2 QOM'I 6 - Biblía Axweesantá Hhohho' ar Mungú 2004

Solomon i múk i kwasleemuut

¹ Aluuwo waawutmo Solomon iri ilawaáts, giri báy, «AAKOÓ MUNGÚ ina oó', ‹Aníng dír ni hoot a baraá ma/amír aa qipit.›

² Aníng hám daxta kuúng ugwa doó xiríf i tleéhh, dír tawa hot kureerisleeme.»

³ Naagáy waawutmo iri warqáy amór múk Israeli, sleémeero giri tsuúq, qoomaarihe múk Israeli sleémero i sihhmiit.

⁴ Inós iri oó', «AAKOÓ MUNGÚ, Munguú Israeli, i xirfuuti, kudá' al'axweesantós tidá' aa oó' dír baabuúeé' Daudi gaa boo/ees.

⁵ Tidá' iwa oó', ‹Iimír aníng qoomaadá' muk'eé' nguwa duúx baraá yaamaá Misrír wa alé ay laarí, aníng gixsár naa tsawaár i káhh baraá yaamaá Israeliro tawa dír ta Dooeé' tleehhi oo tiwa sluufmiisi, slamí heé naa tsawaár i kaahh oo muk'eé' Israeli gu sa waawuti'iím.

⁶ Ala hamí daxta aníng gixsár Yerusalemu aga tsawaár dír muu aníng iwa sluufmiisi, nee kuúng Daudi muk'eé' un sawaawuti'iín.› »

⁷ Solomon iri kumiít axweesanto iwa kaahi, «Baabuúeé' Daudi Doó Mungú guna ístií tsaát tleehharo as AAKOÓ MUNGÚ, Munguú Israeli, kuwa baraadá' wa sluufmisi.

⁸ Ala AAKOÓ MUNGÚ baabuúeé' Daudi, gu bay, ‹Kuúng gar hhoo' aga tléhh tawa tsabiín Dooeé' kuwa tleehhamór wa sla',

⁹ ala kuúng u baloó tlehhká. Heé gu tleéhh a garmaawók kudá' ta laqwal, do'owí aníng tiwa sluufmiisi gun tleehh.›

¹⁰ «Gimáy daxta, AAKOÓ MUNGÚ al'axweesantós tidá' aa oó' gaa boo/eés. Asma aníng hamí kitángw baabuúeé' Daudi ugwa óh ar adoodá' AAKOÓ MUNGÚ ngira al'axweés, nee aníng Doó AAKOÓ MUNGÚ Munguú Israeli kuwa sluufmiisi ugwa tleéhh.

¹¹ Aníng sandakmoó alqadór AAKOÓ MUNGÚ ugwa baraadá' i qaás, kudá' alqadór AAKOÓ MUNGÚ ga koóm, dír múk Israeli tidá' aa tleéhh.»

Firór Solomon

¹² Naagáy Solomon iri tláy iri sihhiít dír geeraá kitangwduú ilahhooa oo AAKOÓ MUNGÚ, dír geeraá múk Israeli, dabaawós gay gáwtí tleés.

¹³ Solomon /aampa gaa tleéhh ar muqslár sirda/aten, gay qaás tla/ángw afeeni, tlenaango nee uroó bihheero a miíta tsár ga ba/aabá/ uro bihhe, nee tlenaangw gawa a miíta wák ga ba/aba/. Inós iri tsa/án gawaá /ampaadá', iri tumbarara'aát dír geeraá boo/oó múk Israeli, dabaawós gay gáwtí tleés.

¹⁴ Inós iri firín iri oó', «Aá AAKOÓ MUNGÚ, Munguú Israeli, Mungú adór kuúng i kaahh gawaá dooriwo nee baraakaá yaamuwo, oo alqaduuwós gi ohiím nee sla'aarír warqawaaká gan laqaaqán dír sagadiyuuserós sleémeero ar gu ilaiwawaa/ ar muner'ín sleémeero.

¹⁵ Kuúng an kudá' al'axweesantók aga ot, tidá' taa ó' dír sagadiyusmoowók, baabuúeé' Daudi, hamí laarí tidá' sleémeero aa bó/.

