2 QOM'I 36 - Biblía Axweesantá Hhohho' ar Mungú 2004

Waawutmo Yehoahasi oo Yuda

¹ Múk Yuda Yehoahasi garmoó Yosia nguri waawutmoó wa qaasiyé' kitángw baabuúwós wa ale baraá Yerusalemuro.

² Yehoahasi waawuti'iima ngiwa iimu/ún kureeriiwós a mibeeri tsár nee tám. Ina baraá Yerusalemúr wa waawuti'ii'ín slahheeri tám.

³ Aluuwo Yehoahasi kuri hingeés nee waawutmoó Misri baraá Yerusalemu, múk yaamaá Yuda ohme gari bu'ún dír waawutmoó Misri. Ohmér ta haniís a kílo kume tám nee tsiire tsiyáhh ar peésa, nee kílo mibeeri tám nee tsiyáhh ar sahaábu.

⁴ Naagáy waawutmoó Misri Eliakimu hhiyoó Yehoahasi guri qaás kitángw Yehoahasi wa ale, iwa waawuti'in baraá Yuda nee Yerusalemúr wa ale, guri uma warqeés, guri báy Yehoyakimu. Yehoahasi kuri ar tláy yaamaá Misri nee waawutmo Neko.

Waawutmo Yehoyakimu oo Yuda

⁵ Yehoyakimu waawuti'iima ngiwa iimu/ún kureeriiwós a mibeeri tsár nee kooán, ina baraá Yerusalemúr wa waawuti'ín kureeri mibaá nee wak. Inós tlehhma'aá tlakw gina tleéhh dír geeraá AAKOÓ MUNGÚ, Munguúwose.

⁶ Waawutmo Nebukadnesa oo Babuloni guri i haratláy, guri tseék ar piíngu, guri huúw Babuloni.

⁷ Nebukadnesa sleeme xooslár Doó AAKOÓ MUNGÚ gana bahh ar tláy ay yaamaá Babuloni, gari qaás baraá do'ós oo waawuti'iima kuduú Babuloni.

⁸ Tlehhma'aá hatlá' awa naa meetiye' awa Yehoyakimu aa tlehhiít, dinkwa nee muruudá' slasla/arén aa tlehhiiti, kaa gooín baraá kitaábuú waawituú Israeli nee oo Yuda. Garmaawós Yehoyakini iri waawuti'ín kitaangós wa ale.

Waawutmo Yehoyakini oo Yuda

⁹ Yehoyakini waawuti'iima ngiwa iimu/ún kureeriiwós a dakaát Ina baraá Yerusalemúr wa waawuti'ín slahheeri tam nee deelo mibaangw. Inós tlehhma'aá tlakw gina tleéhh dír geeraá AAKOÓ MUNGUHE.

¹⁰ Alaá kurkú wák iwa waaraáhh waawutmo Nebukadnesa mukós guna ya/aáw Yehoyakini kuwa huwi baraá yaamaá Babuloni dinkwa nee xosluudá' tlaxo uren ar Doó AAKOÓ MUNGÚ. Sedekia hhiyoó Yehoyakini guri waawutmoó Yuda nee oo Yerusalemúr wa qaás.

Waawutmo Sedekia oo Yuda

¹¹ Sedekia waawuti'iima ngiwa iimu/ún kureeriiwós a mibeeri tsár nee wák, ina baraá Yerusalemúr wa waawuti'ín kureeri mibaá nee wak.

¹² Tlehhma'aá tlakw gina tleéhh geeraá AAKOÓ MUNGÚ, Munguúwose, tam inós taa niinaweesiiká dír geeraá aarusmo Yeremia, kudá' axweesantá AAKOÓ MUNGÚ gaa dirós i kah.

