2 QOM'I 35 - Biblía Axweesantá Hhohho' ar Mungú 2004

Yosia Deelór Pasaáka ngiwa tleéhh

¹ Waawutmo Yosia deelór Pasaáka gana tleéhh baraá gixsár Yerusalemúr wa ale. Deelmoó bee/i oo Pasaáka guri gaás bál slahhángw geera tawa mibaá nee tsiyáhh.

² Inós kaahamuusér Mungú gari qaás baraá gadiyeédá' kis hariím baraá doó AAKOÓ MUNGUHE, giri i axweés iwa mune hhe'eesiya', nee gadiyér'ín ngiwa tleehhiya' ar adór qoom.

³ Inós múk Laáwi kudá' taa paraátl baraá múk Israeliro as intsaahhatimisuú daanduú AAKOÓ MUNGÚ, guri báy, «Sandakmoó alqado, kudá' Solomon garmoó Daudi aa do' i tleéhh, kuungá' gár kus loohisa' i káhh, hamí daxta AAKOÓ Munguúhúng sagadiyusaak nee mukós oo Israeliro.

⁴ Ti amohhe'ese' gadiyerhúng kawa tlehha' ar baalaaqaasi, ar adoodár gur'ér tlahh'aá baabi'iihúng, nee ar adoodá' waawutmo Daudi oo Israeli nee garmaawós Solomon ngira gan'aasiyé'.

⁵ Sihhiité' sleeme didá' hhoohhoo' as daanduú hhaeehúng kudá' gadiyér kaahamusi'iimár tleehha'aaká, nee umuúqo heewo i sihhiiti as daanduú umuú do'o oo tlahhoó Laáwi.

⁶ Deelmoó bee/i oo Pasaáka gaasaak, ti hhoohhooese', nee hhaeehunge, as tiwa amohhe'eesá'. Adoorí tleehhaak ar adoodá' AAKOÓ MUNGÚ ngira oó' ar loohír Mose.»

⁷ Waawutmo Yosia muu guri deeloó bee/aangw nee oo aaraawo guna haniís, as tawa ilahhooár deelór Pasaáka, dinkwaaro a kume mibeeri tám, nee awe kume tám. Muruuwí sleémeero kunguna doó waawutmoó wa haniís.

⁸ Geeraharuuse sleeme ilahhooar'ín gay hanís ar sla'aari, dír muu nee kaahamuusér Mungú, nee dír múk tlahhoó Laáwi. Mukdaádá' urén, Hilkia nee Sekaria nee Yehieli muruuwí ngway haniisiyé' dír kaahamuusér Mungú as tawa ilahhooár deelór Pasaáka. Muruú taa haniís a deeloó bee/aangw nee oo aarawo a kume tsár nee tsiire lahhoó', nee awe tsiire tám.

⁹ Geeraharuusér tlahhoó Laáwi a ín Konania nee hhaeewós, Shemaya nee Netaneli, dinkwa nee Hashabia, nee Yeieli nee Yosabadi, inooín sleeme deeloó bee/aangw nee oo aarawo oo kume kooán nee awér tsiire kooán kana haniís dír tlahhoó Laáwi as daanduú ilahhooár deelór Pasaáka.

¹⁰ Alaá deelór Pasaáka amoohhe'eesaro kawa hhe'eés, kaahamuusér Mungú tari sihhiít kitangw'ín i aleeró, múk Laáwi tana baalaqaasir'ín áy adoodá' hara'ayár waawutmo i kat.

¹¹ Inooín deelmoó deelór Pasaáka kuri gaás, kaahamuuse tseere gari tsiririxiimís. Tseereedá' ngina ilaoohiyé' dír tlahhoó Laáwi wa alé kudá' kaahari nga daqiye'.

¹² Inooín ilahhooár da/a kari partliít ar adoodá' maraá baaba'aá múk hatlá' ii dirii'iyá', as ngiwa AAKOÓ MUNGÚ i haniisiya' ar adoodá' kara gooín baraá kitaábuú Mosewo. Tam awe sleeme kana adoorí /iís.

¹³ Deelmoodá' ta gaás as deelór Pasaáka kuri daá/ baraá asla, adoodá' kara oó'. Fu'unaay bahh'alé kina humín baraá hutl'i, nee baraá safuryadu, nee baraá xooslmoó garangariingw, kari gaanslár haniís dír mukdaádú hatlá'.

