2 QOM'I 25 - Biblía Axweesantá Hhohho' ar Mungú 2004

Waawutmo Amasia oo Yuda

¹ Waawutmo Amasia waawuti'iima ngiwa iimu/ún kureeriiwós a mibeeri tsár nee kooán. Ina waawuti'ín baraá Yerusalemúr wa ale kureeri mibeeri tsár nee gwaleél. Umuú aayoorós umuuwós a Yehoadani ar gixsár Yerusalemu.

² Amasia hhooeema gina tleéhh dír geeraá AAKOÓ MUNGUHE, ala gaa guruú /awaákár tleehhiiká.

³ Naagáy Amasia /uuru nguwa sangw sláy, sagadiyuuseerós tidá' baabuúwós gwaa gas gay tsuú/.

⁴ Ala na/ii'ín gaa tsu/iiká, as adoodá' kara gooín baraá kitaábuú dabér Mose, tidá' AAKOÓ MUNGÚ iwa kaahi, «Xwayliité ka tsu/iiká as tlakweemaá na/ii, laqaá na/ii ki tsu/iiká as tlakweemaá xwayliité, ala umuú heewo kun gaas as tlakweemaawós.»

Slaqwarár nee múk Edomu

⁵ Waawutmo Amasia múk Yuda guna burumbuúr guri qoomeemeés baraá daqoroó dimbadiimbé ar adór tlahh'ii'nií dirii'iya', nee giri qaás dír geeraharuusér daqtá kume, nee ar tsiire ar múk Yuda nee oo Benyamini. Mukós nguwa tsee/aarín, kuduú kureeri mibeeri tsár gaa ay a kume tsiire tám dinkwaaro. Mukwí sleémeero a múk slaqwara ga aleesláw, kudá' slaqwarár lawlu nee gaambu ga xuú'.

⁶ Slám slaqwaruusér hatlá' ar kume tsiirú wák gana sláy dír múk Israelír wa alé ar peésár kílo kume tám.

⁷ Ala heé Mungú iri hardáh guri báy, «Aá waawutámo, kuúng nee múk Israeli miti koomara' baraá slaqwaraaro, asma AAKOÓ MUNGÚ nee múk Israeli a dinkwaarooká, inooínaadaá Efraimu sleémeero.

⁸ Tam kuúng a migusa tawa slaqwarár eer Mungú kuúng u daahh geeraá wakusmo, asma Mungú i /uuruú kón oo uwa alee/iisi laqaá uwa dahhi.»

⁹ Waawutmo Amasia heeduú Mungú guri yaahaás, «Adór ta /isaan asma peésár yaariir aga hanisaán dír slaqwaruusér múk Israeli?» Inós guri mu/aywaáts, «AAKOÓ MUNGÚ peésár tisíng ga baa/ ngi aleesláy haniisaro.»

¹⁰ Waawutmo Amasia mukduú Efraimu guri watlís amór maray'ín, naagáy inooín tari waátl ala mune gaa farkiín amór múk Yuda.

¹¹ Waawutmo Amasia iri muna hhe'eés tari tláy slaqwaruuserós gay geerahaár ay xatstá diwi. Tari didá' wa slaáqw nee múk Seiri, múk Seiri oo kume mibaangw kuri tsuú/.

¹² Múk Yuda múk hatlá' kume mibaangw kuri slafi ohín, kuri huúw gawaá ságw tlaa/ár Sela, kway gawaadá' wa yaamií kwakwaáhh, nay suwawa'amitiyé'.

¹³ Qoomaarihe slaqwaruuseedár Israeli waawutmo Amasia aa watlís, as mitiwa koné' baraá slaqwarárí alé, tana haratláy baraá yaamaá Yuda iimír Samaria ay Bet-horoni, múk kume tám ngway tsu/iyé', muruú yaariír ngway haasaáng wa huwiyé'.

¹⁴ Waawutmo Amasia niwa waátl baraá slaqwarár wa ale, ar múk Edomu nguwa baál, slaqsi'iidá' munguaá hatlá' awa múk Edomu ngina ar waátl, giri sihhtís giri sluufmiís, giri mooyángwí da/aa/án.

