2 QOM'I 30 - Biblía Axweesantá Hhohho' ar Mungú 2004

Amohhe'eemisuú deelór Pasaáka

¹ Waawutmo Hesekia afo gana ilahaniís amór múk Israeli sleémeero nee oo Yudawo, barwiito'o gari gooín amór tlahhoó Efraimu nee oo Manase sleeme, as niwa hardihiya' amór Doó AAKOÓ MUNGÚ, baraá Yerusalemu, as deelór ur ar Pasaáka kawa tleehhi, as ilaiwa/amér AAKOÓ MUNGÚ, Munguú Israeli.

² Waawutmo nee geeraharuusér muu, nee muu sleémeero oo gixsár Yerusalemu tiri kaahi slayé' daanduú deeloorí ur ar Pasaáka ar ta tleehhi slahhángw tsare.

³ Asma deeloorí kaa tleehhiiká deeloodá' hariima, asma kaahamuusér Mungú taa hhoohhooeská, sleeme inooín ki niina, nee sleeme muu aa burumburiitiiká baraá Yerusalemu.

⁴ Waawutmo nee mukdá' aa burumburiit adoodá' taa qoomeés giri sla'atís.

⁵ Gawaá adoorihe afo ngiri ilahaniisiyé' baraá yaamaá Israeli sleémeero, iimír Be'er-shebár wa tleemu ay Dani, as muu iwa burumburiiti baraá Yerusalemu, as deelór ur ar Pasaáka ar AAKOÓ MUNGÚ, Munguú múk Israeli, kawa tleehhi. Asma qoomár yaariir aa waaráhh ar deeloorír Pasaáka kawa tleehhiiká adoodá' dabeerós iwa hariin.

⁶ Muu kuri ya/aáw nee waawutmo nee geeraharuuse amór múk Israeli sleémeero, nee oo Yudawo. Barwaduudá' gár ki gooín a tí, «Kuungaá múk Israeli, peeroó taa meetiís nee waawituú Ashuru, AAKOÓ MUNGÚ i ki/aare', Munguú Abrahamu, nee oo Isaka nee oo Israeli, inós daqaní kuungá' nu i kii/.

⁷ Kuungá' ma adór baabi'iihúng nee hhaeehúng tleehhitaara', kudá' naa inkihhimu wasleesiye' dír geeraá AAKOÓ MUNGUHE, Munguú baabi'ii'ín, kudá' inooín gaa slaahh ar xaraasleema adoodá' kara aandé'.

⁸ Kuungá' ma da/eewe gawdeesara' adór baabi'iihúng wa ale, ti kiloohúng hanise' dír AAKOÓ MUNGÚ. Qwalaasé' amór do'ós kudá' inós aa hhohhoeés ay kureér, AAKOÓ MUNGÚ Munguúhúng sluufmisaak as munduwa i buúhh.

⁹ Kuungá' barnaxes aga ki/é' amór AAKOÓ MUNGÚ, Munguúhúng, hhaeehúng nee na/iihúng kingi gurtláy nee niri ki/iyá' baraá yaamuuhúng. Asma AAKOÓ MUNGÚ, Munguúhúng, ku hhoó' nee i gurtleemuú kón, inós kuungá' nu ilaaoh bura i ki/é'.»

¹⁰ Aluuwo mukdá' iri tláy tari waaraáhh ar umuúqo gixsaro baraá yaamaá Efraimu nee Manase tay hardáh ay yaamaá Sebuluni. Ala muu inooín giri ló'wa waaqaseesén nee kina niqmís nee kina waaqaqaá'.

¹¹ Tam adoorihe múk niiná baraá tlahhoó Asheri nee Manasewo nee Sebuluniwo tina niinaweesiyé', niri hardihiyé' ay Yerusalemu.

¹² /Uuruú Mungú gadiyeé gana tleéhh baraá munér múk Yudawo, inooín nay iialooeesiyé', hara'ayár waawutmo nee geeraharuuser'ine ngay eehariyé' adoodá' AAKOÓ MUNGÚ ngira oó'.

Deelór Pasaáka kawa tleéhh

¹³ Múk yaariír ina burumburiít baraá Yerusalemu qoomár slahhángw tsár as deeloodár mikaátér taa sluuftisiiká kawa boo/eesi.

¹⁴ Gadiyeé kana iimu/ún, kiteeridá' ilahhooa kawa hanmamisi awa baraá Yerusalemu, kiri hingeés, nee kudá' ta mooyángw tsuú' i da/aa/an, kina gagaár kiri kwaáhh baraá xatstá Kidroni.