¹⁶ Gawaá adoorihe, AAKOÓ MUNGÚ, Munguú Israeli, gimáy tidár hatlá' taa alqadiín dír baabuúeé' Daudi boo/eeseek, tidá' kuwa beér, ‹Barnaxes na/iiwók daber'eé' ngi oohiyá', nee birti harmagaahhiyá' adór kuúng wa ale, daqaní kuúng qooma sleémeero garma u koón oo iwiít gawaá kitángw aleesleemu oo Israeli.›

¹⁷ Gawaá adoorihe daxta AAKOÓ MUNGÚ, Munguú Israeli, umuú gaaro tidá' taa al'axwés dír sagadiyusmoowók Daudi boo/eeseek.

¹⁸ Ala Mungú, kuúng aqo tsuwa hóta baraaká daanduú yaamuwo dinkwa nee muu? Bar doori nee dooriidá' gáwtí saawá' in bu'umitiaaká, xáy, do'owí aníng naa tleéhh adór ir bu'uuti?

¹⁹ AAKOÓ MUNGÚ, Munguúeé', aníng a sagadiyusmoowók. Firór anuú sagadiyusmoowók axaseek, firor'eé' tí ni fiririim boo/eeseek.

²⁰ Do'ók xuumeek tlatla/aangw nee xweeraawo. Do'ók kwí al'axweesani kawa ó' ar mukók uwa diirí wa sluufmiisi nee firór mukók kawa diirí wa axamis. Anuú sagadiyusmoowók firor'eé' uwa diirí wa firiim axaseek.

²¹ Firor'eé' iiárií qaaseek, nee firór mukók Israeli iiárií qaaseek, qoomár bar gur'er'ín ngaa amoorí xu'usiyé'. Firoorén iiárií qaaseek gawaá doorí wa ale didár hotaawók, ti iiárií qas nee ti gurtleer.

²² «Barnaxés hee kuqá' gwaa sadakuús, nee inós burkunga huúw dír kitaangók oo ilahhooa kay hanmamisi, as kuwa lo'ór /aymisi,

²³ AAKOÓ MUNGÚ, na'amaamís, iia qaaseek gawaá doorí wa ale, nee sagadiyuseerók sakwasleemuteek. Kudá' tlakweema gaa tleehh muxeek, nee kudá' ganaá' gan'amuú i harafaareek.

²⁴ «Qoomár múk Israeli burkwa baál nee wakuuser'ín as kuúng uwa sadakuusiyé', ala birna amoorók i ki/iyé', niri hhu'u'uné', nee umuuwók nguri ya/ané', gurtleemu nguri firiné' ar tsatsa'areema baraá do'owí wa ale,

²⁵ na'amaamís, iiárií qaaseek gawaá doorí wa ale. Tlakweemaá mukók oo Israeli gurtlaweek, nee inooín ki malé ki/ís baraá yaamuuín kudá' taa dir'ín i hanís nee dír baabi'ii'ín.

²⁶ «Qoomár tluwaay bura ilá/ as tlakweemaaín, nee aluuwo niri firór ayé' dír do'owí, umuuwók ngway ya/ané', tlakweemaaín ngiri hhu'u'uné' as kuúng kiwa múx,

²⁷ na'amaamis, kuúng iiárií qaaseek gawaá doorí wa ale, tlakweemaá sagadiyuseerók gurtlaweek, mukók oo Israeli, qoomár bira intsaahhatís adór hhoo' ar nir hootiia. Daqaní AAKOÓ MUNGÚ, kuúng tluwaay ku hanís baraá yaamuuká' awa mukók, kudá' kuúng taa inooín i hanís tawa aalir'ín.