¹⁴ Alaá tí sleémeero múk Laáwi fu'unay'ín giri amoohhe'eés, as inooín nee kaahamuusér Mungú tidár tlahhoó Aroni, asma kaahamuusér Mungú pa/aangw gwa sleeriiká ay xweera, as gadiyér ur ar ilahhooa da/a/aangw, nee di/tadá' ta da/aa/án.

¹⁵ Daauusér tlahhoó Asafu tina amoohhe'eesiyé' adoodá' aáng waawutmo Daudi ngira oó', nee Asafuwo, nee Hemani nee Yedutuni kuduú iigu'utusmoó waawutmo. Xuumuuse tidár afkú Doó Mungú dir'ín tidár xuumar'ín ngaa geexay'iiká, asma hhaeeín awa tlahhoó Laáwi i deeloodár Pasaákuú amoohhe'eemisiyá'.

¹⁶ Gawaá adoorihe gadiyeérír amoohhe'eemisuú Pasaákuú AAKOÓ MUNGÚ kari hhe'eés, ilahhooár da/a kari haniís gawaá kitangwduú ilahhooa oo AAKOÓ MUNGÚ, adoodá' waawutmo Yosia ngira oó'.

¹⁷ Múk yaariír deeloorír Pasaáka gari boo/eés, nee deelór mikaátedá' ta sluftisiiká kari tleéhh deelo faanqw.

¹⁸ Deelór Pasaáka ar ur ar adór tí kaa baloó /ayiiká baraá Israeliro iimír aarusmo Samueliwo. Waawutmo tumu wák i kaahh oo deelór Pasaáka gaa tleehh adór waawutmo Yosia wa aleeró, dinkwa nee kaahamuusér Mungú nee múk Laáwi nee múk Yuda sleémeero, nee múk Israeli nee yaamuloouusér Yerusalemuro.

¹⁹ Deeloorír Pasaáka kawa tleéhh a kurkú mibaá nee dakaát oo waawuti'iimár waawutmo Yosia.

Alhhe'eesoó waawuti'iimár Yosia

²⁰ Alaá tí sleémeero, qoomár waawutmo Yosia doó Mungú nguwa hhe'eés tleehhamooro, Neko, waawutmoó yaamaá Misri, nina hardáh nee slaqwaruuseerose as iwa haratlay Karkemishi, didár yaaér Eufrate. Waawutmo Yosia adoorí ngiwa axaás, guri i haratláy.

²¹ Waawutmo Neko afo gana ya/aáw iwa kaahi, «Kuúng waawutmoó Yuda, aníng nee kuúng a slaqwanaaká. Aníng an slaqwaán nee wakuuser'eé', Mungú iga ádbáy niwa gaansluut. A xáy, Mungú mu tlampa'aamisaar asma i bartaeéií dirii', gám bar adooriheeká inós u hhaamiis.»

²² Ala waawutmo Yosia /aymi'iiká' waawutmo Neko awa amór Mungú dahhá' gaa iiárií qaasiiká, inós tiri warqeés as mukuwa tsaáhh, iri dáhh baraá tla/ángw slaqwaruuse, dír xatstá Megido.

²³ Qoomár tawa slaqwi, waawutmo Yosia kuri sláy nee mahángw heé Misri, sagadiyuuserós gari báy, «Aníng surkusaaré' diirihe, án taa hariiáy.»

²⁴ Inooín ngway hingeesiyé' gawaá gaáriirose, ngway tsa/aasiyé' gawaá gaáriirós ar tsár. Ngway huwiyé' Yerusalemu, iri amodií gwaá'. Kuri foól baraá /antaá baabi'iiwós. Múk Yuda sleémeero tari tsuunqumiís.

²⁵ Aarusmo Yeremia daa'ángw tsuunqumis gway daá' as daanduú waawutmo Yosia. Daauusér hhawaate nee /ameenaaro sleeme Yosia kuna satsuunqumiís ar daa'aangw ay laarí. Adoorí iri dawa tleehhít baraá Israeliro. Daa'angwí dír kway gooín a baraá kitaábuú tsuunqumis.

²⁶ Muruú hatlá' oo Yosia aa tleéhh nee tlehhmi'iiwós kudá' ganaa'á' ti slayá' nee kangwdá' taa gooín baraá kitaábuú dabér AAKOÓ MUNGÚ.

²⁷ Tlehhmi'iiwós awa iimu/uungw ay alhhe'eesaay sleémeero kaa gooín baraá kitaábuú waawituú Israeli nee oo Yudawo.