2 QOM'I 3 - Biblía Axweesantá Hhohho' ar Mungú 2004

¹ Waawutmo Solomon Doó AAKOÓ MUNGÚ guri iimu/ún tlehhtuwo baraá Yerusalemu, gawaá tloomár Moria didá' AAKOÓ MUNGÚ tiwa dír Daudi geehhooeés. Diirí an afeenidár balaangw muxta ar Ornani heé Yebusi, tidá' Daudi aa tsawaár.

² Waawutno Solomon Do' nguwa iimu/ún tleehhamooro a bál slahhángw tsár tawa tsár oo kurkú tsiyáhh oo waawuti'iimarós.

³ Doó Mungú kudá' waawutmo Solomon aa tleéhh, tlenaangós a miíta mibeeri tsár nee faanqw, nee bihheero a miíta gwaleél.

⁴ Afkú didár dahma tlenaangós a miíta gwaleél, adoodá' tlenángw bihhér do' i dirii'i, nee tlenángw gawa a miíta mibeeri kooán nee tsiyáhh. Guruú do'o, kutuwidár dír afkú do' kana na/aás ar sahaábuú hhohho'.

⁵ Matla/ángw doó Mungú kuna harweér ar peehhoó xa'anoodá' ta bay beroshi, kway ninkiriíts ar sahaábu hhohhó', slaqsoó slaansla nee oo minyororo kway gawaadá' i tleéhh.

⁶ Waawutmo Solomon Doó Mungú gway parootuús ar tlaa/aá tlaxo uren, nee sahaábu amór yaamaá Parfaimu daáhh.

⁷ Inós Doó Mungú sleémeero guna niinkiriíts ar sahaábu nee waqasuuwo nee nahhto nee koo/iro nee afér do' sleeme. Gawaá koo/iro slaqsa'aá keruúbi kiri tleéhh.

⁸ Slám didá' ak ló'wa hhoohhoo' gana tleéhh, tlenaangós a miíta gwaleél, nee tlenángw bihheerós a miíta gwaleél sleeme, kari na/aás ar sahaábuú hhohhó' nee na/misuudá' gár aa faák a taáni mibeeri tsár nee kooán ar sahaábu.

⁹ Musumároó ira gadiyuús a graámu tsiire kooán nee mibeeraá faanqw oo sahaábu. Kuna koo/ír gáwtár tleéhh, nee sleeme koo/idá' kay niinkiriíts ar sahaábu.

¹⁰ Slaqsa'aá tsár awa keruúbi giri tleéhh giri niinkiriíts ar sahaábu, kiri qaás didaádá' ak ló'wa hhoohhoo' baraá doó Munguhe.

¹¹ Hhampe'eeraá keruúbidá' tlenaango a miíta tsiyáhh nee tlaqi dinkwaaro, hhampuú wák tlenaango a miíta tsár ga ba/abaa/, hhampuú wák koo/i gana kwatiít, hhampuú tsár nee oo keruúbír hatlá' tina doogiyé'.

¹² Hhampa'aá keruúbidár hatlá' tlenaango aqo adór awa tidár geera, hhampuuwós koo/ír do' gana kwatiít, nee hhampuú tsár tay doogiyé' nee oo tidár geera.

¹³ Tlenángw hhampe'eeraá tsár awa keruúbidá' a miíta tsiyáhh nee tlaqi. Inooín kiwa sihhtís kina alqoomeés, gur'er'ín kana amór matla/ángw xu'ús.

¹⁴ Inqwaarír ta dó' ar qasiisi gay tleéhh ar kitaánír hhohho', ar kaloó sirboó/, nee oo sirdaa/aát, nee oo daa/aate. Gari qaalín ar slaqsa'aá keruúbi.

Uheemaá tsár awa muqslír sirdaa/aat

¹⁵ Geeraá do'o uheemaá tsár awa muqslír sirdaa/aat gina tleéhh, umuú uhmoowo tlenaangós a miíta mibaá nee kooán nee tlaqi, nee umuúqo uhmoowo i slamángw kón oo tlenaangós a miíta tsár ga ba/abaá/.

¹⁶ Himtuú taa qaalín gway tleéhh gawaá sagér uheemiidá', slaqsa'aá mamaá komamaánga gay gawaadá' i tleéhh awa tsiiruú wák.

¹⁷ Uheemiidá' kay sihhtís geeraá Doó Mungú, oo wák bihhaá dákw doó /iyáy, nee oo tsár doó basáy. Oo bihhaá doó /iyáy kway báy Yakini nee oo bihhaá doó basáy kway báy, Boasi.