2 QOM'I 32 - Biblía Axweesantá Hhohho' ar Mungú 2004

Múk Yerusalemu kuwa naáxw nee múk Ashuru

¹ Alaá muruuwí sleémeero oo inkihhimuú waawutmo Hesekia, waawutmo Senakeribu oo múk Ashuru yaamaá Yuda gina i haratláy. Iri tláy xafay gway tleéhh didár gixsadá' koo/i gawit, ngiwa xui yaamu gi kós tleehh.

² Qoomár waawutmo Hesekia ngiwa ár waawutmo Senakeribu naa hardáh as gixsár Yerusalemu ngiwa i haratlay,

³ inós nee geeraharuuse nee miguusér slaqwara nina al'axweesiyé', yau kudaá tsee/aá gixsa kiwa tseegi, inooín nguri ale/iisiyé'.

⁴ Múk yaariír kuri burumbuúr dinkwárí ale as yau sleémeero kiwa tseegi nee yauudá' naa baraá tla/angwdár waaraahhiye', tawa kaahi, «Ahaá, gár waawituú Ashuru birna hardáh ma'aá yaariir ngis slay?»

⁵ Waawutmo Hesekia koo/ír gixsadá' gari iisluúk, nee /aampu giri tleéhh. Guruú tsee/aawo koo/ír tsár gari tleéhh, nee didá' ta bay Milo gari ló'wa gawdeés baraá gixsár Daudiwo. Inós sleeme xooslaá slaqwara nee gaambaá yaariir giri tleéhh.

⁶ Muu sleémeero baraá gixsaro guri burumbuúr dír tseetsee/amtá afkú gixsa. Geeraharusmoó slaqwaruuse guri xuumusmooín wa qaás, muu guri i axweés tawa mune hhe'eesi, giri báy,

⁷ «Ilakaahareesé', mune hhe'eesé', ma da'ayuumitaara', nee ma amooqwaqwadimara' dír geeraá waawutmoó Ashuruwo, laqaá dír slaqwaruuseerós sleémeero, asma kuduú dinkwa nee atén ku úr ta kuduú dinkwa nee Senakeribu.

⁸ Inós /uuruú hee kilós gun kón, ala atén AAKOÓ MUNGÚ, Munguúrén, u koomaán, atén ti alee/iis, slamí tin aleeslaaqw.» /Aymi'iikaá waawutmo Hesekia muu nguna /uurií doogiyé'.

⁹ Alaá tihe waawutmo Senakeribu oo Ashuru, qoomár gixsár Lakishi ngiwa haraweel, sagadiyuuse gari ya/aáw Yerusalemu amór waawutmo Hesekia oo Yuda, nee dír muu sleémeero oo Yuda, kudá' baraá Yerusalemúrií dirií', tawa kaahi,

¹⁰ «Waawutmo Senakeribu oo Ashuru i kaahi, ‹Xáy gár taa harahhifé' a milá baraá gixsár Yerusalemu tí ta harweeri?

¹¹ Xáy, adoorihe Hesekia kuungá' nun tsu/utár wa slaiikáhe ar qwari nee waxe, nuwa babay, AAKOÓ MUNGÚ, Munguúhúng nu ba/amis dír waawutmoó Ashuruwo?

¹² Xáy, Hesekiadá' a kwiheekáhe oo wa/ameedár gawaá gongoama' Mungú kuwa sluufmiisi nee kiteeriwose gaa hingees, múk Yuda nee oo Yerusalemu guri báy, dír kitángw wák na wa sluufmisaak nee ilahhooarhúng ar muruú ta tsu/i ka gawaadií da/a/aandá'?

¹³ Xáy, a xua'aakáhe tidá' aníng nee baabi'iieene naa tleehhaán dír xoordu sleémeero awa ayeemaá hatlá'? Xáy, munguiidaá xoordaá ayeemoodá' sleémeero múk ayeemooín ngwaa aleeslayí'i tu/uto gawaá dabaaeene?

¹⁴ Xáy, baraá munguiidaá xoordaá hatlá' sleémeero, kudá' baabi'iieé' naa ló'wa hhaamisiyé', munguú mukós gwaa aleesláy ba/amisaro gawaá dabaaeene i deéro? Daqaní doóqa Munguúhúng kuungá' nu aleesláy ba/amisaro gawaá dabaaeene.

¹⁵ Gawaá adoorihe Hesekia mu aleeya/aa/amaara' nuwa al/agin, nee nuwa qwaareemisi ar axweesanaysíng, sleeme mu haratlintatiaara'. Asma mungú tumu xooro gaalá, laqaá tumu waawuti'iima gaalahe, oo mukós gwaa aleeslay ba/amisaro i kaahh gawaá dabaaeene, nee gawaá dabaá baabi'iieene. Ala an qo Munguúhúng kwisinge oo kuungá' nu ba/amís gawaá dabaaeene!› »

¹⁶ Geeraharuusér waawutmoó Ashuru /ayma'aá hatlá' tlakw kiri aaín daanduú AAKOÓ MUNGUHE, nee daanduú waawutmo Hesekiawo.

