2 QOM'I 28 - Biblía Axweesantá Hhohho' ar Mungú 2004

Waawutmo Ahasia oo Yuda

¹ Ahasi waawuti'iima ngiwa iimu/ún kureeriiwós a mibeeri tsár, ina waawuti'ín Yerusalemúr wa ale kureeri mibaá nee lahhoó'. Inós loohidá' hhoo' ar baabuúwós Daudi ga eehariiká, kángw AAKOÓ MUNGÚ sla'atimisaaká guna tleéhh.

² Loohír aa eehár a tidár waawituú Israeli aa eehár. Inós munguúdá' ta bay Ba'ali guna tleéhh ar muqslír taa kwahhuút.

³ Mooyaangw guna da/aa/án baraá xatsta garmoó Hinomu wa ale, sleeme na/iiwós giri ilahhooár da/tá wa haniís dír munguú ta bay Ba'ali, ar adór muruudá' ta waki nee kur tlehhahhiti xoorduudá' Mungú aa guús geeraá xoorór Israeli wa aleeró.

⁴ Ahasi ilahhooár muruú ta tsu/i gana haniís nee mooyaangw guna da/aa/án dír wa/amér munguaá hatlá' kiwa sluufmamiisi, gawaá goongoama' nee gawaá tlom'i nee dír umuúqo gamuú xa'anoó loo/o naa/e.

Slaqwarár múk Aramu nee oo Israeli

⁵ Ahasi kuri geexáy nee AAKOÓ MUNGÚ Munguúwós guri haniís kuwa baali nee waawutmoó Aramu, daqaari'iimár yaariir ar mukós kari ar tláy ay Damasko. Inós sleeme kuna haniís kuwa baali nee waawutmoó Israeli, mukós oo yaariír guri tsuú/.

⁶ Peka garmoó Remalia slaqwaruusér Yuda ar kume tsiiruú wák nee mibeeri tsár gana tsuú/ baraá looár wák i ale. Adoorí ina tleehharút asma inooín AAKOÓ MUNGÚ, Munguú baabi'ii'ín nguna geexayé'.

⁷ Sikri, slaqwarusmoó migusmo oo wák oo Israeli, Ma'aseya garmoó waawutmo guri gaás, nee Asrikamu, geeraharusmoó slaqwaruuse oo doó waawutmo xuúm guna gaás sleeme, nee Elkana heedaaduú tsár baraá waawuti'iimaro guri gaás.

⁸ Slaqwaruusér Israeli hhaeeín awa kume tsiire tsár ngina ar tlayé' dinkwa nee /ameena nee daaqaay nee dasuuwo. Inooín sleeme daqaari'iimár yaariir ngiri haasaáng wa ar tlayé', ngari huwiyé' ay Samaria.

Aarusmo Obedi

⁹ Alaá deelór niinawe heeko wák ta bay Obedi aarusmo AAKOÓ MUNGÚ kudá' Samariár hoót ina ti'iít, slaqwaruusér Israeli gana al'áy dinkwa nee muruudá' naa haasaáng wa huwi'i oo múk Yuda nee muko qoomár niwa tseewúy Samaria, giri báy, «AAKOÓ MUNGÚ, Munguú baabi'iihúng, múk Yuda guna i buúhh, an gár kuungá' kusa balé', ala gaarí amór i dahh a amór Mungú.

¹⁰ Hám daxta múk Yuda nee oo Yerusalemu in lawaalerhúng waá oohár wa sla'á'a? Xáy, kuungá' hamí a tsatsahhaanda'akáhe adór tlakweema kira tlehhé' dír AAKOÓ MUNGÚ, Munguúhunge?

¹¹ Hám daxta aníng iiárií qaasaré', hhaeehúng kudá' naa hubé' watlisaak, asma AAKOÓ MUNGÚ kuungá' naa i buúhh.»

¹² Muko urén oo tlahhoó Efraimu, Asariya garmoó Yohanani, nee Berekia garmoó Meshilemoti, nee Yehiskia garmoó Shalumu, nee Amasa garmoó Hadlai, inooín mukdá' baraá slaqwarár daáhh nguna i gahhaatiyé'.

¹³ Tari oó', «Mukwí nira watlé' baraá slaqwarár wa alé mungu baraaká' i huwaara', asma kuungá' atén ti dakuusár i hubá' dír AAKOÓ MUNGUHE, tlakweemaarén ngiri dogá', asma tlakweemaarén naa qaro tlahhayé', nee sakwasleemár xaraasl ar Mungú i gawaarén i dirí'.»

