2 QOM'I 26 - Biblía Axweesantá Hhohho' ar Mungú 2004

Waawutmo Usia oo Yuda

¹ Aluuwo múk Yuda sleémeero Usia garmoó Amasia, qoomár kureeriiwo tawa mibaá nee lahhoó', kuri tsawaár tawa waawutmo, kway kitángw baabuúwós wa qaás.

² Alaá baabuúwós iwa gwaá' inós gixsár Eloti gari /abeés tleehharo, nee gari ki/ís baraá yaamaá Yuda.

³ Usia waawuti'iima ngiwa iimu/ún kureeriiwós a mibaá nee lahhoó'. Waawuti'iima gana baraá Yerusalemúr wa /aáy kureeri mibeeri kooán nee tsár. Aayoorós ka bay Yekolia ar yaamaá Yerusalemu.

⁴ Inós hhooeema gina tleéhh dír geeraá AAKOÓ MUNGUHE, adór baabuúwós wa ale.

⁵ Inós AAKOÓ MUNGÚ guna leeleehhiít qoomaadá' Sekaria iwa slafi, kudá' inós gwa intsaahhatis Mungú nguwa ilaiwawa/i. Adoodá' AAKOÓ MUNGÚ ngura leeleéhh, an adoodá' ngura aleesleemú i haniís.

⁶ Waawutmo Usia tari slaáqw nee múk Filisti. Inós koo/ír gixsár Gati, nee Yabne, nee Ashdodi giri feé/. Gixsadaá hatlá' giri tleéhh baraá yaamaá Ashdodi nee baraá yaamudaá hatlá' naa meetiye' awa Filisti.

⁷ Inós Mungú guna /uurú i haniís oo múk Filisti nee oo Ma/araábu, kudaá Gurba'ali, nee múk Meuni ngiwa baali.

⁸ Múk Amoni ohme ngiri huwahuwiyé' dirós i alé, gawaá adoorihe iri iia tleerúy ay yaamaá Misri, asma /uuruudá' i kon.

⁹ Waawutmo Usia waawuti'iimarós /uuru guna sleér ar /ampuudá' aa tlehhiít dír afkudá' koo/i niwa warqeér, nee dír afkudá' ta bay oo Xatsa, nee kuduú bihhaá koo/i gari gawdeés.

¹⁰ Inós sleeme baraá darmuuwo /aampu giri tleéhh, tlahheesaá yaariir giri foól, asma inós hikwaá yaariir gi kón baraá yaamaá goongoama nee baraá xatsowo. Inós doosla ga ló'wa slaa', muu guri qaás oo qamuuwós xuúm baraá yaamaá goongoamawo nee yaamuudá' wahhaara'a.

¹¹ Usia sleeme i slaqwaruusér kón, tidá' taa amohhe'eés slaqwaraaro. Slaqwaruuse gaa qasiís baraá daqooró dimbadiimbé, inooín kaa gooín nee goousmo Yeieli, nee geeraharusmo Ma'aseya. Mukwí sleémeero kuna geerahaár nee Hanania, kuduú geeraharusmoó úr oo slaqwaruusér waawutmo.

¹² Geeraharuusér tlahhi'i kudá miguusér slaqwara a kume tsár nee tsiire lahhoó'.

¹³ Slaqwaruusér ni geeraharahariya' a kume tsiire tám, nee kume faanqw nee tsiire kooán ar waawutmo tu/uto gu aleeslaw dír wakuuseero.

¹⁴ Usia slaqwaruuseerós gana gaambuú i haniís, nee lawlu, nee kifiyadaá muqsla nee gaambuudaá muqsla awa ta da/eewérár baqi, nee ga/aldu nee tlaa/aá ta tlaguuti ar kukumaayi.

¹⁵ Baraá Yerusalemuro mashini gari tleéhh gawaá /aampa, ar maheeri tlaqut nee tlaa/aá uren tlaqut amór saáwí aleeró. Xirfuuwós kuri axaás umuú diiro, /uuruuwós iri ló'wa doogín, asma inós alee/isoó yaariír guna dír Mungú wa sláy.

Slahhtá Usia as daara/aangós

¹⁶ Qoomár Usia /uuru nguwa sláy, iri daara/uút, daara/angwdá' guri amór qwanáy huúw. Iri dee/anuút dír AAKOÓ MUNGÚ, Munguúwose. Iwa dáh baraá Doó Mungú ina tsabín mooyángw tsuú' nguwa da/tá wa slai dír kitangwduú ilahhooa.

¹⁷ Ala kaahamusmoó Mungú Asariya dinkwa nee kaahamuusér hatlá' ar mibeeraá dakaát ar miguuse nina alaá waawutmoó wa dahiyé',

¹⁸ ngway ilaa/iyé' mooyaangw da/to, ngway bayé', «Gaarí a gadiyeérogeeká, Usía, AAKOÓ MUNGÚ kuwa mooyángw i da/. Gaarí a gadiyér kaahamuusér Mungú ar tlahhoó Aroni, an mukdá' taa paraátl gadiyeérí wa alé. Diirí ka hhoohhoo', diirí geexaweek. AAKOÓ MUNGÚ ugwa sadakús, ilaiwa/amér ta sleer i káhh dirose.»

¹⁹ Qoomaarihe Usia i sihhmiit baraá Doó Mungú wa ale bihhaá kitangwduú mooyaangw kway da/i, gár mooyangwdá' ngur da/i ga kón dakose. Iri buúhh amór kaahamuusér Mungú, Usia gitsee/aawós tiqtír tsatmit giri ót dír geeraá kaahamuusér Mungú wa ale.

²⁰ Asariya kaahamusmoó Mungú nee kudaá hatlá' nguwa i qaytsitiyé' ngway gaanslár duuxiyé' tsee/í ale, tam inós sleeme ina gaansluút ti'inango, asma AAKOÓ MUNGÚ gwaa slaáhh.

²¹ Naagáy waawutmo Usia tiqti guri alkoón ay gwa'ararós. Ina hoót baraá doó tawa kilós, kwaa pa/ángwií hanisiiká iwa dahi baraá Doó Mungú. Qoomaarihe garmaawós Yotam múk do'ós guna /aymiís nee múk yaamuuda' guna sawaawuti'ín.

²² Tlehhma'aá hatlá' awa waawutmo Usia iimír iimu/uungw ay alhhe'eesay kaa gooín baraá kitaábuú aarusmo Isaya garmoó Amosi.

²³ Usia iri gwaá', kuri foól iisaapoó didá' baraá /aantaá waawitá i dirii'iya', asma ta kaahi, «Inós i tiqtír tsatmituú kón.» Garmaawós Yotam iri waawuti'ín kitaangós wa aleeró.