2 QOM'I 31 - Biblía Axweesantá Hhohho' ar Mungú 2004

Hesekia alhotaarír múk Mungú ngiwa qwatsin

¹ Deeloodá' ur ar Pasaáka iwa fák, múk Israeli sleémeero tari tláy baraá umuú gixsár Yudawo. Uheemidá' taa tlehhiít kiri feé/ kiri giqáy, munguúdá' ta bay Ashera kuri supín, wa/angwduú gawaá gongoamo' kudá' munguaá hatlá' kiwa sluufmaamisi kiri feé/. Inooín adoorí kana tleéhh baraá yaamaá Yuda nee awa Benyamini, nee Efraimu nee awa Manasewo sleeme. Tí kawa hhe'eés, umuú heewo iri waátl amór gixsarós nee dír aalirós.

² Waawutmo Hesekia kaahamuusér Mungú nee múk Laáwiwo giri malé qaás baraá gadiyeédí ale, as tawa gadiyuusi baraá Doó Mungú wa ale. Gadiyér ngi qasmiís a ilahhooa da/a/aangw, nee ilahhooár wayda hanmis, niwa gadiyuusiya' dír afkú heémár AAKOÓ MUNGÚ wa ale, nee xirfayeemis nee sluufaywo.

³ Waawutmo Hesekia daqaari'iimarós gana bahh haniís as tawa ilahhooár da/a ar matlaatle nee ar tsiindowo, nee tawa ilahhooár deelór Sabaáto nee ar bál slahhángw /abén, nee ar deelór uren, tidá' taa hara'ayín as AAKOÓ MUNGÚ, adoodá' kara gooín baraá kitaábuú dabér AAKOÓ MUNGÚ.

⁴ Waawutmo múk Yerusalemu guri malé ádbáy, daqaari'iimar'ín ngiwa bahh haniisiya' dír kaahamuusér Mungú nee múk tlahhoó Laáwi, as kahhó' inooín tiwa haniisiya' baraá gadiyér dabér AAKOÓ MUNGÚ.

⁵ Kaangwí múk Israeli nguwa axaás, daqaari'iimar'ín ngina ló'wa haniisiyé', bu'úngw geera, nee difaái, nee di/i, nee danú, nee muruú hatlá' oo ta hamaareés baraá qamuuín wa alé. Nee umuúqo gár wák baraá mibaango ar umuú gár i kona'a ngina huwiyé'.

⁶ Múk Israeli nee oo Yuda kudá' baraá gixsadaá Yuda hoót, gár wák baraá muruú mibaangw oo hikwa nee bee/aangw ngina huwiyé', kari paraátl as AAKOÓ MUNGÚ. Muuruuwí kuna qamín baraá daqooraay.

⁷ Slahhángw tame muruuwí baraá daqooráy qamiingo kuna iimu/ún, nee slahhángw faanqwe kway hhe'eés.

⁸ Waawutmo Hesekia nee mukduú geeraharuuse tay daqáy as daqooraydá' taa burumbuúr kuwa ari, inooín AAKOÓ MUNGÚ ngway sluufisiyé', nee mukduú Israeli daqaari'iimar'ín gaa haniisi.

⁹ Waawutmo Hesekia kaahamuusér Mungú nee múk Laáwi giri yaahaás daanduú daqooraywí ta buruumburi.

¹⁰ Asariya kaahamusmoó úr oo Mungú, kuduú xwaylár Sadoki, guri mu/aywaáts, «Iimír muu muruuwí huwaahubuwo nguwa iimu/ún baraá doo Mungú, muruú /aymár yaariír ugwa slawaán nee oo yaariír aa meét. AAKOÓ MUNGÚ mukós gwaa tsuuqaá yaariír i haniís, an gár muruuwí sleémeero kusa slawaán.»

¹¹ Aluuwo waawutmo Hesekia giri ádbáy meeweé kawa tleehhi baraá kutuwír doó AAKOÓ MUNGÚ. Inooín ngiri tleehhiyé'.

