2 QOM'I 7 - Biblía Axweesantá Hhohho' ar Mungú 2004

Aldafirír doó Mungú

¹ Waawutmo Solomon Mungú firooro nguwa hhe'eés, asltá gawaá dooraá daahh nay hardát, ilahhooadá' taa haniís as da/a nee ar muruú taa tsuú/ asla gari /ak, nee xirfuú AAKOÓ MUNGÚ Do'odá' gway hatsiís.

² Tam kaahamuusér Mungú dahmaá baraá doó AAKOÓ MUNGÚ gwaa qitlká, asma xirfuú Mungú do'dá' gwaa dalaá/.

³ Qoomár múk Israeli sleémeero asltadá' naa gawaá doorí wa /et nee xirfuú AAKOÓ MUNGÚ kuduú baraá Doó Mungú nguwa ariyé', inooín niri xupapuiyé' yaamu, Mungú nguri sluufisiyé', ngway sluufáy hanisiyé' tawa kaahi, «AAKOÓ MUNGÚ ku hhoó', asma sla'aarirós ar warqawaaká in kumaamít ay kureeraá kureér.»

⁴ Naagáy waawutmo Solomon nee múk Israeli sleémeero ilahhooár muruú ta tsu/i ngiri haniisiyé' dír AAKOÓ MUNGÚ.

⁵ Waawutmo Solomon awe kume mibeeri tsár nee tsár, nee bee/ángw kume tsiiruú wák nee mibeeri tsár gway haniís tawa ilahhooár muruú ta tsu/i dír Mungú. Adoorí an adór Solomon nee múk Israeli sleémeero Doó Mungú kura paraátl as Mungú.

⁶ Kaahamuusér Mungú tay sihhiít dir'ín. Múk tlahhoó Laáwi ina sihhiít sleeme, dinkwa nee xoosladár daa'ángw AAKOÓ MUNGÚ, tidá' waawutmo Daudi aa dir'ín i haniís, tidá' inós aa tleéhh as AAKOÓ MUNGÚ nguwa xirfayeemisi iwa kaahi, «Sla'aarirós ar warqawaaká in kumaamít ay kureeraá kureér.» Kaahamuusér Mungú tarumbeétadu giri ufáhh, múk Israeli sleémeero iri sihhiít.

⁷ Slamí waawutmo Solomon didár tla/ángw afeenír do' gana paraátl. Ilahhooár da/a sleémeero gay didií haniís, ilahhooár balaangw nee didá' wahhaar gana ilahhooár waydú wa haniís. Inós adoorí gana tleéhh asma kitangwdá' aa tleéhh ar muqslár sirda/aten oo ilahhooa hanmis i bu'utiiká.

⁸ Qoomaadae Solomon nee múk Israeli muruú /aymár úr nguna qaasiyé' deelo faanqw, múk iimír dahmaá Hamati bihhaá /iiko, ay digmuú yaamaá Misri bihhaá basko.

⁹ Bál dakaate tana burumburiít as firo, asma deelo faanqwe kitángw ilahhooa nguna paraatliyé', nee deelór úr ngina tleéhh deelo faanqw.

¹⁰ Baalár alhhe'eesay a bál mibeeri tsár nee tám ar slahhángw faanqw. Baalarihe waawutmo Solomon muu gway watlís amór maray'ín i aleeró. Inooín tana qwalaá/ as tsuuqadá' AAKOÓ MUNGÚ aa dir'ín i haniís, dír Daudi nee dír Solomon nee dír mukós oo Israeli.

Solomon kuwa malé i daqáy nee Mungú.

¹¹ Alaá Solomon doó Mungú nee kós kuduú waawuti'iima ngiwa hhe'eés tleehhamoro, nee umuú gaaro tidá' ira tsabini,

¹² AAKOÓ MUNGÚ guna i xáy xweeraawo, iri oó', «Aníng firoorók aga axás nee aníng Do'owí ugwa tsawaár as tawa dír aníng tiwa ilahhooárí hanmiisi ar muruú ta tsu/i.

¹³ Aníng bar tluwaay ugwa ilaá/, laqaá bar ingigi ngaa tleés balangwhúng guri /ák, laqaá tiqtír pu/i kuungá' burna sleér,

¹⁴ barnaxes muk'eé' kwí birta tsatsaa'areés nee iri firiné', nee iri leeleehhiyé', nee tlehhmi'ii'ín kudá' tlakw ngiri mayé' tlehhtuuwo, aníng inooín i axaás gawaá doorí wa ale nee tlakweemaaín in gurtláw, nee diihhooa ngi slayá' baraá yaamuuine.

¹⁵ Aníng do'owí u xuúm, nee firór ta baraá do'owí wa firiinda' aníng a iiárií qaás,

¹⁶ asma aníng diirí aga hhoohhooeés nee aga tsawaár tawa dír muu aníng iwa sluufmiisi daqisleém. Aníng diirí a xuúm nee ngiri slaá' daqisleém.

¹⁷ Kuúng barnaxes aníng i sagadiyús ar inkihhimu adoodá' baabuúwók Daudi aa tleéhh, daber'eé' baraá ilaiwa/á' nee kaahir'eene, nee umuú gaaro tidá' ugwa bawi a tlehhít,

¹⁸ aníng kitaangók kuduú waawuti'iima u gawdeés adoodá' ngira alqadiím dír baabuúwók Daudi niwa kah, ‹Kuúng hee u dakuská oo múk Israeli gu sawaawuti'iím.›

¹⁹ Ala barnaxés kuungá' aníng iga geexeeré', kaahir'eé' kari sié' nee hara'ayar'eene, nee munguaá hatlá' kiri sluufmisuú eeré',

²⁰ aníng kuungá' nu hingeés baraá yaamuuká na kuungá' i haniisi, nee Do'owí aníng naa hhoohhooeés as umuueé', un amór saáwí kwaáhh dir'eene. Xoordu sleémeero do'owí ngway waqaaiyá' nee ngway niqiná'.

²¹ «Hamí Do'owí ku ló'wa xiríf, ala daqaní umuú heewo oo diirír waarahha in da'ayuut iri ooi, ‹Ahaá waáy, AAKOÓ MUNGÚ gár adoorí ngisa yaamuuká i tleéhh nee Do'owihe?›

²² Muu gay mu/aywaats tari ooi, ‹Asma inooín AAKOÓ MUNGÚ kudá' baabi'ii'ín nga baraá yaamaá Misrír wa duux ngwa iiárií qaasi'iiká. Inooín munguaá hatlá' ngina sluufmisuú ayé' nee ngay sagadiyuusiyé', an gár AAKOÓ MUNGÚ slahh'amuuwí ngusa inooín i tleéhh.› »