2 QOM'I 34 - Biblía Axweesantá Hhohho' ar Mungú 2004

Waawutmo Yosia oo Yuda

¹ Waawutmo Yosia waawuti'iimár Yuda ngiwa iimu/ún kureeriiwós a dakaát, ina waawuti'ín baraá Yerusalemúr wa alé, kureeri mibeeri tám nee wak.

² Inós geeraá AAKOÓ MUNGUHE adór ganaa' gana tleéhh, inós loohír waawutmo Daudi gana óh, sleeme aa baloó bihhaá xuiiká.

Gilaá Yosia as munguaá hatlá' kiwa sluufmiisi

³ Kurkú dakaát baraá waawuti'iimarose, qoomaadae inós a masoomoó niiná, inós Munguú baabuúwós Daudi guna leeleéhh ar muunaáwós sleémeero. Kurkú mibaá nee tsare wa/aameedár gawaá gongoama' ar munguaá hatlá' kiwa sluufmiisi gana iimu/ún hingeemisuwo, nee slaqsi'iidaá Ashera, nee kudá' taa hhasliít, nee kudá' taa kwahhuuti.

⁴ Kiteeridá' ta ilahhooa hanmaamisi dír Ba'ali kina dír geeraawós wa daraáhh, kiteeridá' taa gáwtí tleereés ta mooyángw i da/aa/an inós gina sií'. Munguúdá' ta bay Ashera kuri naasúy, nee slaqsa'aá hatlá' kudá' taa hhasliít nee awa taa kwahhuuti, teeridá' gari kwahhtá áy gawaá /antaá mukdá' aáng slaqsi'iiká' gaa sluufmaamiis.

⁵ Fadaá kaahamuusér munguiidá' giri dá/ gawaá kiteeriidá' ta ilahhooárií hanmaamisi dír munguaá hatlá'. Gawaá adoorihe yaamaá Yuda nee awa Yerusalemu gina hhoohhooeés.

⁶ Adoorí gana tleéhh sleeme baraá gixsadaá yaamaá Manasewo nee awa Efraimu, nee awa Simeonuwo, ay yaamaá Naftaliwo, nee baraá sluhhayduú wa/ameedá' i tsewén.

⁷ Kiteeridá' awa munguúdá' ta bay Ashera gina naasúy, munguiidaá hatlá' gina teeri tleéhh. Sleeme kiteeridaá mooyángw tsuú' kuy da/aa/an baraá yaamaá Israeliro gina hingeés. Aluuwo iri kií/ Yerusalemu.

Kitaábuú dabe kuwa sláy

⁸ Kurkú mibaá nee dakaát baraá waawuti'iimaro, alaá yaamu ngiwa hhohhoeés, nee doó Munguhe, waawutmo Yosia muu tám guri ya/aáw doó AAKOÓ MUNGÚ, Munguúwós, kuwa iisluki. Mukdá' a Shafani garmoó Asalia, nee Ma'aseya ga/aawusmoó gixsa, nee Yoa garmoó Yoahasi kuduú goousmo.

⁹ Inooín niri hardihiyé' dír Hilkia kaahamusmoó úr, peésaadá' tinda huúw baraá doó Mungú ngiri dirós i haniisiyé', tidá' tinda burumbuúr nee múk tlahhoó Laáwi nee kudá' afkú doó ga/áw, tidá' tinda huúw amór tlahhoo Efraimu wa ale, nee oo Manase, nee bihhér hatlá' sleémeero ar yaamaá Israeli, nee yaamaá Yuda sleémeero nee awa Benyamini, nee amór yaamuloouusér Yerusalemu sleeme.

¹⁰ Peésaadá' kari haniís dír mukdá' doó AAKOÓ MUNGÚ gwa sagesihiit qoomár kuwa iislukun, nee dír mukdá' aa gadiyuus baraá doó Mungú wa ale, as do' kuwa iislukun nee kuwa /abeemisi.

¹¹ Kari haniís dír mukdá' peehhoó hhasliít as kawa tlaa/er tlaxwi, nee peehhoó ta dinkwárí slahhan, nee uheemaá oohi kudá' ta do'odár tleehhi, doo'odá' waawituú Yuda aa máy iri fee/amiít.

¹² Muu gadiyeérí gana tlehhiít ar inkihhimu. Múk tlahhoó Laáwi oo geeraharuusér mukwí oo taa qaás a kwí: Yahati nee Obadia awa guruú doó Merari, dinkwa nee Sekaria nee Meshulamu kudaá guruú doo Kohati. Múk tlahhoó Laáwi oo hatlá' xooslaá daa'aangw slahhto ki ló'wa xuu'.

¹³ Múk tlahhoó Laáwi múk huwaá loohís nguna sagesihhmiitiyé', nee kudá' gadiyedaá dimbadiimbé ngi tlehhiitá' nguna geeraharahariyé', bahh'ale a goouuse, nee kookaariya' a xuumuusér afér gixsa.

¹⁴ Qoomár inooín peésaadá' tinda huúw baraá Doó Mungú kingiwa duxun, kaahamusmoó Mungú Hilkia kitaábuú dabér AAKOÓ MUNGÚ tidá' aa haniís ar dákw Mose, gway sláy baraá doó AAKOÓ MUNGÚ wa ale.

¹⁵ Hilkia goousmo Shafani guri báy, «Kitaábuú dabe ugwa sláw baraá Doó AAKOÓ MUNGÚ wa ale.» Kitaábuúdá' gway haniís dír Shafani.

¹⁶ Shafani kitaábuudá' gway huúw dír waawutmo, nee kángw gadiyeé guri káh sleeme iwa kaahi, «Sagadiyuuserók tidá' sleémeero kaa beér ngi tlehhiitiyá'.