¹⁴ Naagáy miguuseedá' mukdá' tinda ohín nee haasaángudae kiri watlís dír geeraá mukdá' urén wa ale, nee dír dinku'uumár muu sleémeero.

¹⁵ Aluuwo mukdá' urén umer'ín taa geerií oó' kuri ar tláy, mukdá' tlabaá koomaaká sleémeero kiri tlabií haniís, nee kudá' ya/ataá koomaaká kiri ya/atií haniís, kiri muruú /ayma nee muruú wahaángwí haniís. Muu kuri slikín ar di/i, kudá' taa slahh'eemiís kiri gawaá daandeemaá daqwaayeérí tsa/aás, kiri huúw sleémeero ay Yeriko amór hhaeeín, gixsár slaansla, inooín tari kií/ Samaria.

Ahasi i alee/isoó firiirín amór xoorór Ashuru

¹⁶ Qoomaarihe waawutmo Ahasi afo gana ya/aáw ay dír waawutmoó Ashuru as alee/isaay nguwa firin.

¹⁷ Asma inós i slaaqw nee múk Edomu, kudá' aa haratlay baraá yaamaá Yuda, múk Yuda kway baál, múk yaariír kuri haasaáng wa ar tláy.

¹⁸ Qoomaarihe sleeme múk Filisti gixsár Shefela nee ar Negebu awa Yuda kina i haratláy. Gixsár Bet-shemeshi, nee Ayaloni, nee Gederoti, nee Soko nee ayeemaá inslaawaydae ngiri hayoohiyé', nee Timna nee ayeemoowose, nee Gimso nee ayeemoowose, gixsaduuká' ngiri kooín tleehhiyé'.

¹⁹ Adoorí ina tleehharút asma Ahasi waawutmoó Israeli, inós xarasleema gina tleéhh dír mukose, inkihhimu guna dakuús dír geeraá AAKOÓ MUNGUHE. AAKOÓ MUNGÚ múk Yuda guri daba' tsaát slaqwaraaro.

²⁰ Aluuwo Tiglat-pileseri, waawutmoó Ashuru kitángw Ahasi nguwa alee/iisi, kuri ak i haratláy.

²¹ Ahasi sahaábu guri leéhh baraá Doó AAKOÓ MUNGÚ, sleeme guri leéhh doó waawutmo, guri male leéhh baraá maraá múk urén, guri haniís dír waawutmoó Ashuru adór ohmér wa alé, ala adoorí gwaa /iská sleeme.

Tlakweemaá Ahasi

²² Qoomár waawutmo Ahasi iwa baraá slahh'amuú i dirii'i, ina ló'wa dee/anuút dír AAKOÓ MUNGUHE.

²³ Asma ilahhooár muruú ta tsu/i gana haniís dír munguidaá múk Damasko, kudá' inós ngwaa baaliye' slaqwaraaro, as iwa kaahi, «Asma munguiiká' bar waawituú Aramu nguna /iisiyé', aníng bira ilahhooár muruú ta tsú/í haniís sleeme i /iisiyá'.» Ala munguiidá' inós nguna ak hhaamiisiyé' nee xoorór Israeli sleémeerowo.

²⁴ Ahasi xooslár Doó Mungú sleémeero gana burumbuúr gay parhhamaamiís. Naagáy afér Doó AAKOÓ MUNGÚ gari tseék, kiteeraá munguaá hatlá' kiwa sluufmiisi giri tleéhh umuú diiro baraá Yerusalemuro.

²⁵ Baraá gixsadaá Yudawo wa/angwduú gawaá gongoama' kudá' ta mooyángw i da/aa/an dír munguaá hatlá' guna tleéhh. Adoorihe AAKOÓ MUNGÚ, Munguú baabi'iiwós, guri ló'wa buhhtís.

²⁶ Tlehhmi'iiwós sleémeero nee adór ira hoót iimír iimu/uungw ay alhhe'eesaywo, kaa gooín baraá kitaábuú waawituú Yuda nee oo Israeli.

²⁷ Waawutmo Ahasi iri gwaá', kway foól baraá gixsár Yerusalemu, ala kwa fooliiká baraá /antaá waawituú Israeli. Hesekia garmaawós iri waawuti'ín kitaangós wa aleeró.