2 QOM'I 29 - Biblía Axweesantá Hhohho' ar Mungú 2004

Waawutmo Hesekia oo Yuda

¹ Waawutmo Hesekia waawuti'iima ngiwa iimu/ún kureeriiwós a mibeeri tsár nee kooán, nee ina waawuti'ín Yerusalemúr wa ale kureeri mibeeri tsár nee gwaleél. Aayoorós a Abiya dasír Sekaria.

² Hesekia hhooeema gina tleéhh dír geeraá AAKOÓ MUNGUHE adoodá' waawutmo Daudi baabuúwós aa tleéhh.

Doó Mungú kuwa hhoohhooeés

³ Bál slahhángw geera oo kurkú geera oo waawuti'iimarós, waawutmo Hesekia afér Doó AAKOÓ MUNGÚ gana gweér nee gari inki/ís tlehhtuwo.

⁴ Kaahamuusér Mungú nee múk tlahhoó Laáwi giri dahaás baraá do', giri burumbuúr bihhaá da/aáw awa afeenír Doó Mungú,

⁵ giri báy, «Aníng iiárií qaasaré' kuungaákaá tlahhoó Laáwi, ti kiloohúng hhoohhooeese', nee Doó AAKOÓ MUNGÚ, Munguú baabi'iihúng, ku hhoohhooeesá'. Xwaansláy sleémeero oo didá' hhoohhoó' i dirií' tsee/áy kwahhaak.

⁶ Asma baabi'iirén nina inkihhimu wasleesiyé', nee muruú tlákw nguri tleehhiyé' dír ilaá AAKOÓ MUNGÚ Munguúrene. Inooín nguna si'iyé', ngway amór saáw i mayé', didá' AAKOÓ MUNGÚ i hooti ngiri alaá xu'usiyé'.

⁷ Inooín sleeme afér do' ngina tseegiyé', nee tsaa'aso ngay gaasiyé', mooyangwdá' tsuú' laqaá ilahhooár da/a ngaa da/i'iiká dír kitangwdá' hhoohhoó' oo Munguú múk Israelír wa ale.

⁸ Gawaá adoorihe AAKOÓ MUNGÚ múk Yuda nee oo Yerusalemu guna i daa/atúy buhhtaawo, nee tidá' Mungú ngay tleéhh, muu guri kwisltís, nee sleémeero giri dae tsát, kiri niqimís. Tí sleémeero kuungá' aga aandé' ilaahunge.

⁹ Baabi'iirén kina tsuú/ baraá slaqwarár wa alé, daaqayrén nee dasuurene nee tlaawayrene kina haasaáng wa ar tláy as kaangwí.

¹⁰ «Hamí daxta, aníng aga tsabiím baraaeene alqado kawa ooaan dír AAKOÓ MUNGÚ, Munguú múk Israeli, as buhhtaawós mindiwa ki/iyé' daanduurene.

¹¹ Daaqay'eé', kuungá' ilaiwa/ame koomaak. Asma AAKOÓ MUNGÚ kuungá' naa tsawaár gadiyeérí kawa tlehha', kuungá' tawa sagadiyuuseerós, nee inós kuwa mooyángw tsuú' i da/a/aanda'.»

¹² Mukwí an múk tlahhoó Laáwi oo gadiyeérí gaa iimu/un: Tlahhoó Kohatiwo a Mahati garmoó Amasai, nee Yoeli garmoó Asariya. Tlahhoó Merariwo a Kishi garmoó Abdi, nee Asariya garmoó Yehaleli. Tlahhoó Gershoniwo a Yoa garmoó Sima, nee Edeni garmoó Yoa.

¹³ Tlahhoó Elisafaniwo a Shimri nee Yeueli, nee tlahhoó Asafuwo a Sekaria nee Matania.

¹⁴ Tlahhoó Hemaniwo a Yehueli nee Shimei, nee tlahhoó Yedutuniwo a Shemaya nee Usieli.

¹⁵ Mukwí hhaeeín ngiri burumburiyé', tiri hhoohhooeesiyé'. Adoodá' waawutmo aa oó' ngay tleehhiyé', ar adór axweesantá Mungú aa ó', as Doó AAKOÓ MUNGÚ nguwa fiitsiya'.

¹⁶ Kaahamuusér Mungú iri dát baraá guruú Doó AAKOÓ MUNGÚ, xwaansláy sleémeero ngway fiitsiyé', kudá' naa slayé' baraadá' wa ale. Xwaansláydá' nguri burumburiyé' baraá matla/ángw doó Mungú. Múk tlahhoó Laáwi xwaansláydá' nguri kwahhiyé' baraá xatstá Kidroni.

¹⁷ Gadiyeérír hhoohhooeemisuú Doó Mungú ngiwa iimu/uné', a bál slahhángw geera tawa wak, bál dakaate taa hardáh dír afeenír Doó AAKOÓ MUNGÚ. Naagáy gadiyeédae tay kumiít deelo dakaát ar hatlá' ay bál slahhaangw tawa mibaá nee lahhoó', umuú gaaro iri hhooeér.

Doó Mungú kuwa malé aldafín

¹⁸ Aluuwo múk Laáwi tari dír waawutmo Hesekia káy, kuri báy, «Doó AAKOÓ MUNGÚ ugwa qaroó hhe'eesaán fiitsaro, dinkwa nee kitángw ilahhooár da/a kay hanmiisi nee xoosla sleémeero, nee meésadár mikaátér Munguhe nee xooslaarós sleémeerowo.

¹⁹ Xoosla tidá' Ahasi ira tláy qoomár waawuti'iimarose, qoomár iwa dee/aanuút, aga ki/isán, nee sleeme aga hhoohhooeesaán. Xoosla sleémeero aga geeraá kitángw ilahhooár AAKOÓ MUNGÚ i qaasaán.»

