2 QOM'I 9 - Biblía Axweesantá Hhohho' ar Mungú 2004

Aa'aá waawuto'ór Sheba

¹ Waawuto'ór Sheba xirfuú waawutmo Solomon nguwa axás, aai gina tsék ay yaamaá Yerusalemu as waawutmo Solomon nguwa iiat ar yaahamisuú gawdén. Inós nee sagadiyuseerós ti koná' dinkwa nee aangamíár mooyángw tsuú' loohis, nee sahaábu nee tlaa/aá tlaxo uren. Iwa hardát dír Solomon, guna yaahamís umuúqo gaaro tidá' i koon baraá muunaáwose.

² Solomon yaahamisuuwós guna mu/aywatsín, ar aa harslaqaát i káhh tam ar wák.

³ Qoomár waawuto'ór Sheba sagalooár Solomon ngiwa axás nee do'ós kudá' aa tleéhh nguwa aán,

⁴ nee muruú /aymadár gawaá meésaaro, nee adoodá' sagadiyuseerós ira iwít, nee mukdá' muruú /aymár huwahuúw ira tsiitín, nee tsitoó mukdá' muruú wahángw huwahuúw, nee ilahhooár da/a ta hanmiisi baraá Doó Munguhe, adoorí sleémeero ngiwa aán, ilá' ngay ba/aba/iyé' ló'wa ale.

⁵ Naagáy waawutmo guri beér, «Kangwdá' sleémeero naa axaás baraá yaamuueé' wa aleeró daanduú gadiyeéroge nee sagalooaroge oo tsuwa ló'.

⁶ Ala aníng aga ya/amiiká tidá' inooín i kaahiia, an gár nisa hardáh as ngiwa ar ilaeé' awa kilae. Laatí tidá' naa aníng bayé' a tlaqtá tawo. Sagalooarók nee gadiyeédá' taa tléhh ka ló'wa ur, a adoodá' muu ngir kaahiiká.

⁷ Mukók gitse/aá hhooá' ga sláy. Sagadiyuuseerók tí diirí wa gadiyuus, gitse/aá hhooá' ngaa slayé', kuká' sagalooarók ngi axamiisá'.

⁸ AAKOÓ MUNGÚ, Munguúwók i xirfuuti, kudá' kuúng ugwa slaa', uri gawaá kitaangós i qaás waawutmoó wa ale, asma Munguúwók múk Israeli gwaa slaá' nee giri gawdeés ay kureeraá kureér, gawaá adoorihe kuúng ugwa waawutmooín wa qaás, as sakwasleemár ganaa' nee hotaá ganaa'ae kiwa gawdes.»

⁹ Solomon gway qeemu i hanís oo har kílór kume tsiyáhh ar sahaábu, nee mooyángw yaariír nee tlaa/aá yaariir awa tlaxo gawde. Mooyángw adór kudá' aa waawutmoó i hanís i kakaahh.

¹⁰ Sleeme múk waawutmo Hiramu nee oo waawutmo Solomon kudá' sahaábu ngaa Ofiri wa huuw, inooín xaa'aá ta bay sandali nee tlaa/aá tlaxo gawden gina huwiyé'.

¹¹ Solomon xaaiidá' giri tsa/a/amtór Doó Mungúr tleéhh nee ar do'ose, bahh alé gina gidandooraay nee mariímbár daa'ángw ar tleéhh. Gár adór tí kaa ariiká baraá yaamaá Yudawo.

¹² Waawutmo Solomon umuú gár waawuto'ór Sheba aa slai gana haniís, umuúqo gár aa firiindi dimbé nee tidá' inós aa húp dír waawutmo. Aluuwo waawuto'ór Sheba nee sagadiyuseerós tay waátl ayaaín i ale.

Daqaari'iimár waawutmo Solomon

¹³ Umuú kurko waawutmo Solomon sahaábuú ilooemaawo kílo kume mibeeri tsár nee kooán guna slasláy,

¹⁴ dimbé nee tidá' aa slasláy dír múk halaanu'uumár tlehhiít wa ale, nee sahaábu kooko kuna huwahuúw nee waawituú yaamaá ma/araábu, nee geeraharuusér múk Israeli sleeme peésa nee sahaábuwo ngina huwahuwiyé' dír waawutmo Solomon.

