2 QOM'I 27 - Biblía Axweesantá Hhohho' ar Mungú 2004

Waawutmo Yotam oo Yuda

¹ Yotam waawuti'iima ngiwa iimu/ún kureeriiwós a mibeeri tsár nee kooán. Inós waawuti'iima baraá Yerusalemu nga /aay kureeri mibaá nee lahhoó'. Umuú aayoorós a Yerusha dasír Sadoki.

² Inós tlehhma'aá hho' gina tleéhh dír Munguhe, adoodá' baabuuwós Usia aa tleéhh, ala inós aa dahiiká baraá Doó AAKOÓ MUNGÚ. Ala muu tlehh'maaá tlakw tlehhtuuwo ina kumiít.

³ Yotam afkuduú Gawa oo doó Mungú guna tleéhh, nee koo/idár Ofeli gari tleéhh sleeme.

⁴ Inós sleeme gixsadu gina tleéhh gawaá tlom'aá yaamaá Yuda, baraá darmuuwo nee gawaá tlom'aá sla/ata kooma'a koo/ír gawit gana tleéhh nee /aampuuwo.

⁵ Inós nee múk Amoni tana slaáqw gay baál. Múk Amoni gway ohmeérí huúw kurkuduú kilae, kílo kume tám nee tsiire tsiyáhh ar peésa, nee guniyadu kume mibaangw awa angaáno nee kílo kumuú wák ar angaánoó shayiíri. Adoorí ngina tleehhiyé' kurkú tsare nee oo tame sleeme.

⁶ Waawutmo Yotam /uuru guri ak sláy asma ina kumiít AAKOÓ MUNGÚ Munguúwós nguwa ilaiwawa/i.

⁷ Tlehhma'aá hatlá' awa waawutmo Yotam, nee slaqwarár aa slaqwi, nee adór muu ngura geerahaár sleémeero kaa gooín baraá kitaábuú waawituú Israeli nee oo Yuda.

⁸ Yotam waawuti'iima ngiwa iimu/ún kureeriiwós a mibeeri tsár nee kooán, inós ina baraá Yerusalemúr wa waawuti'ii'ín kureeri mibaá nee lahhoó'.

⁹ Iri gwaá', kway foól baraá gixsár Daudi. Garmaawós Ahasi iri waawuti'ín kitaangós wa ale.