¹⁷ Inooín peésaadá' taa sláy baraá Doó Mungú wa ale, kaa haniís dír mukdá' gadiyér sagesihhimiít nee dír kudá' gadiyuús.»

¹⁸ Goousmo Shafani iri malé oó', «Hilkia kaahamusmoó Mungú kitaábuuko ngwa haniís.» Aluuwo Shafani kitaábuudá' gway soomuús dír waawutmo.

¹⁹ Qoomár waawutmo /ayma'aá kitaábuuduú dabe ngiwa axaás, tlabaawós gay feehhamiís.

²⁰ Aluuwo waawutmo Yosia Hilkia nee Ahikamu garmoó Shafani, nee Abdoni garmoó Mika, nee goousmoó Shafani, nee Asaya sagadiyusmoó waawutmo, giri báy,

²¹ «Tlawsé', AAKOÓ MUNGÚ yaahasaare' as aníng, nee as mukwí aa meet baraá Israeliro nee Yudawo, daanduú axweesanoó baraá kitaábuú dabe taa sláy, asma AAKOÓ MUNGÚ aa daa/atúy buhhtaawo as atén, asma baabi'iirén axweesantós ngaa ya/ani'iiká ar adoodá' ir qoon kara gooín baraá kitaábuuwí.»

²² Hilkia nee mukduú hatlá' waawutmo aa ya/aáw tari tláy dír aaruso'o Hulda, harér Shalumu garmoó Tokhati, garmoó Hasra, kudá' tlabaá amohhe'eemaamiís, (inós Yerusalemuro do'ós i baraá hháw tsár). Kangwdá' aa tleehharuumiit kuri dirós i oó'.

²³ Inooín giri beér, «Adoorí an adór AAKOÓ MUNGÚ, Munguú Israeli i kaahi, heesíng kuungá' naa amor'eénií ya/aaw ku beera',

²⁴ AAKOÓ MUNGÚ i kaahi, ‹Qaytsiít, aníng amotlakwe ngi huúw baraá Yerusalemu nee dír múk baraadá' hoót, daanduú axweesanaydá' sleémeero oo lo'o, kudá' taa gooín baraá kitaábuudá' taa soomuús dír waawutmoó Yuda.

²⁵ Asma aníng ina geexayé', munguaá hatlá' ngay mooyángw tsuú' i da/iyé', aníng iga buhhtisiyé' daanduú gadiyedá' naa dabaaín ar tleehhii'i. Gawaá adoorihe aníng yaamuuká' i ii daa/atúw buhhtawo, heé i har'óh i kaahh.›

²⁶ Ala daanduú waawutmoó Yudawo, kudá' kuungá' na ya/aaw amór AAKOÓ MUNGÚ i ale, ku beera', ‹Adoorí an adoodá' AAKOÓ MUNGÚ, Munguú Israeli, i kaahi daanduú axweesantadá' taa axasi.

²⁷ Asma kuúng muunaáwók kuwa hhoó' nee tiri niinawés dír geeraaeé', nee tlabaawók kiri feehhamís, nee tari /aa/amiín, qoomár axweesanay'eé' kuwa axás daanduú yaamuukae, nee daanduú yaamuloouuser'ine, tiri niinawés dír geeraaeé'. Anuú AAKOÓ MUNGÚ kuúg ugwa axaás.

²⁸ Ga/aawek kuúng bar aga gwá', tun foól ar wayda, tari haraagwá' amór baabi'iiwók, slahh'amuuwí ni huuw baraá yaamuuká' nee dír yaamuuloouuseerós ilaawók ngu ariiaaká.› » Naagáy mukdá' taa ya/aáw kaangwí nguri ki/ís amór waawutmo Yosia.

Yosia adór Alqadór Mungú ngir iialooeemisi ngiwa oó'

²⁹ Waawutmo Yosia bariisér Yuda nee ar Yerusalemu gari i ya/abín, tari burumburiít.

³⁰ Waawutmo dinkwa nee muu sleémeero oo Yuda nee oo Yerusalemu nee kaahamuusér Mungú, nee múk tlahhoó Laáwi nee na/ii nee múk urene tari tsa/án amór Doó AAKOÓ MUNGÚ. Waawutmo axweesanoó kitaábuuduú alqado taa sláy baraá Doó AAKOÓ MUNGÚ wa ale, guri soomuús dir'íní aleeró.

³¹ Waawutmo iri dirós tidá' i sihhiít, alqado gari oó' ar AAKOÓ MUNGÚ nguwa eehari nee hara'ayaarós, nee tidá' aa ooi nee kaahirose ngiwa oohi ar muunaáwós sleémeero nee ar qeeruuwós sleémeero, nee axweesanay sleémeero kudá' taa gooín baraá kitaábuuduú alqado nguwa boo/eesi.

³² Waawutmo múk Yerusalemu nee oo Benyamini sleémeero guri /uurutís baraá alqadoodií ale. Inooín tari hoót ar adoodá' alqadór AAKOÓ MUNGÚ, Munguú baabi'ii'ín i kat.

³³ Waawutmo Yosia slaqsi'iidá' sleémeero ta waki giri hingeés baraá yaamuudá' sleémeero awa aalír Israeli sleémeero, múk Israeli guri /uurutís AAKOÓ MUNGÚ, Munguúín, nguwa sagadiyuusiya' nee nguwa sluufmisiya'. Deelo sleémeero ar Yosia iwa slafi inooín AAKOÓ MUNGÚ, Munguú baabi'ii'ín, ngwaa baloó geexay'iiká.