Gixsár Yerusalemu kawa daáhh

¹³ Sedekia kángw waawutmo Nebukadnesa axaasaro guri sií' tam Nebukadnesa Sedekia ngwa lo'ór /aymisi ar baraá umuú Mungú as tidá' Nebukadnesa i ooi mingiwa sií'. Inós da/eewawós giri gawdeés, tam guruuwós guri tlaa/árí dahaás as miwa kií/ amór AAKOÓ MUNGÚ, Munguú Israeli.

¹⁴ Tam kaahamuusér Mungú tidá' uren sleémeero nee muu sleémeero, niri inkihhimu wasleesiyé', asma tlehhmi'iidá' ta waki awa xoordaá hatlá' ngina eehariyé', tam doó Mungú nguri meetagaasiyé', kudá' inósuú kilá' aa hhoohhooeés oo baraá Yerusalemu.

¹⁵ AAKOÓ MUNGÚ, Munguú baabi'ii'ín, umuú daqto ya/abuuseerós gana amor'ín i ya/abiít, asma mukós nguwa gurtlay nee didár hootawose.

¹⁶ Ala inooín tana kumiít ya/abuuseedá' Mungú aa ya/abiít ngiwa niqina', nee axweesantós ngiwa siaasi'iya', nee aaruuseerós ngiwa waaqaseesena'. AAKOÓ MUNGÚ mukós guri ló'wa i buúhh, tam adór ni kotsqotiya' iri qwát.

¹⁷ Gawaá adoorihe, AAKOÓ MUNGÚ waawutmoó Kaldayo guri amor'ín i tleés. Inós masoombar'ín gari tsuú/ baraá guruú dooín kudá' hhoohhoó' i aleeró, slám hee tumu wák oo taa gurtláy i kaahh, tam dasi laqaá garma, laqaá heé aa din, laqaá oo liitlakusmo. AAKOÓ MUNGÚ muu sleémeero guna haniís gawaá dabaá waawutmoó múk Kaldayo.

¹⁸ Xoosla sleémeero ar uren nee ar ninakwe ar doó Mungú, nee daqaari'iimár Doó AAKOÓ MUNGUHE, nee daqaari'iimár waawutmoowo, nee daqaari'iimár geeraharuuseero, sleémeero gari huúw ay yaamaá Babuloni.

¹⁹ Doó Mungú guri daá/, koo/ír Yerusalemu gari feé/, maraá waawuti'iima giri daá/ nee xoosla sleémeero ar tlaxo gawden gari hhaamiís.

²⁰ Mukdaádá' sleémeero aa /uy tsu/utaaro guri ar tláy ay Babuloni, guri lawaaleerós tleéhh nee lawaalér daaqaywós ay qoomár waawuti'iimár Persia iwa iimu/uún.

²¹ Adoorihe axweesantá AAKOÓ MUNGÚ tidá' aa oó' ar loohír aarusmo Yeremia iri bó/, tidá' kah, «Yaamaá i hootiya' i tawo iwiitiyá', ki doosliiká ay kureeri mibeeri faanqw, ar adoodá' kureeraá Sabaáto awa taa boo/eesiiká.»

Koreshi múk Yahudi nguwa watlís

²² Kurkú geera oo waawuti'iimár Koreshiwo waawutmoó yaamaá Persia as axweesantadá' AAKOÓ MUNGÚ aa oó' ar afkú aarusmo Yeremia iwa bo/, AAKOÓ MUNGÚ muunuú waawutmo Koreshi oo Persia guri gwarangwaár, inós afo gari ilahaniís baraá waawuti'iimarós sleémeero, barwiito'o gari gooín sleeme, iwa kaahi,

²³ «Waawutmo Koreshi oo Persia i kaahi, ‹AAKOÓ MUNGÚ, Munguú doori, waawuti'iima sleémeero ar yaamu ngaa aníngií haniís, nee aníng iga ádbáy do'ós kuduú baraá Yerusalemu tidár yaamaá Yuda nguwa tleehh. Umuúqo heewo kuduú kós baraá tla/angwhunge, masók AAKOÓ MUNGÚ Munguúwós i dinkwa nee inós, nee i watli.› »