2 QOM'I 33 - Biblía Axweesantá Hhohho' ar Mungú 2004

Waawutmo Manase oo Yuda

¹ Waawutmo Manase waawuti'iima ngiwa iimu/ún kureeriiwós a mibaá nee tsár, ina baraá Yerusalemúr wa waawti'ín kureeri mibeeri kooán nee kooán.

² Inós tlehhma'aá tlakw gina tleéhh dír geeraá AAKOÓ MUNGUHE, tlehhmi'iidá' ta waki, awa adór kudaá mukdá' AAKOÓ MUNGÚ aa guús geeraá múk Israeli wa ale.

³ Wa/aamedár gawaá gongoama' ar munguaá hatlá' kiwa sluufmaamisi gana male tleéhh, kudá' aáng baabuúwós Hesekia aa feé/, kiteeraá ilahhooa giri tleéhh awa munguaá Ba'ali, nee awa munguúdá' ta bay Ashera. A tí kiloseká, inós sleeme tsatse/uú gawaá doori guna sluufmiís, guri sagadiyuús.

⁴ Inós kiteeraá munguaá hatlá' kiwa ilahhooárií hanmiisi gina tleéhh baraá Doó AAKOÓ MUNGÚ, didá' AAKOÓ MUNGÚ iwa oó', «Baraá Yerusalemu an dír umuueé' kuwa ateetin ay alhhe'eesay wasle.»

⁵ Kiteeraá ilahhooa kawa hanmiisi dír tsatse/ sleémeero gina tleéhh baraá afeenaadá' tsár ar Doó AAKOÓ MUNGÚ.

⁶ Daaqaywós sleeme guna ilahhooár da/tá wa hanmiís baraá xatstá garmoó Hinomu wa ale. Tlaa/e gina xuú', iigu'utu guna leelehiít, muruuduú taami ohiingw guna tsegiít, sleeme tana aldinku'umiís nee mukdá' giaá duxuúm nee da/aluuse. Inós tlakweemaá yaariir gina tleéhh dír geeraá AAKOÓ MUNGUHE, Mungú guri buhhtís.

⁷ Slaqsaydá' aa tleéhh guna qaás baraá Doó AAKOÓ MUNGÚ, didá' Daudi nee garmaawós Solomon Mungú ngiwa báy, «Baraá do'owihe nee baraakaá Yerusalemuro, diirí ana tsawaár baraá tlahh'iikaá mibaá nee tsár awa Israeliro tawa dír aníng tiwa sluufmiisi ay alhhe'eesay wasle.

⁸ Barnaxes múk Israeli adoodá' aníng naa oó', gaa tleéhh, nee iri iia looeés baraá dabe sleémeero, nee tidá' taa oó', nee tidá' ngaa bawi, tidá' naa haniís ar dákw Mose, aníng i baloó gusaaká baraá yaamuuká naa baabi'ii'ín i haniisi.»

⁹ Ala Manase muk Yuda nee oo Yerusalemu guna baraá tlakweemáy dahaás, tlakweema ngina tleehhiyé' ta kudaá xoordaá hatlá' ba/a, kudá' AAKOÓ MUNGÚ aa hhaamiís geeraa múk Israelír wa ale.

Hhu'uu'úngw Manase

¹⁰ AAKOÓ MUNGÚ Manase nee mukós gina naanaáq, ala inooín ngwa iiárií qaasi'iiká.

¹¹ Gawaá adoorihe, AAKOÓ MUNGÚ geeraharuusér waawutmoó Ashuru gana ya/aáw amór múk Yuda. Manase nguri oohiyé' gway daba' tseegiyé' ar piínguduú muqslár sirda/aten, nguri huwiyé' ay yaamaá Babuloni.

¹² Qoomár iwa baraádií dirii'i, AAKOÓ MUNGÚ guna ló'wa firín, tiri ló'wa niinaweés dír geeraá Munguú baabi'iiwose.