¹⁵ Gaarí AAKOÓ MUNGÚ guri ló'wa buhhtís, AAKOÓ MUNGÚ aarusmo guri ya/aáw amór waawutmo Amasia. Aarusmoowí waawutmo Amasia guri báy, «Ahaá waáy, gár munguaá hatlá' kis harahhifiti, kudá' muk'ín /iisaro ngwa har'slaqatiye' baraá dabaawoge?»

¹⁶ Ala qoomár heé Mungú axweesantí ngiwa hhe'eesiiká, waawutmo Amasia guri báy, «Xasliít kuúng, a xaylá kuúng tuwa hara'ayusmoó waawutmoó wa qaás? Hamí an slá'a tuwa gaasi?» Aarusmoodá' iri xasliít, iri malé oó', «Aníng a xuú' adór Mungú ngira ístí tsaát kuúng uwa hhaamiis as adoorí taa tléhh, slamí hamí hara'ayar'eé' aga sí'.»

Slaqwarár nee múk Israeli

¹⁷ Waawutmo Amasia oo Yuda nee hara'ayuuseerós afo kari ilahariís amór waawutmo Yehoashi garmoó Yehoahasi, garmoó Yehu, waawutmoó Israeli, guri báy, «Qwaláng ti araán.»

¹⁸ Ala Yoashi waawutmoó Israeli afo gana ya/aáw, Amasia guri báy, «Looarka wake mutundarmoó Lebanoni sahhtír Lebanoni gana báy, ‹Garmaaeé' duuxutisang.› Ala makiito'ór sla/a ar wák ina didár waaráhh gway taarariín.

¹⁹ Gimáy daxta Amasia, kuúng a kat, ‹Aníng múk Edomu ugwa tsuú/.› Hamí aga ló'wa daara/út, xaa a tsiní bara do'ók i xaslít. Ahaá waáy, gár slahh'amuú tawo kus leelehhit, kuúng dinkwa nee múk Yuda.»

²⁰ Ala waawutmo Amasia adoorí gaa iiárií qaasiiká, kaangwí amór i dahhi a amór Mungú, asma Mungú daanduuwose ina tsabín nguwa haniisi gawaá dabaá wakuuseerós, asma inós munguaá múk Edomu gina harahhifiít.

²¹ Waawutmo Yehoashi oo múk Israeli iri tláy, tay doogiyé' nee waawutmo Amasia oo Yuda, tiri harasihhiitiyé' slaqwaraaro baraá Bet-shemeshi, tidár yaamaá Yuda.

²² Múk Yuda kway baál nee múk Israeli, umuú heewo iri goów amór do'ós.

²³ Naagáy waawutmo Yehoashi oo Israeli waawutmo Amasia garmoó Yoashi garmoó Ahasi guri dír Bet-shemeshír wa óh, guri huúw Yerusalemu. Koo/ír gixsár Yerusalemu gari feé/ iimír afkú ta bay Efraimu ay afkudá' koo/i niwa warqeér, dír aa feé/ tlenaango a miíta tsiire tsár.

²⁴ Sahaábu nee peésa sleémeero gari ar tláy, tam xosluudaá baraá Doó Mungú, kudá' Obed-edomu i xun, gina ar tláy, nee Obed-edomu gay huúw ay Samaria. Daqaari'iimár doó waawutmo sleeme gari ar tláy, nee muruú hatlae, nee muko, iri waátl Samaria.

²⁵ Waawutmo Amasia alaá waawutmo Yehoashi garmoó Yehoahasi oo múk Israeli iwa gwaá' inós ina hoót kureeri mibaá nee kooán.

²⁶ Tlehhma'aá waawutmo Amasia aa tlehhiít iimír iimu/úngw wa alé ay alhhe'eesaywo, kaa gooín baraá kitaábuú waawituú Yuda nee oo Israeli.

²⁷ Iimír qoomaadá' Amasia AAKOÓ MUNGÚ nguwa máy harahhifooro, wakuuseerós guna adór tlaákwí qoomaamés baraá Yerusalemúr wa ale. Aluuwo Amasia iri /akuút ay yaamaá Lakishi. Ala wakuuseerós guri eehát ay Lakishi, kuri amoodá' i gaás.

²⁸ Tuuarós kari tsa/aás gawaá faraasi, kuri foolár áy baraá /aantaá baabi'iiwós kudaá baraá gixsár Daudi.