2 QOM'I 24 - Biblía Axweesantá Hhohho' ar Mungú 2004

Waawutmo Yoashi oo Yuda

¹ Yoashi kuwa waawutmoó wa qaás kureeriiwós a faanqw. Waawuti'iima gana tleéhh kureeri mibeeri tsiyáhh baraá Yerusalemuro. Aayoorós a Sibia ar yaamaá Be'er-sheba.

² Deelo sleémeero ar Yehoyada kaahamusmoó Mungú iwa slafi, Yoashi hhooeema gina tleéhh dír AAKOÓ MUNGUHE.

³ Yehoyada Yoashi guri tlaawoó tsár i sláy, tlaawaydá' inós nguri na/aá daaqaay nee awa dasú i laqwaaliyé'.

⁴ Aluuwo Yoashi Doó AAKOÓ MUNGÚ guna male /abeés tleehhamooro.

⁵ Naagáy kaahamuusér Mungú nee múk tlahhoó Laáwi gina dinkwárí burumbuúr, giri báy, «Tlawsé' baraá gixsadaá Yuda, ohme oohare' dír múk Israeli sleémeero, as Doó Munguúhúng kuwa /abeesaan tlehhmuuwo umuú kurko. Axáy gaanslutaré'.» Ala múk tlahhoó Laáwi aa gaanslutiiká.

⁶ Naagáy waawutmo geeraharusmooín Yehoyada guri ateét, guri yaahaás, «Ahaá baré múk tlahhoó Laáwi ugwa kángw beeriiká ohmér peésa kawa buruumburi dír múk Yudawo, nee oo Yerusalemuro, ohme adoodá' Mose sagadiyusmoó AAKOÓ MUNGÚ ngira oó', ohmeedá' taa uhín as heémadá' hhoohhoo' ar AAKOÓ MUNGÚ.»

⁷ Asma daaqoó Atalia, /ameenidá' tlaakw, Doó Mungú nguna fee/iyé' niri dahiyé', nee xooslár hhohho' ar Doó AAKOÓ MUNGÚ ngiri huwiyé' baraá doó munguúdá' ta bay Ba'ali.

⁸ Naagáy waawutmo múk Laáwi guri ádbáy, sandakmoó peésa kay qamin kuwa tleehhi nee kuwa qaasi tsee/aá afkú Doó AAKOÓ MUNGÚ.

⁹ Afoorí kari ilahariís baraá yaamaá Yuda nee Yerusalemu, as muu sleémeero ohme ngiwa huwi dír AAKOÓ MUNGÚ, adoodá' Mose sagadiyusmoó Mungú ngira oó' baraá xaanxáy wa alé.

¹⁰ Geeraharuuse sleémeero nee muu sleémeero tari qwalaá/, ohmer'ín ngay huwiyé', ngiri /aytimiisiyé' baraá sandakmoodá', nguri dalaa/iyé'.

¹¹ Múk Laáwi sandakmoodá' ngway huwiyé' dír geeraharuuseedá' waawutmo aa qaás, inooín ngina ariyé' peésár yaariir i deer baraá guruudae. Goousmoó waawutmo dinkwa nee heé wák oo kaahamusmoó úr oo Mungú aa ya/aáw peésa ngiri duuxiyé' baraá sandakmoó wa alé, sandakmoó kaahaár ngway didií ki/isiyé'. Adoorí umuú deelooro ngina /imisiyé'. Peésár yaariir ngiri burumburiyé'.

¹² Waawutmo nee Yehoyada peésaadá' kay haniís dír mukdá' gadiyér tlehhmuú Doó AAKOÓ MUNGÚ sagesihhmiít. Inooín múk doó tlehhiít nee oo peehhoó hhasliít nguri buiyé' ar peésaadár. Inooín múk muqsla ga baál kwahhooro nee muqslár sirda/atene nguri qaasiyé'.

¹³ Gawaá adoorihe mukwí ina ilakaahareés, Doó AAKOÓ MUNGÚ kuri /abeesa hhe'eés, nguri gawdeésiyé' adoodá' aáng i dirii'i.

