2 QOM'I 20 - Biblía Axweesantá Hhohho' ar Mungú 2004

Slaqwara nee múk Edomu

¹ Alaá deelór niinawe slaqwaruusér xoorór Moabu, nee múk Amoni dinkwa nee múk niiná oo Meuni yaamaá Yuda ngina i haratlayé'.

² Ya/abuuse iri hardáh dír waawutmo Yehoshafati kuri báy, «Slaqwaruusér yaariir naa haratleér ar amór Edomu daahh, gayuú tlawtá Diwi. Inooín yaamaá Hasason-tamari nga qaroó hayoohiyé'.» (Gaarí an umuú hatlá' oo yaamaá ta bay Engedi).

³ Yehoshafati iri ló' wa da'ayuút, AAKOÓ MUNGÚ guna ló'wa firín nguwa gan'aasi. Afo gari ilahariís dír muu sleémeero oo yaamaá Yuda as tawa gwaawin.

⁴ Muu sleémeero oo yaamaá Yuda iri burumbuuriít baraá gixsár Yerusalemu as alee/isaay nguwa firina' dír AAKOÓ MUNGÚ.

⁵ Yehoshafati iri sihhiít geeraá mukduú Yerusalemu nee oo Yuda, kudaá burumburiit dír afeenidá' /aben ar doó Mungú.

⁶ Iri firín ar afór ur iwa kaahi, «Aá AAKOÓ MUNGÚ, Munguú baabi'iirén, kuúng a Munguú gawaá doori, xoordu sleémeero in sawaawuti'iín, kuúng a /uuruú koón nee aleesleemu, slamí heé kuúng u tlaampa'aás i kaahh.

⁷ Aá Munguúrén, kuúng yaamuloouusér yaamuuká' aga guskáhe geeraá mukók oo Israeli wa ale, yaamu kiri xwaylár Abrahamu mulqumoowók i hanís as tawa kooín ay alhhe'eesay wasle.

⁸ Inooín naa baraaká wa hootiyé', nee dír hotaawók ngiri tleehhiyé' as umuuwók kuwa ilaiwawaa/i, iwa kaahiya',

⁹ barnaxes amotlakwe taa sleér laqaá slaqwara, laqaá sakwasleema, laqaá tiqtír pu/i, laqaá giyeé, atén an dír geeraá do'owí sihhitaán nee dír geeraawók, asma umuuwók i baraá do'owí, nee qoomár slahh'amuurene nin amoorók i /aa/aán, kuúng atén ti iiárií qas nee ti ba/amis.

¹⁰ «Hamí ga/aaweek múk Amoni, nee oo Moabu nee múk tloomár Seirír daáhh, kudá' kuúng múk Israeli kuwa ilá/ as mukwí mukuwa i haratláy, qoomár inooín niwa baraá yaamaá Misrír wa ti'iitiyé', nee nguna afií wa oohiyé' as mikiwa hhaamiís.

¹¹ Hamí gár atén tira bu'uyé' a, atén tiwa guusiya' baraá yaamuudá' kuúng naa aténí hanisi tawa aalirén.

¹² Aá Munguúrén, sakwasleema a tók, asma atén /uuru u koomanaaká oo nee xooroorí ur naa amoorén i haratleer tawa slaqwaan. Atén adór ta laqaan a xuanaaká, aqo har kuúng un harahhifaán.»

¹³ Qoomaadae hhawaate sleémeero awa Yuda dinkwa nee tlaaway'ine nee na/ii'ine tana sihhiít dír geeraá AAKOÓ MUNGÚ.

¹⁴ Naagáy Qeeruú AAKOÓ MUNGÚ iri hardáh dír heeko wák oo tlahhoó Laáwi oo didií dirií'. Umuuwós a Yahasieli garmoó Sekaria, garmoó Benaya, garmoó Yeieli, garmoó Matania oo guruú doó Asafu.

¹⁵ Yahasieli iri oó', «Iia qaasaak, kuungaá múk Yuda nee yaamuloouusér Yerusalemu dinkwa nee waawutmo Yehoshafati! AAKOÓ MUNGÚ i kaahi, ‹Ma da'ayuumitaara', laqaá ma amoqwaqwadimara' as slaqwaruuseerí yaariir. Slaqwararí a toohungeeká, slaqwaraarí ar Mungú.

¹⁶ Matlo kuungá' i haraatlawaak, qoomár bir gáwtí tsa/a/aná' baraá xatstá Sisír wa alé. Kuungá' i aleesleerá' dír alhhe'eesoó xatsa, dír nira hardihi'iiká dír xaanxoó Yerueli.

¹⁷ Kuungá' a slaqwa'aaká nee inooín, kuungá' ti amohhe'ese' daqaní ka daandá', kuungá' aqo aandá' adór anuú AAKOÓ MUNGÚ nir kitangwhúng wa slaáqw. Kuungá' múk Yuda nee oo Yerusalemu, ma da'ayuumitaara', laqaá ma amoqwaqwadimara'. Tlawsé', slaqwara awaak matlo, AAKOÓ MUNGÚ a dinkwa nee kuungá'.› »

¹⁸ Waawutmo Yehoshafati nee muu sleémeero oo Yuda dinkwa nee yaamuloouusér Yerusalemu AAKOÓ MUNGÚ kway i xupuú' kway sluufmiís.