¹² Balangwdá' tinda hanmiís nee ar wák baraá mibaango, nee muruudá' taa paraátl as Mungú, kuri baraá doó Mungú i baáts ar inkihhimu. Konania heé tlahhoó Laáwi kuri qaás heé úr wa ale, as muruudá' nguwa amohhe'eemisi, nee hhiyaawós Shimei an alee/isusmoowós.

¹³ Yehieli, nee Asasia, nee Nahati, nee Asaheli, nee Yerimoti, nee Yosabadi, nee Elieli, nee Ismakia, nee Mahati nee Benaya, kiri qaás ga/aawuusér wa ale. Konania gin geeraharahaar, nee Shimei hhiyaawós. Mukwí sleémeero kuna tsawaár nee waawutmo Hesekia nee Asariya geeraharusmoó úr oo Doó AAKOÓ MUNGÚ.

¹⁴ Kore garmoó Imna heé tlahhoó Laáwi, kuduú xuumusmoó afkú do' oo da/aáw oo Doó Mungú. Inós a sagesihhitusmoó muruudá' muu na huwahuúw ar sla'aarir'ín dír AAKOÓ MUNGÚ, nee qasmisuú muruudá' taa hanmiisi dír AAKOÓ MUNGÚ, nee ilahhooadá' ló'wa hhohho'.

¹⁵ Edeni, nee Miniamini, nee Yeshua, nee Shemaya, nee Amaria, nee Shekania, inooín nguna alee/iisiyé' gadiyeérí tlehhtuuwo ar inkihhimu baraá gixsaduudaá hatlá' awa kaahamuusér Mungú aa hoti. Inooín hhaeeín kudaá múk Laáwi ngina muruú /aymár i qasmiisiyé' awa uren nee awa ninakwe.

¹⁶ Slám inooín ta hhaslitiiká, laqaá tlahhoó hee i dirii'i kwa leelehhiiká, inooín na/iidaá daaqaay awa kureeraá tám ngaa aye', nee awa ngaa ba/iye', kudá' daraahá' baraá doó Mungú, gadiyér'ín ngi boo/eemisá', umuú heewo qoomaydá' inós wa hariím guna sláy, ar adór gadiyeédá' aa tleéhh bál baalaqaasirose.

¹⁷ Kaahamuusér Mungú kana gooín ar adoodá' tlahh'ii'ín i dirii'iya'. Múk tlahhoó Laáwi oo taa gooín a kudá' kureeraá mibeeri tsár ngaa aye', nee ngaa ba/iye', nee kina gooín ar adoodá' gadiyér'ín i diri' nee baalaqaasir'ine.

¹⁸ Inooín kina dinkwár i gooín nee na/ii'ín awa ninakw, nee tlaaway'ine, nee daaqaay nee dasuuine, ar adoodá' gadiyér'ín ngir tlehhaahhitiya'. Inooín umuú daqto ki inkihhím tiwa hhohhoeemisiya' baraá gadiyér'ine.

¹⁹ Slám kaahamuusér Mungú ar xwaylár Aroni ar baraá qamaá hoot, kudá' ta aliiti tsee/aá gixsar'ín, múk taa qaás i deer oo qoomoó muruú /aymar'ín gu qasmiís. Umuú heewo tidá' inós wa hariim gan slasláy, inós bar garma baraá kaahamuusér Munguhe, nee umuú heewo oo múk Laáwi oo taa qo gooini.

²⁰ Adoorí an adoodá' waawutmo Hesekia hhooeema ngira tleéhh, tidá' ganaá' nee tidá' inkihhím geeraá AAKOÓ MUNGÚ, Munguúwós, baraá yaamaá Yudawo sleémeero.

²¹ Umuú gadiyér aa qo tleehhi baraá doó Munguhe ar adoodá' dabe nee hara'aya ngir kat, as geeraharu'uumár Munguúwós ngiwa eehari, gadiyeé gana tleéhh ar muunaáwós sleémeero, nee gari aleesláy.