¹⁴ Do' tleehharo kuwa hhe'eés, sahaábu nee muqsladár peésa aa meti kay huúw dír waawutmo nee Yehoyada. Xooslár Doó AAKOÓ MUNGÚ kay tleéhh ar muqslaadár peésa. Xooslaarí kana gadiyér Doó AAKOÓ MUNGÚ tleéhh. Xooslaá taa tleéhh a búklaay oo ta mooyángwí da/aa/an, nee xooslaá hatlá' awa ilahhooár da/a kar hanmiisi, nee xooslaá sahaábu nee awa peésaaro. Qoomár Yehoyada iwa slafi ilahhooa da/a kana hanmiís ar adoodá' kar hariím baraá DOÓ AAKOÓ MUNGUHE.

Kángw Yehoyada kuwa sií'

¹⁵ Yehoyada iri dín, kureeri tsiiru nee mibeeraá tám ngiwa áy iri gwaá'.

¹⁶ Kuri foól baraá gixsár Daudi, dír /aantaá waawitá, asma inós hhooeema gina tleéhh dír múk Israeliro nee dír Munguhe, nee dír do'ose.

¹⁷ Alaá gwa'arár Yehoyadawo geeraharuusér Yuda ina daqeér dír waawutmo Yoashi, nguri i tumbarara'atiyé', nguri afa /asliyé', inós giri iiárií qaás.

¹⁸ Naagáy muu Doó AAKOÓ MUNGÚ, Munguú baabi'ii'ín, guri máy, munguúdá' ta bay Ashera nguri sluufmisuú ayé', nee slaqsa'aá hatlae, Mungú múk Yuda nee oo Yerusalemu giri i qa/iít.

¹⁹ Tam adoorihe AAKOÓ MUNGÚ aaruuse gana amor'ínií ya/abiít tawa ki/i amoorós, ala muu aaruuseedá' gaa iiárií qaasiiká.

²⁰ Qeeruú Mungú Sekaria garmoó kaahamusmoó Mungú Yehoyada guri i hardáh. Sekaria iri sihhiít geeraá múkwí ale, giri báy, «Ahaá waáy, gár hara'ayár AAKOÓ MUNGÚ kasa sié' a milá? An gár hamí kuungá' gár ta slasleera' is kahh, asma inós kuungá' una sié', nee inós kuungá' naa máy sleeme.»

²¹ Ala inooín nguna fuqurángw i tleehhiyé', nguri tlaquutiyé' ar tlaa/e, nguri gaasiyé' ar afkú waawutmo baraá afeenír Doó AAKOÓ MUNGÚ.

²² Waawutmo Yoashi hhooeemadaá kway tleéhh nee Yehoyada baabuú Sekaria gay gunqareés, garmoó Yehoyada gway gaás. Qoomár Sekaria iwa gwagwa'an ina oó' «AAKOÓ MUNGÚ tlehhmi'iiká ngi ari, nee li/aywí ngu bui.»

Alhhe'eesoó waawuti'iimár Yoashi

²³ Qoomár alhhe'esoó kurko slaqwaruusér Aramu, Yerusalemu nee Yuda gina i haratleér, geeraharuuse sleémeero kay tsuú/, muruú yaariír kway haasaánguú wa huúw amór waawutmoó Damasko.

²⁴ Tam slaqwaruusér Aramu ka niinawe, AAKOÓ MUNGÚ gana aleesleemuú i haniís, asma múk Yuda AAKOÓ MUNGÚ, Munguú baabi'ii'ín nguna si'iyé'. Gawaá adoorihe múk Aramu sakwasleemár AAKOÓ MUNGÚ daanduú Yoashiwo ngiri boo/eesiyé'.

²⁵ Waawutmo Yoashi kuri ló'wa slahh'eés nee múk Aramu, kway geexáy istá gwa'ara. Aluuwo kway fuqurangwár gaás nee sagadiyuuseerós gawaá qatanirós i ale, as adoodá' inós garmoó Yehoyada kaahamusmoó Mungú nguwa gaás. Inós kuri foól baraá gixsár Daudi, ala a dír /antaá waawitaheeká.

²⁶ Mukdá' gwaa fuqurángw ar gaas a Sabadi garmoó /ameenír Amoni, tidá' ta bay Shimeati, nee Yehosabadi garmoó /ameenír Moabu tidá' ta bay Shimriti.

²⁷ Kángw daanduú daaqoó Yoashi nee tleehhamór Doó AAKOÓ MUNGÚ nee aaru'uuma sleémeero daanduuwose, kaa gooín baraá Kitaábuú waawitá. Garmaawós Amasia iri waawuti'ín kitaangós wa aleeró.