¹⁵ Waawutmo Solomon gaambaá diren awa tsiire tsár gina tleéhh, gay sliík ar sahaábu, umuú gaamboode gár aa fák a kílo faanqw ar sahaábuú taa kwahhuút.

¹⁶ Sleeme gaambaá ninakw gina tleéhh awa tsiire tám, gaambuuká' gay sliík ar sahaábu, umuú gamboode gár aa fák a kílo tám ar sahaábu, gay qaás baraá do'oduú amór gartá Lebanoni.

¹⁷ Waawutmo kitángw yangariít oo xiríf guna tleéhh ar xareemaá daawe, guri qaalín ar sahaábuú hhohhó'.

¹⁸ Kitaangwí tsa/amto ngi kon a lahhoó', nee kitangwdá' taa i tlintati'i gawaawose gár kura tleéhh a sahaábu kilós. Kitángw ta yaií qamin gár kura tleéhh a sahaábu kilós, sleémeero kiri dinkwárí nigihhiitís nee kitangwdú waawuti'iima. Umuú barto dír dawa kway qaasi i deer, slám slaqsa'aá direeraá tsár kina tleéhh dír daba' ki qamín.

¹⁹ Slaqsa'aá mibaá nee tsár awa direeri, kiri sihhtís dír umuúqo alhhe'eesoó tsa/a/amtooro. Kitángw adór kwí kwaa baloó tleehhiká baraá waawuti'imár qoomaadae.

²⁰ Slooqa'aá Solomon sleémeero gár kira tleéhh a sahaábu, nee xooslár do'oduú gartá Lebanoni gár kira tleéhh a sahaábuú hhohhó'. Qoomár waawutmo Solomonuwo peésa a gár slahha'aaká.

²¹ Solomon miringér sagadiyuusér waawutmo Hiramu ir aa'aá kakeer ay yaamaá Tarshishi gan kón. Alaá kureeraá tame miringeedá' ni kikí/ ar sahaábu nee peesaaro nee xareemaá daweero, nee poohame nee tsir/ór ta bay tausiro.

²² Waawutmo Solomon waawituú hatlá' oo baraakaá yaamu sleémeero guna baá/ daqaari'iimaro nee sagalooaro.

²³ Waawituú ayeemaá hatlá' sleémeero sagalooár Solomon kana waatlakweemiís axamisuuwo, tidá' Mungú aa haniís.

²⁴ Umuú waawutmoowo Solomon guna qeemú i haniís umuú kurko, oo xooslár ta tleéhh ar peésa, nee ar sahaábu, nee tlaba', nee xooslár slaqwara, nee mooyángw tsuú', nee faras nee wayshama'.

²⁵ Waawutmo slumaá kume tsiyáhh awa faras gina tleéhh nee gaarduuine, nee askaárír farasú tsa/a/aam a kume mibaá nee tsár. Inooín gina qaás baraá wa/aamér farasú koom, nee baraá gixsár Yerusalemu.

²⁶ Inós waawitá sleémeero guna sawaawuti'ín iimír yaaér Eufrate ay yaamaá múk Filisti ay digmuú yaamaá Misri.

²⁷ Qoomár waawutmo Solomonuwo peésa baraá Yerusalemuro a adór tlaa/e, nee pehhoó sahhta a adór /aantsír Shefela.

²⁸ Solomon kuna farasú i huwahuúw kudá' taa tlaxún baraá yaamaá Misrír wa alé nee ayeemaá hatlae sleeme.

Gwa'arár waawutmo Solomon

²⁹ Tlehhma'aá waawutmo Solomon iimír iimu/uungw ay alhhe'eesaay kaa gooín baraá kitaábuú «Alki/ituú aarusmo Natani», nee kitaábuú, «Aaru'uumár Ahiya oo Shilo», nee baraá kitaábuú «Iigu'uutuú Ido», handá' sleeme daanduú Yeroboamu garmoó Nebati kwaa baraadá' i gooín.

³⁰ Solomon ina waawuti'ín baraá yaamaá múk Israeli kureeri mibeeri tsiyáhh.

³¹ Alhhe'eesaywo Solomon iri gwaá' kway foól baraá gixsár baabuúwós Daudi, garmaawós Rehoboamu kitaangós gway óh.