²⁰ Matlaatlér bál tsare waawutmo Hesekia geeraharuusér gixsár Yerusalemu gana burumbuúr, tay tláy, tay dáh baraá Doó AAKOÓ MUNGÚ.

²¹ Awér faanqw kari huúw, gwaandaawe faanqw kari huúw, deeloó bee/aangw oo faanqw, nee gurtaawe faanqw, kina haniís as tawa ilahhooár tlakweema hingeesa daanduú waawuti'iimaro nee didá' hhoohhooe nee as múk Yuda. Waawutmo kaahamuusér Mungú tidár xwaylár Aroni gari ádbáy, ilahhooarí ngiwa haniisiya' gawaá kitangwduú ilahhooár AAKOÓ MUNGÚ.

²² Kaahamuusér Mungú awe gari giirís tsu/utaro, tari gwaandaawe, tari deeloó bee/aangw, tseerdaá makaydá' kari tsiririximiís gawaá kitangwduú ilahhooa kay hanmiisi.

²³ Aluuwo gurtaaweedár ilahhooár tlakweema hingeesa kari tseeweés bihhaá waawutmo, nee muu sleémeero. Dabaaín kiri qaás gawaá gurtaaweedá'.

²⁴ Kaahamuusér Mungú makaydá' ngiri tsu/iyé', tseerer'ín kay tsiririxiís gawaá kitangwduú ilahhooa as múk Israeli sleémeero kuwa haraki/isi nee Mungú. Asma waawutmo Hesekia gana oó', ilahhooár da/a, nee ilahhooár tlakweema hingeesa kawa haniisi as múk Israeli.

²⁵ Waawutmo Hesekia adoodá' AAKOÓ MUNGÚ aa Daudi báy ar loohír iigu'utusmo Gadi nee aarusmo Natani, gana eehár. Gawaá adoorihe múk tlahhoó Laáwi guri qaás baraá Doó AAKOÓ MUNGÚ, bahh'alé i mitingaroó koná', kookaariya' i mariímbár koná' nee bahh'ale i gidandooroó koná'. Gaarí an hara'ayár AAKOÓ MUNGÚ aa hara'ayín ar loohír aaruuse.

²⁶ Múk tlahhoó lawi tana sihhiít ar xosluuín kukaá daa'aangw awa Daudi, nee kaahamuusér Mungú ina sihhít ar tarumbeetadu'ín.

²⁷ Hesekia iri oó', «Ilahhooár da/a haniisaak gawaá kitangwduú ilahhooa kay hanmaamisi.» Qoomár ilahhooár da/a hanmisuuwo kawa iimu/ún, muu daa'ángw AAKOÓ MUNGÚ guri óh, bara/ kuri duuruúx ar tarumbeetadu, nee ar xoosladár daa'aangw ar waawutmo Daudi oo múk Israeli.

²⁸ Muu sleémeero tana kumiít sluufmisuuwo, daauuse ina kumít daa'ango, nee mukduú tarumbeetadaá ufahhaám in kumiít ay qoomár ilahhooár da/a hanmisuuwo garwa hhooeér.

²⁹ Qoomár ilahhooa iwa hhooeér hanmisuuwo, waawutmo nee muu sleémeero kudá' didií dirií' tana xupuú', Mungú nguri sluufmiisiyé'.

³⁰ Aluuwo waawutmo Hesekia nee geeraharuuseero múk tlahhoó Laáwi nguri ádbayé', AAKOÓ MUNGÚ nguwa daa'ángwár xirfayeemisiya', daa'angwduú waawutmo Daudi nee iigu'utusmo Asafu naa daaiyé'. Muu sleémeero Mungú guri i daá' ar daa'ángw qwala/, tari xupuú', Mungú kuri sluufiís.

³¹ Naagáy Hesekia muu guri báy, «Kuungaásíng taa qaroó hhoohhooeese' dír AAKOÓ MUNGÚ i tseewuwaare', ilahhooarhúng ar muruú ta tsu/i nee ilahhooár sluufaywo huwaare' baraá Doó AAKOÓ MUNGÚ.» Naagáy muu ilahhooar'ín ar muruú ta tsu/i nee ilahhooár sluufaywo ngina huwiyé' ar sla'aari.

³² Ilahhooár da/a dinkwaaro ar tinda huúw a awe mibeeri faanqw, nee gwaandaawe tsiiruú wák, nee deeloó bee/aangw a tsiire tsár. Muruuwí sleémeero a ilahhooár da/a/aangw ar taa haniís dír AAKOÓ MUNGÚ.

³³ Ilahhooár hhohho' ar taa haniís a awe tsiire lahhoó', nee bee/aangw kume tám.

³⁴ Kaahamuusér Mungú muruudá' daqarooro gway harslaaqát, asma inooín ki ureeká. Gawaá adoorihe, hhaeeín kudaá tlahhoó Laáwi daqarooro ngay alee/iisiyé' kari hhe'eés. Qoomaarihe kaahamuusér Mungú ar yaariir taa hhoohhooés (Asma múk Laáwi oo taa hhoohhooees ku úr ta kaahamuuseero).

³⁵ Dinkwa nee ilahhooár yaariir ar da/a/aango, ilahhooár da/a ar wahhana ar wayda i deer, nee ilahhooár wahaango ar ta ilahhooár da/aa/ángw alhanmiisi. Adoorí an adór gadiyér ilahhooa kara iimu/ún baraá doó AAKOÓ MUNGUHE.

³⁶ Waawutmo Hesekia nee muu sleémeero tari ló'wa qwalaá/ asma adoodá' Mungú aa tleéhh, asma adoorí ina gaanslár tleehharút.