²⁸ «Giyeé birna tleér baraá yaamuwo, laqaá tiqtír pu/i, laqaá slahheemasi, laqaá danú xaai birnga kahaás, laqaá ingigi birna hardát, laqaá karkari, laqaá barnaxes mukók wakuuser'ín gaa baraá gixsarkárí harwét, laqaá slahh'amu, laqaá tiqti gaalahe,

²⁹ kuúng na'amaamís, firor'ín iiárií qaaseek. Umuú gár naa firni'i, laqaá umuú heé na qo firini, laqaá mukók oo Israeli sleémeero, slahh'amuuín barngwa tsaahhiyé' nee gurhaamir'ine, umuú heewo bira firín dabaawós gaa gáwtí tleés giri amór do'ók xu'ús,

³⁰ kuúng inooín iiárií qaaseek iimír gawaá doorí wa alé nee gurtlaweek. Kuúng kilók iinslawoó muunuú umuúqo hee un xú'. Kuúng tleehheek tidá' hariim dír heewo,

³¹ as kahhó' kuúng uwa ilaiwa/iya', nee niwa hootiya' ar adoodá' kuúng taa ó' deelo sleémeero ar niwa hootiya' baraá yaamuudá' taa haniís dír taati'iirén.

³² «Aqo adoorír kilá' múk xoordaá hatlá', kuduú xoorór Israeliwooká, birna amór yaamaá saáwá' wa tlayé', asma ngiwa axaasiyé' kuúng tuwa úr, nee tawa /uuruú koon, nee tuwa inslaáhh gaa tleehhamooro, qoomár birna hardihiyé' nay dír do'ók kwí wa firiné',

³³ na'amaamís, firor'ín iiárií qaaseek iimír gawaá doorí wa ale didár hotaawók, nee umuúqo gár xoordaá hatlá' naa firiné' tleehheek, as kahhó' xoordu sleémeero awa daanduú yaamu umuuwók nguwa tsaahhiya' nee nguwa ilaiwawa/iya' adór mukók oo Israeli. As kahhó' ngiwa tsahhiya' adór do'owí aníng naa tleéhh tar dír kuúng tuwa firiirin.

³⁴ «Mukók bira tláy baraá slaqwara, iwa slaqwiya' nee wakuuser'ín umuúqo dír ki huba, nee kuúng uri firiné' dír ti dirii'i, gur'er'ín birnga amór gixsarí taa tsawát xu'usiyé', laqaá amór do'owí aníng naa tleéhh as kuúng,

³⁵ na'amaamís, firor'ín iiárií qaaseek iimír gawaá doorí wa ale, nee arba/ati ti hanis.

³⁶ «Barnaxes mukók ugwa tlakweemií tleéhh, asma heé dakumamisaaká i kaahh, kuúng kiri i búhh, kiri qás gawaá dabaá wakuuser'ín kiwa arba/i, aluuwo kiri ar tláy yaamaá saawá' laqaá awa tseewá',

³⁷ aluuwo birna inslawiné' baraá yaamuudá' ki ar tlayi, niri hhu'u'uné', kuúng uri firiné' baraá yaamuudá' ki huwi, iwa kaahiya', ‹Aga tlakweemisaán, aga paranga/aán, aga dakusaán,›

³⁸ laqaá barnaxes inooín naa hhu'u'uné' ar muner'ín sleémeero, nee ar qeereemooín sleémeero, bura firiné', gur'er'ín nga amór yaamuuín xu'usiyé', kudá' taa baabi'ii'ín i hanís, nee amór gixsarí kuúng taa tsawát, nee amór do'owí aníng naa tleéhh as kuúng,

³⁹ na'amaamís, daqaní kuúng firor'ín iiárií qaaseek iimír gawaá doorí wa alé, nee gan'amu ti harafat, nee tlakweemaá mukók gurtlaweek.

⁴⁰ «Daxta aá Munguúeé', atén ti i qaytsit, nee firorén tí ta dír do'owí wa firirimaan iiárií qaaseek.

⁴¹ Aa AAKOÓ MUNGÚ, daxta tlawáng sihhiitáng, dáh dirók tidá' tay hungu/us, kuúng nee sandakmoowók oo alqado kuduú /uuruuwók. Aá AAKOÓ MUNGÚ, masók kaahamuuseerók ba/ama ga sleér, mukók kudá' inkihhím i baraá hhooeemaawók wa qwalaala/iye'.

⁴² Aá AAKOÓ MUNGÚ waawutmoowók kudá' taa iimbalaáx mu alaá xu'usar. Sla'aarirók tidá' warqawaaká inslaweek as sagadiyusmoowók Daudi.»