2 QOM'I 22 - Biblía Axweesantá Hhohho' ar Mungú 2004

Waawutmo Ahasia oo Yuda

¹ Múk Yerusalemu Ahasia garmoó aluutmo oo waawutmo Yehoramu, nguna tsawaariyé' ngway waawutmooín wa qaasiyé', asma na/aá hatlá' kaa tsuú/ nee mukko nee múk Ma/araábu ti koomá'. Gawaá adoorihe Ahasia garmoó Yehoramu kuri qaás kitángw baabuúwós i alé baraá Yuda.

² Waawutmo Ahasia garmoó Yehoramu, waawuti'iima ngiwa iimu/ún kureeriiwós a mibeeri tsiyáhh nee tsár, ina baraá Yerusalemúr wa waawuti'ín kuru wak. Aayoorós ka bay Atalia hátnaangór waawutmo Omri oo Israeli.

³ Ahasia ina hoót ar adoodá' doó Ahabuwo tara hoót, asma ságw aayoorós guna /aáy tlakweema tlehhtuuwo.

⁴ Inós tlakweema gina tleéhh dír geeraá AAKOÓ MUNGUHE, adoodá' múk doó Ahabu aa tleéhh. Asma alaá baabuúwós iwa gwaá', múk doó Ahabu tari hara'ayuuseerós as iwa qwaari.

⁵ Inós tidá' waawutmo Yehoramu, garmoó Ahabu oo Israeli, i kaahi gana eehár, tari slaqwarár áy nee waawutmo Hasaeli oo Aramu baraá Ramot-gileadi, nee múk Aramu waawutmo Yoram kuri hariiáy baraá slaqwaradae.

⁶ Naagáy waawutmo Yoram iri kií/ ay baraá gixsár Yesre'eli, as kuwa maasáy haniisi slahh'amaayeedá' aa slayi baraá slaqwarár wa ale. Kár Ahasia garmoó Yehoramu waawutmoó Yuda kaangwí nguwa axaás, waawutmo Yoram garmoó Ahabu guri neetleesi áy baraadaá Yesre'eli.

⁷ Ala Mungú gaa qaroó qoomeés Ahasia kuwa hhaamisi qoomár bira Yoram neetleesi áy. Asma qoomár iwa amoodá' i hardáh inós nee Yoram tana alslaqwarár áy amór Yehu garmoó Nimshi, kudá' AAKOÓ MUNGÚ aa tsawaár doó Ahabu nguwa qwaareesi.

⁸ Qoomár Yehu tidá' kwaa báy nee Mungú ngiwa boo/emisi daanduú doo Ahabuwo, inós tina doogiyé' nee geeraharuusér Yuda dinkwa nee daaqoó hha'aá Ahasia kudá' ngu sagadiyuusá', inós inooín sleémeero giri tsuú/.

⁹ Waawutmo Ahasia guri ló'wa leeleéhh, kuri yaamaá Samariár i áy, aa nahhaát amoodá' i alé, kunguri huúw amór Yehu, kway gaás. Inós kway foól, asma ta kaahi, «Inós a nángw naangoó waawutmo Yehoshafati, kudá' AAKOÓ MUNGÚ gwaa leeleehhh ar muunaáwós sleémeero.» Hee i kaahh tumu wák doó Ahasiawo oo waawuti'iima ga aál.

Waawuto'o Atalia ar Yuda

¹⁰ Qoomár Atalia, aayór Ahasia ngiwa aán adór garmaawós kura gaás, inós hara'aya gari ó' as xwayla sleémeero ar waawuti'iimár Yuda kawa hhaamiisi.

¹¹ Ala Yehosheba dasír waawutmo Yehoramu Yoashi garmoó Ahasia guna ar tleér, guna fís qoomár tawa na/aá waawutmoó tsu/i. Yehosheba dasír waawutmo Yehoramu Yoashi guri lú/ dinkwa nee umtuso'oorós baraá kutuwír qata. Gawaá adoorihe Yehosheba dasír waawutmo Yehoramu, harér kaahamusmo Yehoyada, as tawa hho'ór waawutmo Ahasia, Yoashi guri lú/ as mukuwa gaás nee Atalia.

¹² Yoashi ina hoót dinkwa nee inooín kureeri lahhoó', kuna luú/ baraá Doó Mungú, qoomár Atalia tawa waawuto'ór yaamuudá'.