¹⁵ Bál slahhángw tsár tawa mibaá nee tsiyáhh deelmoó bee/i oo Pasaáka kuna gaás. Kaahamuusér Mungú nee múk Laáwi tari ló'wa muruút, tiri hhohhoeesiyé', ilahhooár da/a ngari huwiyé' baraá Doó AAKOÓ MUNGÚ.

¹⁶ Umuú hee ina dirós i sihhiít baraá Doó AAKOÓ MUNGUHE, adoodár Mose, heé Mungú, ngira oó'. Múk Laáwi tseerér ilahhooa gana hanmiís dír kaahamuusér Mungú, inooín ngay tsiririxiimís gawaá kitangwduú ilahhooa kawa hanmiisi.

¹⁷ Asma mukdá' aa didií burumburiti'i awa yaariir taa hhohhoeesi'iiká, múk Laáwi deelmooduú oo deelór Pasaáka ngway gaasiyé' as mukdá' taa hhohhoeesiiká kuwa hhohhoeesi dír AAKOÓ MUNGUHE.

¹⁸ Tam adoorihe mukdá' naa hardah oo tlahhoó Efraimu, nee oo Manase, nee oo Isakari, nee oo Sebuluni, taa hhohhoeesi'iiká, adoodá' kis hariím deelór Pasaákuwo, ala inooín Pasaáka nguri /ayiyé' ar adór harimaaká asma wawutmo Hesekia inooín gina aleefirín, iwa kaahi, «Aá AAKOÓ MUNGÚ, Munguú hhoó', gurtlaweek kudá' sleémeero

¹⁹ kuúng u firirimá' ar muner'ín sleémeero, kuúng AAKOÓ MUNGÚ, Munguú baabi'ii'ín, tam inooín ki hhohhoeekahe ar adoodá' dabeedár hhohhoeesa i diri'.»

²⁰ AAKOÓ MUNGÚ firór Hesekia gari axaás, mukdá' guri gurtláy.

²¹ Múk Israeli kudá' aa burumburiit baraá gixsár Yerusalemu deeloodá' ur ar Pasaáka tidár mikaátér taa sluuftisiika, kana tleéhh ay deelo faanqw ar qwal/amaayér ur. Múk tlahhoó Laáwi nee kaahamuusér Mungú AAKOÓ MUNGÚ nguna xirfayeemisiyé' umuú baalaaro, nguna i daaiyé' ar xoslaá afo uren.

²² Waawutmo Hesekia múk tlahhoó Laáwi guri xirfayeés gay muunuú i qaás asma sluufmisuudá' nguna geerahariyé' ar sagalooár ur. Alaá deelo faanqw iwa waaráhh, nee muu /aymaro tawa hhe'eés, ilahhooár wayda ar muruú ta tsu/i nguri haniisiyé', AAKOÓ MUNGÚ, Munguú baabi'ii'ín, ngway sluufmiisiyé'.

Deelór ur kawa male sagaá wa tsár wa tleéhh

²³ Muu tari axweesani sláy tawa kumiiti deelór hatlá' faanqwe. Naagáy tari kumiít deelór ur kawa tleehhi ar qwala/ har afiqoomár deelo faanqw.

²⁴ Waawutmo Hesekia oo Yuda, mukdá' aa didií burumburiit giri awér kumuú wák i haniís, nee bee/ángw kume faanqw, as kuwa ilahhooár wa haniisi. Geeraharuuse awe nga hanisiyé' kumuú wák nee bee/aangw kume mibaangw. Kaahamuusér Mungú ar yaariir tiri hhohhoés.

²⁵ Umuúqo heé aa daqayi ina qwalaá/. Nee múk Yuda sleémeero, nee kaahamuusér Mungú, nee múk tlahhoó Laáwi, nee yaamuloouusér Yerusalemu, nee dahaayér ayaá hatlá' daahh nee dahaayeedá' yaamaá Yuda hootá', sleémeero tana ló'wa qwalaá/.

²⁶ Qwal/uú úr iri tleehharuút baraá Yerusalemuro, asma iimír qoomár Solomon garmoó Daudi, waawutmoó Israeli, gár adór tí baraá yaamaá Yerusalemuro kaa baloó ariiká.

²⁷ Aluuwo kaahamuusér Mungú nee múk tlahhoó Laáwiwo tari sihhiít muu kway tsuúq, afor'ín kari axaás, firor'ín iri hardát gawaá doori tidá' hhoohhoo', inós iri axaás amoorós tidá' hhoohhoó' wa alé gawaá doori, firor'ín gari ya/án.