¹³ Mungú firoorós gari axaás, kunguri ki/ís Yerusalemu baraá waawuti'iimarós. Naagáy Manase gari tsaáhh adór AAKOÓ MUNGÚ tar Munguú ló'.

¹⁴ Alaá tihe Manase koo/ír hatlá' gari tleéhh daanduú tsee/aá gixsár Daudi wa ale, bihhaá /uwa awa Gihoni, baraá xatsa, nee gari alkón ay afkudá' ta bay Afkú Siyó, gari harweér ar Ofeli, koo/idá' gari ló'wa gáwtí tleés. Inós sleeme geeraharuusér slaqwaruuse gari qaás baraá umuú gixsadaá Yuda awa koo/ír gawít ngi koomá'.

¹⁵ Inós baraá Doó AAKOÓ MUNGUHE, munguiidaá hatlá' nee murslaaqatuuwo giri hingeés, dinkwa nee kiteeriidá' aa tleéhh gawaá tloomadár Doó AAKOÓ MUNGÚ, giri hingeés, nee baraá Yerusalemuro, giri kwaáhh tsee/aá gixsa.

¹⁶ Inós kitángw ilahhooa oo AAKOÓ MUNGÚ guri /abeés tleehharo, nee gawaawose ilahhooár muruú ta tsu/i nee ar wayda gari hanmiís. Múk Yuda guri báy, «AAKOÓ MUNGÚ Munguú Israeli sluufmisaak.»

¹⁷ Tam adoorihe, muu ina kumiít ilahhooár muruú ta tsu/i hanmisuuwo wa/aameedár gawaá gongoama' ar munguaá hatlá' kiwa sluufmaamisi, ala dír ngay hanmiisiya' a dír AAKOÓ MUNGÚ, Munguúín kilós.

Alhhe'eesoó waawuti'iimár Manase

¹⁸ Tlehhma'aá hatlá' awa Manase, nee firoodá' Mungú nguwa firín, nee axweesanaydá' iigu'utuuse aa aaiín dirós i ale ar umuú AAKOÓ MUNGÚ, Munguú Israeli, kwaa gooín baraá kitaábuú alki/ituú waawituú Israeli.

¹⁹ Firoorós nee adoodá' Mungú firoorós ngiwa ya/án, nee tlakweemaawós sleémeero, nee inkihhimu wasleerós, nee wa/aameedár gawaá gongoama' ar munguaá hatlá' kiwa sluufmiisi ar aa tleéhh, nee adoodá' munguúdá' ta bay Ashera ngura tleéhh, nee murslaaqatuudá' taa hhaásl qoomár inós tiwa niinaweesiiká, tí sleémeero ka gooín baraá inslaslángw iigu'utuuse.

²⁰ Naagáy Manase iri gwaá', kuri foól baraá do'ós, garmaawós Amoni iri waawuti'ín kitaangós wa ale.

Waawutmo Amoni oo Yuda

²¹ Amoni waawuti'iimár Yuda ngiwa iimu/ún kureeriiwós a mibeeri tsár nee tsár, ina waawuti'ín baraá Yerusalemuro kureeri tsár.

²² Inós muruú tlákw guna tleéhh dír geeraá AAKOÓ MUNGUHE, adoodá' baabuúwós Manase aa tleéhh, inós murslaaqataadá' sleémeero baabuúwós Manase aa tleéhh gina ilahhooár muruú ta tsu/ií hanmiís nee giri sagadiyuús.

²³ Inós taa niinaweesiiká dír AAKOÓ MUNGUHE, adoodá' baabuúwós Manase tira niinaweés, ala Amoniwí tlakweema tlehhtuuwo gina inkaakií/.

²⁴ Aluuwo sagadiyuuseerós guna fuquraángwár gás baraá doó waawuti'iimárií alé.

²⁵ Ala múk Yuda mukdaádá' Amoni gwa naaqo gaas kuri tsuú/, muu garmaawós Yosia guri qaás kitaangós wa ale.