2 QOM'I 4 - Biblía Axweesantá Hhohho' ar Mungú 2004

Xooslár doó Mungú

¹ Waawutmo Solomon kitángw ilahhooa guna tleéhh ar muqslír sirdaa/aat, tlenaangw a miíta gwaleél, bihheero a miíta gwaleél, nee tlenángw gawa a miíta tsiyáhh nee tlaqi.

² Inós tlahhsár ma'aay gari tleéhh ar tlehhmuú gangeei, sawemaá baraywo a miíta tsár nee gár niina, intlaxweemaawo a miíta tsiyáhh nee tlaqi, harweeramooro a miíta mibaá nee tám nee tlaqi.

³ Dír tlahhsaadae guruú tsee/a kuna harweér ar slaqsa'aá awe awa ta parootuús, kiri tleéhh ar hha'aá tsár, kokoo i gawaá daanduú kuqá', slaqsi'iidaá awe kiri tlahhsaadá' hara tleéhh.

⁴ Tlahhsadá' kana iwitiís gawaá slaqsa'aá aweedá' awa mibaá nee tsár. Awér tám sager'ín a /iya, ar tám sager'ín a /uwa, ar tám sager'ín a basa, nee ar tám sager'ín da/aáw.

⁵ Kaankír tlahhsa uraywo a sentimiíta faanqw nee tlaqi. Adór afkós kura tleéhh a adór afkú slooqáy, a adór /ayito'o. Tlahhsaadá' ma'aá kar dalaa/i a liíta kume mibeeri lahhoó'.

⁶ Iimpedaá mibaangw awa hamtlo giri tleéhh, awa kooán kay qaás bihhaá /iya awa do'odá', awa kooán kay qaás bihhaá basa awa do'odá'. Kina qaás as muruuduú ilahhooár da/a/aangw kuwa baraadá' i hamtliti. Ala tlahhsadá' ur ar hamtlór kaahamuusér Mungú.

⁷ Kiteeraá tsaa'aso awa mibaangw giri tleéhh ar sahaábu adoodá' aáng kara oó', giri qaás baraá matla/ángw Doó Mungú, awa kooán kina qaás bihhaá doó /iyáy, awa kooán kina qaás bihhaá doó basáy.

⁸ Meesadaá mibaangw giri tleéhh, giri qaás baraá matla/ángw doó Mungú, awa kooán bihhaá doó /iyáy, nee awa kooán bihhaá doó basáy. Naagáy iimpedaá tsiiru awa sahaábu giri tleéhh.

⁹ Afeenír kaahamuuse gari tleéhh ar baraá guruú doó haar, afeenír ur gari tleéhh guruú tsee/a, afe gari tleéhh gari niinkiriíts ar muqslár sirda/aten.

¹⁰ Tlahhsadár ma'aay gari qaás baraá qul/idár da/ár albasa baraá do'o.

¹¹ Huramu sleeme hutli'i nee beleshi, nee iimpuwo giri tleéhh. Huramu gadiyeédár Doó Mungú tidá' sleémeero aa tleéhh dír waawutmo Solomon gari hhe'eés.

¹² Gár aa hhe'eés a uheemi tsár, nee slooqi'i, nee muqslidá' tsiirihh tidá' taa slooqi'iidár tuuntuúk, kudá' taa slam'ií qaás gawa sagér uheemi,

¹³ nee slaqsa'aa mamaá komamaánga awa tsiire tsiyáhh awa ta qaás gawaá muqsladá' tsiiriihh tsár. Umuúqo hha'aá tsár awa mamaá komamaánga gina tleéhh gawaá umuúqo muqslidá' tsiiriihha, as slooqi'iidá' tsár awa slam'i kudaá sagér uheemidá' kiwa parootuusi.

¹⁴ Inós kiteeraá iwitanangw gay tleéhh nee iimpu gay tleéhh gawaá kiteeridá'.

¹⁵ Tlahhsár wák gay iwitiís gawaá aweedá' mibaá nee tsár taa tleéhh.

¹⁶ Hutli'i nee beleshi nee muqslír sihhna tám nee xooslár hatlá' sleémeero ar doó AAKOÓ MUNGÚ tidá' Huramu-abi aa tleéhh dír Solomon, xosluuká' gár kira tleéhh a muqslár sirda/aten, giri mitshhayeemiís.

¹⁷ Muruuwí sleémeero dír waawutmo nguwa tleéhh a baraá xatstá Yordani, didá' tleei i diri' tla/ángw Sukoti nee Sereda.

¹⁸ Qoomoó muqslár da/aten oo xooslaarí kara tleéhh i xu'utitiiká, asma Solomon xooslaá yaariir gina tleéhh.

¹⁹ Naagáy Solomon xooslaarí sleémeero ar doó Mungú gana tleéhh: Kitángw ilahhooa guri tleéhh ar sahaábu, nee sleeme meésár ta mikaátér Mungú i qamin.

²⁰ Nee kiteeraá tsaa'aso gina tleéhh ar sahaábuú hhohhó', nee tsaa'asoro as didá' ak ló'wa hhoohhoo' ngiwa i gwa/at ar adoodá' kara oó'.

²¹ Nee /ayo nee tsaa'aso nee muqslár gil'o ohiingw, muruuwí sleémeero kuna tleéhh ar sahaábuú ló'wa hhohhó'.

²² Nee makasaay, nee iimpu nee isangaaoó ta mooyángw i da/aa/an nee xooslár ta ásltár loohisi, xosluuká' sleémeero kina tleéhh ar sahaábu. Afkuduú didá' ló'wa ak hhoohhoo', nee oo didá' hhoohhooe ar doó Mungú, afeerí kana tleéhh ar sahaábuú hhohhó'.