Tam ayeemaá Ashkeloniro sleeme mu ooara'. /Ameenár múk Filisti munguwa saqwalaalá/, dasuú múk taa hheehhe'eesiiká miwa baraá/.

²¹ «Kuungaá tlom'aá Gilboa, tluwaay miwa tluúw ayahunge, tam qamuhúng mindiwa gaa hamaresiyé' umuú qoomaaro, asma amoosinge gaambuudaá miguuse kaa meetagaás, gaambór Saulo kaa slikiiká ar di/i.

²² «Ga/alér Yonatan kureeriwo aa baloó alií ki/iiká, paángár Saulo aa baloó tawoó ki/iká, kár ee, miguuse gan tsu/a/iín.

²³ «Saulo nee Yonatan a sla'aarusér taa ló'wa sla' baraá hotaaine, tam qoomár slafiingw nee qoomár gwa'araro taa paraatli'iiká, inslahhemaawo a adór gwares, eeít, ta /uureemaá kón adór direeri.

²⁴ /Ameenár Israeli Saulo ale/aa/amimaak kudá' kuungá' naa tsiitiis ar tlabaá da/aten awa diihhooa, tlabaahúng gina qaalín ar sahaábu.

²⁵ A adoomá adór miguuse kara daásl! Tana qaátl baraá timangír slaqwara. Yonatan kuna gaás gawaá tlooma.

²⁶ Hhiyaeé' Yonátan, aga gurhaamuút as kuúng. Án nee kuúng tin oohaán baraá hotarene, sla'aarirók dir'eene a gár waa/oo/amo, a gár waa/oo/amo ta sla'aarír /ameeni ba/a.

²⁷ «A adoomá adór miguuse kara daásl, nee xoosluuín awa slaqwara kiri tawo máy, i gadiyér kon'aaká.»