2 QOM'I 8 - Biblía Axweesantá Hhohho' ar Mungú 2004

Gadiyér Solomon

¹ Kureeraá mibeeri tsár niwa waaraahhiyé' iimír Solomon Doó Mungú nee do'ós kuduú waawuti'iimaro ngiwa tleéhh,

² Solomon gixsadudá' taa haniís nee Hiramu tleehharo gay /abeés, naagáy giri haniís dír múk Israeli as ngiwa hootiya'.

³ Solomon gixsár Hamat-soba gay i haratláy, gari arbaá/ gay hayóh.

⁴ Gixsár Tadmori, tidár baraá xaanxaay, gay tleéhh. Gixsaduudá' xoosluuwós ngi babatsi giri tleéhh baraá Hamati.

⁵ Slám Solomon gixsár Bet-horoni ar gawa nee Bet-horoni ar baraay gina tleéhh, gixsadudá' awa koo/i gawden nee afe nee tseegamooro.

⁶ Sleeme gixsár Balati gana tleéhh, nee didár xooslu ki babatsi, nee gixsár gaardu kudá' ta uuruxun nee faras, nee múk farasú i tsa/a/ama, nee umuúqo gaaro tidá' aa slaá' tleehharo baraá Yerusalemu, nee Lebanoni, nee baraá yaamuuwose, gay hhe'eés tleehharo.

⁷ Múk hatlá' kudá' aa meet, mukduú Hiti, nee oo Amori, nee oo Perisi, nee oo Hifi nee oo Yebusi, kudaá múk Israeliwooká,

⁸ sleeme baraá tla/ángw xwaylar'ine múk taa hhaamiisiiká nee múk Israeli i deer, Solomon gina /uurutís baraá gadiyér tawa bihhií noongo'ootiiká. Tam ay laarí adoorí kan /imamiis.

⁹ Ala Solomon múk Israeli gwa lawaale tleehhiiká as gadiyeérós, inooín an geeraharuusér slaqwaruuseerós, nee múk urén, nee an geeraharuusér gaardaá ta uuruxun nee faras, nee ar mukdá' faras gwa i tsa/ani.

¹⁰ Geeraharuusér uren ar waawutmo Solomon a tsiire tsár nee mibeeri kooán, kuká' an kudá' aleesleemuú koomá' daanduú muko.

¹¹ Solomon hareerós, dasír waawutmo Farao, gana loohatís gixsár Daudi wa ale, gari huúw baraá do'odá' aa tleéhh as inós. Asma inós ina oó', «Harer'eé' i baraá doó waawutmo Daudi wa hotká, waawutmoó Israeli, asma didá' sandakmoó alqadór AAKOÓ MUNGÚ i dirii'i ka hhoohhoo'.»

¹² Aluuwo Solomon AAKOÓ MUNGÚ guri ilahhooár dá/tí haniís dír kitangwdá' aa tleéhh dír geeraá matla/ángw Doó Mungú.

¹³ Ilahhooarí gana haniís adoodá' hara'ayár Mose i kat, deelór Sabaáto, nee deelór slahhángw /abén birna ti'iít, nee deeloodá' uren tám baraá kurko: Deelór mikaátér taa sluuftisiiká, nee deelór uren ar fiiqit, nee deelór ur ar isleeri.

¹⁴ Inós adoodá' baabuúwós Daudi heé Mungú ngira hara'ayín gana eehár, baalaqaasír kaahamuusér Mungú ar umuú deelo gana qaás, nee ar mukduú tlahhoó Laáwi, kuduú kaahamuusér Mungú alee/iimiís as iwa xirfayemisiyá' nee gadiyér'ín ngiwa tleehhiya'. Xuumuuse sleeme gari qaás baraá bohhu umuúqo afkú do'o nguwa xuna'.

¹⁵ Kaahamuusér Mungú nee múk tlahhoó Laáwi tidaádá' waawutmo ngaa báy kaa mayká tlehhtuuwo, daanduú doó ta xooslaárí babaatsi.

¹⁶ Naagáy gadiyeé sleémeero ar Solomon iri hhooeér iimír baalaadá' ihhafiirír doó Mungú ngiwa qaás, ay baalaadá' Doó AAKOÓ MUNGÚ iwa hhooáy.

¹⁷ Naagáy Solomon iri tláy ay Esion-geberi nee Eloti, tidár afaá tlawi baraá yaamaá Edomu.

¹⁸ Huramu miringe gari amór Solomon ya/aáw ar geeraharuuseerós dinkwa nee múk ga madiít baraá tlawto. Kuká' dinkwa nee sagadiyuusér Solomon nay aa'aá kayé' ay yaamaá Ofiri, nee sahaábuú kílo kume mibaá nee kooán ngway amoodá' wa huwiyé' amór Solomon.