2 QOM'I 5 - Biblía Axweesantá Hhohho' ar Mungú 2004

¹ Solomon doó AAKOÓ MUNGÚ nguwa hhe'eés tleehhamoro, xosluudá' sleémeero baabuuwós Daudi aa paraátl as Mungú gay qaás baraá dó' i alé. Xooslár aa qaás a peésa, nee sahaábu nee xoslaá hatlá' sleémeero, giri baáts baraá doó Mungú.

Sandakmoó alqado kuwa huúw baraá Doó Mungú

² Aluuwo Solomon bariisér Israeli nee múk urén oo tlahh'aá Israeli, nee geeraharuusér maraá baabi'i sleémeero gari burumbuúr baraá Yerusalemu, asma sandakmoó alqadór AAKOÓ MUNGÚ nguwa leehhiya' baraá gixsár Daudi tidár Siyoni.

³ Inooín sleémeero tana burumburiít dír geeraá waawutmo bál deelór ur ar slahhángw faanqw.

⁴ Qoomár bariisér Israeli sleémeero iwa burumburít, múk tlahhoó Laáwi Sandakmoó alqado kunguri gagaár.

⁵ Kaahamuusér Mungú nee múk tlahhoó Laáwiwo sandakmoó alqado nee heémadár Mungú, nee xosluudá' hhohho' awa baraá heémaadá', kiri huúw.

⁶ Waawutmo Solomon nee múk Israeli sleémeero tari sihhiít geeraá sandakmoó alqadór AAKOÓ MUNGÚ, ilahhooár yaariir ar bee/aangw nee ar hikwa ar faaroro ta aleeslayká ngiri haniisiyé'.

⁷ Adoorí kawa hhe'eés kaahamuusér Mungú sandakmoó alqadór AAKOÓ MUNGÚ kway huúw baraá doó Mungú, kuri qaás didá' ak ló'wa hhoohhoo' baraá guruú hhampe'eeraá slaqsa'aá keruúbi.

⁸ Hhampe'eeridá' na hhafiyé', sandakmo nguna tuuntukiyé', tam sleeme xaaiidá' kura loohiís ngina tuuntukiyé'.

⁹ Xaaiidá' ki tlet, sager'ín ka geehhoo' didá' hhohhoó' wa ale geeraá kutuwidár guruú do', ala ki geehhooeeká guruú tsee/aawo. Xaaiidá' tam ay laarí i dayá'.

¹⁰ Gár baraá sandakmoó alqadórí dirii' ar hatlá' i káhh aqo har tlaa/eedá' tsár parereehhayen, kudá' Mose aa qaás, qoomár tawa dír tloomár Horebu i dirii'i, didá' AAKOÓ MUNGÚ alqado ngiwa oó' dír múk Israeli, qoomár tawa Misrír wa ti'iít.

Xirfuú AAKOÓ MUNGÚ

¹¹ Qoomár kaahamuusér Mungú niwa didá' hhoohhoó' wa ti'ít, kaahamuuse sleémeero taa qaroó hhohhoeesiyé', tam bohhuuín ngaa gár i xuui'iiká.

¹² Mukduú tlahhoó Laáwi kuduú daauuse a Asafu nee Hemani nee Yedutuni nee daaqay'ín nee hhaeeine, inooín tlabaá hhohho' awa kitaáni nga tsiitiyé'. Inooín in mitingiroó koná', nee mariímba nee gidaandori. Inooín tana sihhiít bihhaá da/aáw awa kitangwdá' ta ilahhooárí hanmamisi dinkwa nee kaahamuusér Mungú ar tsiiru nee mibeeri tsár kudá' i tarumbeétadaá ufahhaná'.

¹³ Qoomár mukdá' tarumbeétadaá ufahhaám nee daauuse afo kawa alqoomeés tawa AAKOÓ MUNGÚ sluufmiisi nee kuwa xirfayeemisi ar tarumbeetadu nee mitingiraay nee xooslaá hatlá' awa daa'aangw, tawa kaahi, «AAKOÓ MUNGÚ ku hhoó', asma sla'aarirós ar warqawaaká in kumaamít ay alhhe'eesay wasle.» Doó AAKOÓ MUNGÚ huunki gway tuuntúk.

¹⁴ Tam Kaahamuusér Mungú taa kumitiiká saaliingw tleehharo, as huunkidá' do' gwa tuuntuk. Asma Doó Mungú aa haáts xirfuú AAKOÓ MUNGUHE.