2 QOM'I 2 - Biblía Axweesantá Hhohho' ar Mungú 2004

Amohhe'eemisuú tleehhamór doó Mungú

¹ Waawutmo Solomon gana istií tsaát Doó AAKOÓ MUNGÚ nguwa tleehhi as tawa dír Mungú kuwa sluufmiis, nee do'ós oo waawuti'iima nguwa tleehhi sleeme.

² Naagáy Solomon múk kume mibeeri faanqw guri tsawaár as huwa loohiso, nee múk kume mibeeri dakaát a múk tlaa/aá tuu'uút gawaá tloomár wa ale, nee múk kume tám nee tsiire lahhoó' a múk gadiyér sagesihhimiít.

³ Solomon afo gari haniís amór waawutmo Hiramu oo Tiro, ar iwa kaahi, «Adoodá' taa baabuúeé' Daudi tléhh kuwa sahhtaárí weerís qoomár iwa tlehhiti, gimáy adoodá' aníng i tleehhang.

⁴ Ga/aaweek hám daxta aníng a doó AAKOÓ MUNGÚ, Munguúeé', tleehhamór wa slaá', ngway paraátl as inós tawa dír ilahhooár mooyángw tsuú' kawa da/aa/an dír geeraawós wa ale, nee tawa dír mikaáte kay qamin dír geeraawós, nee dír ilahhooár da/a/aangw kawa hanmiisi matlaatle nee tsiindoowo nee deelór Sabaátoro, nee deelór slahhángw /aben niwa ti'iít, nee deelór uren ar AAKOÓ MUNGÚ, Munguúrén, adoodá' ngira oó' dír múk Israeli ay kureeraá kureér.

⁵ Aníng doó Mungú oo ni tleehhamór wa slaa' a doó úr, asma Munguúrén ku úr dír munguaá hatlae.

⁶ Ala heé Mungú gu dó' i tleéhh a heemá bar doori nee dooriidá' gáwtí saawá' in bu'utiaaká. Xáy, aníng a heemá nguwa tsuwa dó' i tleehh, aqo har dír mooyángw tsuú' kuwa dirós i da/a/amaánaáke?

⁷ Naagáy, heé xooslár sahaábu ga xuú' tlehhtuuwo ya/aawang, nee ar peésa, nee muqsladá' sirda/aten nee muqslár hatlae, nee tlabaadá' sirda/aten nee awa da/atene nee awa sirbo/e, heé qaali ga baál as iwa algadiyuusiyá' nee mukwí xu'utír koóm oo Yuda nee oo baraakaá Yerusalemu, kudá' taa tsawaár nee baabuúeé' Daudi.

⁸ Xaa'aá sahhta nee kudá' ta bay beroshi nee awa sandali ya/aawang, kudaá Lebanoni. Asma aníng a xuú' sagadiyuuseerók ka ilakaharen peehháy feehhamisuuwo, kuduú baraá Lebanoni, sagadiyuuser'eé' nee tók i algadiyuusiye',

⁹ as peehhoó yaariír nguwa feehhamisiya', asma doó ni tleehhamór wa slaa' a doó ló'wa úr nee oo waa/oo/amo.

¹⁰ Mukduú xaai tlaaqa aníng u /aymiís, ar puuruú angaáno oo taa tuú' oo guniyadu kume tsár, nee guniyadu kume tsár awa angaánooduú shayiri, nee liíta kume tsiire tsiyáhh ar difaái, nee liíta kume tsiire tsiyáhh ar di/i.»

¹¹ Waawutmo Hiramu oo Tiro kangwdá' gway mu/aywaáts ar barwito'o, gari ya/aáw amór waawutmo Solomon, iri oó', «Asma AAKOÓ MUNGÚ mukós nguwa slaá', kuúng uri waawutmooín wa qaás.»

¹² Hiramu iri malé oó', «AAKOÓ MUNGÚ i xirfuuti, Munguú múk Israeli, kudá' doori nee yaamu gaa tleehh. Inós waawutmo Daudi gwaa garmoó sagalooár koóm haniís, nee dahar, nee tsaahharo, as AAKOÓ MUNGÚ nguwa dó' i tleehhi nee do'ós oo waawuti'iima nguwa tleehhi sleeme.

¹³ Aníng Huramu-abi ngwaa ya/aáw, a heé mura' tlehhtuuwo gu baál nee i tsaahhár kón.

¹⁴ Inós a garmoó dasír tlahhoó Dani, nee baabuúwós a heé yaamaá Tiro. Inós xooslár sahaábu ga aleesláy nee ar peesaaro, nee ar muqslár sirda/aten, muqslár hatlá' nee tlaa/e, nee peehháy dako. Nee tlabaá sirbo/, nee awa sirda/aten, nee awa da/atene, nee awa kitaánír hhohho', sleeme ku ilakahaár qaaliro. Inós gár kusa beera ga aleesláy tleehharo. Gimáy inós i gadiyuusi nee mukdá' gadiyeérí ga xuú', kudá' baabuuwók Daudi aa tsawaár.

¹⁵ Hám daxta, kuúnguú aakooeé', muruudá' taa ó', angaáno nee shayiri nee di/ito nee difaáiro, na'ás, ya/aawang amór sagadiyuuseerók.

¹⁶ Atén peehháy ngu feehhisaán ar adoodá' kuúng kur sla' gawaá tloomár Lebanoniro, ngway huwaán ar loohír baraá tlawi ay didár Yopa. Daqaní kuúng ku léhh didií aleeró, ki húp ay Yerusalemu.»

Tleehhamuú doó Mungú iwa iimu/ún

¹⁷ Aluuwo Solomon mukduú /eetuuse oo hooma oo baraá Yerusalemúr hoót guna faár, alaá faaroodá' baabuúwós Daudi aa tleehhi. Inós mukdá' ngwaa sláy a kume tsiiru mibeeri kooán nee tám nee tsiire lahhoó'.

¹⁸ Baraá tla/angw'ín múk kume mibeeri faanqw oo huwa loohiso, nee oo kume mibeeri dakaát in tlaa/aá tuu'utiyá' gawaá tlom'ií wa ale, awa kume tám nee tsiire lahhoó' gadiyeé ngin sagesihhmitiyá' as muu nguwa tliw/ina' baraá gadiyeede.