2 QOM'I 23 - Biblía Axweesantá Hhohho' ar Mungú 2004

Warqeesár Atalia

¹ Aluuwo qoomár kurkú faanqw, kaahamusmo Mungú Yehoyada ina piíhh tari axweés nee geeraharuusér bohhaá tsiire, Asariya garmoó Yehoramu, nee Ishmaeli garmoó Yehohanani, nee Asariya garmoó Obedi, nee Ma'aseya garmoó Adaya, nee Elishafati garmo Sikri.

² Inooín gixsadu sleémeero awa Yuda kiri harweér as múk tlahhoó Laáwi nee geeraharuusér tlahh'aá Israeli kawa burumbuurin, tay hardáh ay Yerusalemu.

³ Inooín sleémeero tay burumburiít baraá Doó Mungú, nee alqado ngiri tleehhiyé' nee waawutmo baraá do'odá' wa ale, Yehoyada giri báy, «Ga/aawaak, heewí a garmoó waawutmo, gimsé' inós i waawuti'in adoodá' AAKOÓ MUNGÚ ngira al'axweés daanduú xwaylár Daudiwo.

⁴ Adoorí an adór ta tlehha', kuungaásingaá kaahamuusér Mungú nee múk Laáwi an qasitá' baraá daqooray tám, daqtá wák ar kaahamuuse nee ar múk Laáwi, kudaá baalaqaasi deelór Sabaátoro a afkú do' gun xuuná'.

⁵ daqtá hatlá' doó waawutmo gun xuún, nee ar hatlá' Afkuduú Iihhafiiri gun xuún. Muu sleémeero i burumburiiti baraá afeenír Doó AAKOÓ MUNGÚ.

⁶ Heé hatlá' miwa dáh baraá Doó AAKOÓ MUNGÚ, aqo har kaahamuusér Mungú kilós, nee múk Laáwi kudá' baraadá' wa gadiyuús. Kudá' dahma ngi aleeslayá' asma inooín ki hhohho'. Ala múk hatlá' sleémeero dabér AAKOÓ MUNGÚ ngi iialooeesi.

⁷ Múk Laáwi waawutmo ngu harweeriye', nee umuú heewo lawaalarós ngi oohi dakose, heé hatlá' oo dahmaá slaá' baraá Doó Mungú a gaasa. Kuungá' dír waawutmoowo ma quutlara' qoomár bir ti'imiit, laqaá bir darah.»

⁸ Tlahhoó Laáwi nee oo Yuda sleémeero hara'aya sleémeero tidá' Yehoyada kaahamusmoó Mungú aa oó' ngay iiárií qaasiyé'. Umuú geeraharusmowo nee mukós baalaqaasi ngiri oohiyé' ar deelór Sabaáto, slamí bál baalaqaasi bira fák aqo múk hatlá' kun dán, asma kaahamusmo Yehoyada i ya/anká tawa quutli.

⁹ Naagáy kaahamusmoó Mungú Yehoyada geeraharuusér slaqwara gari lawlií haniís nee gaambaá uren nee awa nakwe kudá' aáng awa waawutmo Daudi taa baáts baraá Doó Mungú.

¹⁰ Naagáy muu sleémeero guri qoomeés iimír bihhaá baskú wa alé ay bihhaá do' awa /iya, kitángw ilahhooa hanmis kway harweér nee do'o, umuú heewo dakose i lawaalár kón as waawutmo kuwa xun.

¹¹ Aluuwo garmoó waawutmo ngway tsee/aá i duuxiyé' kwaa saga slamángw i dahaás, kway dabér i haniís. Yehoyada nee daaqaywós ngway iimbalaaxiyé' ar di/i as tawa waawutmo. Muu sleémeero iri baraá/ tawa kaahi, «Waawutámo, sagók fur'a ngu laaleer!»

¹² Qoomár Atalia afór múk ti'i'iím ngiwa axás, nee oo waawutmoó xirfayeemiís ngiwa axás, mukdá' baraá Doó Mungú i dirií' guna artá eér.

¹³ Iwa harqaytsít waawutmoó /abén aa sihhiít bihhaá uhmo dír afkú do'. Bihhaaqae slaqwaruuse nee múk tarumbetadaá ufahhaám taa sihhiít bihhaá waawutmo. Muu sleémeero i baraa/ nee ta tarumbetadaá ufahhán, nee daauuse i xooslaá daa'ángw koón. Waawuto'o tlabaawós gay feehhamís iri ó', «Gaa geewaqata! Gaa geewaqata!»

¹⁴ Aluuwo Yehoyada kaahamusmoó Mungú, geeraharuusér slaqwara gari tsee/aá i duúx, gari báy, «Waawuto'o duuxare' tsee/áy ale baraá tla/ángw slaqwaruuse, heé ngaa eehar gaasaak.» Asma kaahamusmoó Mungú ina oó', «Inós ma gaasara' baraá Doó AAKOÓ MUNGÚ.»

¹⁵ Naagáy ngay oohiyé', kay huúw dír doó waawutmo, kari gaás dír afkú ta bay Afkú Faras.

Qwatsiirír Yehoyada

¹⁶ Yehoyada alqado gari tleéhh, inós nee muu sleémeero nee waawutmowo, as inooín tawa múk AAKOÓ MUNGÚ.

¹⁷ Aluuwo muu sleémeero tari tláy, doó munguúdá' ta bay Ba'ali kway feé/, kiteeridaá ilahhooa nee slaqsaydaá taa tleéhh kiri giqáy, tam Matani kuduú kaahamusmoó Ba'ali kuri gaás didár kitangwduú ilahhooa.

¹⁸ Kaahamusmoó Mungú Yehoyada kaahamuuse nee tlahhoó Laáwiwo giri qaás, as Doó Mungú nguwa amohhe'eemisiya', ar adoodá' inooín Daudi ngira qaás baraá gadiyér Doó AAKOÓ MUNGÚ, as ilahhooár da/a ngiwa hanmiisiya' dír AAKOÓ MUNGÚ, adoodá' kara gooín baraá dabér Mose. Inooín sleeme in baraa/iyá' nee in daaiyá' ar adoodá' Daudi ngira oó'.

¹⁹ Yehoyada xuumuuse gana qaás ar afkú Doó AAKOÓ MUNGÚ xuum, asma heé hhoohhoeeká miwa dáh tam ado gaalá.

²⁰ Yehoyada geeraharuusér slaqwaruuse nee múk urén nee ga/aawuuse nee muu sleémeero waawutmo nguri haydohisiyé' iimír amór DOÓ AAKOÓ MUNGÚ wa ale, ngway waarahhasiyé' ar Afkuduú Gawa ay amór doó waawutmo, ngway iwitisiyé' gawaá kitángw waawuti'iima.

²¹ Naagáy muu sleémeero iri baraá/, gixsár Yerusalemu iri amohhoouúr alaá waawuto'o Atalia kawa gaás ar paánga.