¹⁹ Múk tlahhoó Laáwi nee oo guruú doó Kohati nee oo Kora tari sihhiít AAKOÓ MUNGÚ, Munguú múk Israeli, nguri xirfayemisiyé' ar afór ló'wa ur.

²⁰ Looa niwa tleér matlaatlér boo/e tana tseewa tláy amór xaanxoó Tekoa. Qoomár tawa tlatlay, waawutmo Yehoshafati ina geeraaín i sihhiít giri báy, «Aá múk Yuda nee yaamuloouusér Yerusalemu, án iiárií qaasaré'! AAKOÓ MUNGÚ haratlintiaak, kuungá' daqaní a gawduurá', nee aaruuseerós haratlintiaak, daqaní kuungá' a baaliindá'.»

²¹ Alaá mukós gurbu'uto nguwa hhe'eés, waawutmo Yehoshafati daauuse gari tsawaár, tlabaaín ngiri dahaasiyé', niri hi'iitiyé' geeraá slaqwaruusér wa alé tawa daai, ta kaahi, «AAKOÓ MUNGÚ sluufmisaak, asma sla'aarirós ar warqawaaká in kumaamít ay alhhe'eesay wasle.»

²² Qoomár daa'aangw kuwa iimu/ún, nee xirfayeemisuuwo, AAKOÓ MUNGÚ slaqwaruuseedár Amoni nee ar Moabu, nee ar tloomár Seirír daahh, tidá' naa haratleer amór múk Yuda, gari amoqwaareés, slaqwara ngiri harslaaqatiyé'.

²³ Múk Amoni nee oo Moabu nay haratlayé' amór múk tlom'aá Seiri, kari ló'wa hhaamiís. Alaá múk tloomár Seiri kuwa hhaamiís, tiri kilooín saki/iyé', tiri faakiyé'.

²⁴ Qoomár slaqwaruusér Yuda tawa hardáh dír /aampadár xuuma, tidár baraá xaanxaay, tawa qaytsiít amór wakuuser'ín, gár taa ár a tu'u yaamu ngaa dalaa/iyé', heé aa meet tumu wák i kaahh.

²⁵ Waawutmo Yehoshafati nee slaqwaruuseerós nay tlayé', haasaánguú hikwaá yaariir nee daqaari'iima, nee tlabá', nee muruú hatlá' oo tlaxo gawdén, kuri ar tláy. Muruuwí kuna loohiís ar har afiqoomár deelo tám, sleeme kwaa faakiká asma ku ló'wa yaariír.

²⁶ Bál tsiyahhe tari burumburiít baraá xatstá ta bay Beraka, AAKOÓ MUNGÚ ngway didá' wa sluufisiyé', didá' kari báy xatstá Beraka tam ay laarí.

²⁷ Naagáy muu sleémeero oo Yuda nee oo Yerusalemuro, dinkwa nee waawutmooín Yehoshafati, tay kií/ Yerusalemu ar qwala/, asma AAKOÓ MUNGÚ inooín gina aleesleemuú i haniís oo tawa qwalaala/i daanduú wakuuser'ine.

²⁸ Tawa hardáh Yerusalemu tana huuwísh baraá Doó AAKOÓ MUNGÚ, tay daá' ar mariímba nee ar gidaandori nee ar tarumbeetadu.

²⁹ Waawituú xoordaá hatlá' kaangwí kuwa axaás, oo AAKOÓ MUNGÚ wakuusér múk Israeli ngiwa baál, inooín Mungú nguri da'ayuutiyé'.

³⁰ Aluudae waawutmo Yehoshafati iri waawuti'ín ar wayda, asma Mungú wayda guna haniís bihhe sleémeero.

Alhhe'eesoó waawuti'iimár Yehoshafati

³¹ Waawutmo Yehoshafati waawuti'iimár Yuda ngiwa iimu/ún kureeriiwós a mibeeri tám nee kooán. Inós ina baraá Yerusalemúr wa waawuti'ii'ín kureeri mibeeri tsár nee kooán. Umuú aayoorós a Asuba dasír Shilhi.

³² Inós aa warqayká, ina hoót ar adoodá' baabuúwós Asa ira hoót, hotaá ganaa'á' gina ar hoót dír geeraá AAKOÓ MUNGUHE.

³³ Tam adoorihe wa/angwduú gawaá gongoama' kudá' munguaá hatlá' kiwa sluufmaamisi gwaa fee/iiká, nee muu muner'ín ngaa amór Munguú baabi'ii'ín xu'usi'iiká.

³⁴ Tlehhma'aá Yehoshafati kudá' naa meetiye' iimír iimu/uungw ay alhhe'eesaay kaa gooín baraá kitaábuú inslaslaangw oo Yehu garmoó Hanani, kitaábuuwí i baraá kitaábuú waawituú Israeli.

³⁵ Alaá tihe waawutmo Yehoshafati oo Yuda tana alqaatuús nee waawutmo Ahasia oo Israeli, kudá' tlakweemaá tlehhaahhiít.

³⁶ Inooín miringér Tarshishír kakaw kana tleéhh, miringeerí kana tleehhamór áy amór Esion-geberi.

³⁷ Ala Elieseri garmoó Dodafahu kuduú Mareshár daáhh iri aarín daanduú Yehoshafatiwo iwa kaahi, «Asma nee Ahasia tawa dinku'usé', AAKOÓ MUNGÚ muruusíng taa tlehhé' gun hhaamiis.» Nee miringeedá' iri qeqtiín tam daqeemuú Tarshishi gway sangw aleesleeriiká.