¹⁷ Waawutmoó Ashuru sleeme barwito'o gana gooín ar AAKOÓ MUNGÚ, Munguú Israeli, nguwa /oosliislín iwa kaahi, «Adoodá' munguaá xoordaá hatlá' muk'ín ngura harslaaqatiyé' ba/amisaro gawaá dabaeene, an adór Munguú Hesekia mukós ba/amisaro ngur aleeslayká gawaá dabaaeene.»

¹⁸ Sagadiyuuseedá' ina axwés ar tsifrír Ebrania nee ar tseeo dír múk Israeli, kuduú gawaá sagér koo/i, asma inooín nina tsabiné' kiwa dae tsati nee kiwa amoqwaareesi, as gixsa kawa adór inslaahhár hayoohi.

¹⁹ Inooín tari axweés daanduú Munguú Yerusalemuwo kwaáo an adór munguaá xoordaá hatlá', awa taa tleéhh ar dabaá muu.

²⁰ Waawutmo Hesekia nee aarusmo Isaya garmoó Amosi, Mungú nguna firiné' nee nguna i /aa/iyé' as ngiwa alee/iisi daanduú muruuwí sleémeerowo.

²¹ AAKOÓ MUNGÚ malaykamoowós guri ya/aáw, slaqwaruuseedár miguuse ar waawutmo Senakeribu, nee geeraharuuseero giri tsuú/, kudá' baraá xafáy diriiá'. Waawutmo iri waátl ayaawós i alé ar mure. Qoomár iwa dáh baraá doó munguúwós, kuri gaás nee daaqaywós oo kilá' ar paánga.

²² Naagáy AAKOÓ MUNGÚ waawutmo Hesekia guri ba/amís, nee yaamuloouusér Yerusalemu sleémeero, gawaá dabaá waawutmo Senakeribu oo Ashuru wa ale, nee gawaá dabaá wakuuser'ín sleémeerowo. Múk Yuda wayda gway ar hoót deelo sleémeerowo.

²³ Múk yaariír AAKOÓ MUNGÚ ngway sluufáy huúw baraá Yerusalemu, tam sleeme qeemuú yaariír kway huúw dír waawutmo Hesekia. Iimír qoomaadae waawutmo Hesekia kuri ló'wa xirfayeemiís nee xoordaá hatlá' sleémeero.

Tiqtír Hesekia nee daara/aangose

²⁴ Qoomaarihe Hesekia tiqti guri ót tsaxwaá iwa lak gwaai. AAKOÓ MUNGÚ guri firín, Mungú firoorós gay mu/aywaáts ar laya.

²⁵ Ala Hesekia AAKOÓ MUNGÚ gwa sluufáy hanisiiká daanduú tí sleémeerowo, asma muunaáwós ina haáts daara/aango. AAKOÓ MUNGÚ inós guri i buúhh, nee múk Yudawo, nee múk Yerusalemúr hoota.

²⁶ Aluuwo waawutmo Hesekia tiri niinaweés, inós nee múk Yerusalemuro, daara/aangós kudá' gway máy. Gawaá adoorihe AAKOÓ MUNGÚ inooín gaa malé i buhhiiká deeloodá' sleémeero ar Hesekia iwa slafi.

Daqaari'iima nee iia tleeruwár Hesekia

²⁷ Waawutmo Hesekia iri daqaari'iít, umuú heewo guri ilaiwawaá/. Inós daqaari'iimár peésa gana tleéhh, nee sahaábu, nee tlaa/aá tlaxo gawden, nee tlaa/aá hatlae, nee muruú ta muruú /aymaárár tsuu'umiisi, nee gaambu, nee xooslaá hatlá' awa tlaxo gawden.

²⁸ Sleeme inós maraá kuntoó balaangw kway babaatsi gay tleéhh, nee wa/ángw difaái nee di/ito kay batsi gay tleéhh. Slumaá hikwa nee awa bee/aango gay tleéhh.

²⁹ Sleeme gixsaduuwós giri tleéhh, inós hikwaá yaariir nee bee/aango gina sláy, asma Mungú inós guna tsuúq, guri daqaari'iimár yaariír i haniís.

³⁰ Waawutmo Hesekia yaaér Gihoni gana tseék, mapari gari foól ar ma'aay ngir baráy wa/asi ay gixsár Daudi. Hesekia umuú gár aa tleehhi gana aleesláy.

³¹ Múk Babuloni nguwa yaahaasár áy daanduú muruuduú waa/oo/amo aa tlehhiít baraá yaamuuwose, Mungú waawutmo Hesekia guna tawo máy, adoodá' inós i tleehhamór wa slai gay tleéhh, adoorí ina tleehharút as inós kuwa iiari.

Alhhe'eesoó waawuti'iimár Hesekia

³² Tlehhma'aá waawutmo Hesekia kudá' naa meetiye' kaa gooín baraá kitaábuú Iigu'utuú aarusmo Isaya garmoó Amosi, nee baraá kitaábuú waawituú Yuda nee oo Israeli.

³³ Waawutmo Hesekia iri gwaá', kuri foól baraá /antaá bihhaá gawa awa waawitá. Muu sleémeero oo Yuda nee oo Yerusalemu kuri ilaiwawaá/ dír gwa'ararose. Garmaawós Manase iri waawuti'ín kitaangós wa ale.