2 QOM'I 21 - Biblía Axweesantá Hhohho' ar Mungú 2004

¹ Aluuwo Yehoshafati iri gwaá', kuri foól dír /aantuudaá baabi'iiwós kay foól kudaá baraá gixsár Daudi. Garmaawós Yehoramu kitaangós gway óh.

Waawutmo Yehoramu oo Yuda

² Yehoramu garmoó waawutmo Yehoshafati oo Yuda hhae ngi kon a lahhoó', an ín Asariya, nee Yehieli, nee Sekaria, nee Asariya, nee Mikaeli nee Shefatia.

³ Baabuúín gina qeemuú úr i haniís oo peésa, nee sahaábu, nee muruú hatlá' oo hhohhó', nee gixsadaá taa koo/ír gawídí tleéhh awa Yuda. Ala waawuti'iima gana haniís dír Yehoramu asma tawa garmoó baris.

⁴ Qoomár Yehoramu iwa iwiít gawaá kitángw waawuti'iima oo baabuúwós, nee waawuti'iimarós iwa gawduúr, hhaeewós sleémeero gina tsuú/, nee geeraharuusér Israeli bahh'ale.

⁵ Yehoramu waawuti'iima ngiwa iimu/ún kureeriiwós a mibeeri tám nee tsár. Ina Yerusalemúr wa waawuti'ín kureeri dakaát.

⁶ Inós loohidá' tlaakw ar Ahabu waawutmo Israeli gana eehár, asma hareerós a dasír waawutmo Ahabu. Inós tlakweema gina tleéhh dír geeraá AAKOÓ MUNGUHE.

⁷ Tam adoorihe AAKOÓ MUNGÚ doó Daudi nguwa qwaareesi gwa slaiiká, asma alqadoodá' aa oó' dír Daudi xwaylarós iwa waawuti'iin.

⁸ Qoomár waawuti'iimár Yehoramuwo múk Edomu sawaawuti'iimár múk Yuda gana sií', nee waawutmooín ngway tsawaariyé'.

⁹ Gawaá adoorihe, Yehoramu nee geeraharuuseerós nee garduuwós sleémeero tari xweeraá haratláy amór múk Edomu, qoomaarihe múk Edomu Yehoramu nee slaqwaruuseerós sleémeero nee garduuwose kinga harweér.

¹⁰ Gawaá adoorihe múk Edomu tam ay laarí kiwa sawaawuti'in nee múk Yuda ngaa si'iyé'. Qoomaarír kilae sleeme múk Libna waawuti'iimár Yehoramu ngina si'iyé', asma Yehoramu AAKOÓ MUNGÚ Munguú baabi'iiwós guna sií'.

¹¹ Dinkwa nee tihe inós wa/angwduú gawaá gongoama' kudá' munguaá hatlá' kiwa sluufmiisi guna tleéhh gawaá tlom'aá Yuda, múk Yerusalemu guri inkihhimu wasleerár áy, nee múk Yuda guri qwaareés.

¹² Aarusmo Eliya barwito'o gari gooín dír waawutmo Yehoramu iwa kaahi, «AAKOÓ MUNGÚ, Munguú baabuúwók Daudi, i kaahi, ‹Asma kuúng loohír baabuúwók Yehoshafati aga eehatká, laqaá loohír Asa waawutmoó Yuda.

¹³ Ala kuúng ana hót adór waawituú Israeli ira hoót, múk Yuda nee oo Yerusalemu kuri inkihhimu waslés ar adoodá' doó Ahabu múk Israeli ngura inkihhimu wasleés. Slám kuúng hhaeewók, na/aá baabuúwók oo kilá' ina tsú/, slám inooín kin ak hho' ta kunge.

¹⁴ Ga/aaweek, AAKOÓ MUNGÚ mukók gu ló'wa muux, nee na/iiwoge nee tlaawaywoge nee daqaari'iimaroge.

¹⁵ Nee kuúng tiqtír tlakw ar gura' un ót, slam umuú looár tlawa un albuhhaabúhh ay dír waqát sleémeero i tsee/áy faakisi.› »

¹⁶ AAKOÓ MUNGÚ, múk Filisti nee oo Ma/araábu nee oo Kushi guri tleés as tawa slaqwi nee waawutmo Yehoramu.

¹⁷ Inooín yaamaá Yuda kiri i haratláy, daqaari'iimár Yehoramu kay hayóh, nee daaqaywose nee tlaawaywose kiri ar tláy, aqo har garmaawós kuduú aluutmo ta bay Ahasia kuna geexáy.

¹⁸ Alaá tihe, AAKOÓ MUNGÚ guna slaáhh ar tiqtír gura' ar maasoó koomaaká.

¹⁹ Tiqtidá' ina kumaamít ay kureeri tsár, waqatuuwós nay tsee/ií ti'iít as tiqtidá', inós iri gwaá' ar waahare. Mukós asla gaa oohisiiká ar kuwa ilaiwawa/i ar adoodá' baabi'iiwós kira ásltí oohimiís.

²⁰ Yehoramu waawuti'iima ngiwa iimu/ún kureewós a mibeeri tám nee tsár, inós ina baraá Yerusalemúr wa waawuti'ín kureeri dakaát. Qoomár iwa gwaá', heé gwa ale/aa/ i kaahh. Inós kuri foól baraá gixsár Daudi, ala baraá /aantaa waawitaheeká.