2 QOM'I 19 - Biblía Axweesantá Hhohho' ar Mungú 2004

Yehoshafati kuwa i gahhaát nee iigu'utusmo Yehu

¹ Waawutmo Yehoshafati oo Yuda iri waátl amór do'ós kuduú waawuti'iima ar saxareema oo baraá gixsár Yerusalemu.

² Iigu'utusmo Yehu garmoó Hanani, iri tláy, waawutmo Yehoshafati gway al'áy, guri báy, «Kuúng múk tlákw un ale/iisár eéra, nee múk AAKOÓ MUNGÚ ahhiít un slá'a? AAKOÓ MUNGÚ ugwa i buúhh as kaangwí taa tléhh.

³ Ala tam adoorihe kuúng hhooeemakaariya' iga tléhh. Slaqsi'i sleémeero kudaá munguúdá' ta bay Ashera iga hingés, nee aga ilakaaharés Mungú kuwa leelehhit ar muunaáwók sleémeero.»

Gadiyér Yehoshafati

⁴ Waawutmo Yehoshafati tam i Yerusalemúr hooti, inós mukós guna alhi'imiít iimír Be'er-sheba bihhaá basko, ay yaamuudaá tlom'i awa Efraimu bihhaá /iiko, asma muu nguwa ki/imiisi amór AAKOÓ MUNGÚ, Munguú baabi'ii'ín.

⁵ Inós har'ohuuse gana qaás baraá umuúqo gixsadaá Yuda sleémeero kudá' koo/i gawden.

⁶ Giri báy, «Ti harmagahhe' baraá gadiyér ta tlehha'a, asma gadiyeérí a daanduú heekoó wa tlehhita'aaká, ala an daanduú AAKOÓ MUNGÚ wa tlehhá', nee inós a dinkwa nee kuungá' qoomár bar kwasleemadá tlaqá'.

⁷ AAKOÓ MUNGÚ na ilaiwawa/aak, ti ló' wa harmagahhe', asma AAKOÓ MUNGÚ, Munguúrén, qitla gu aleeslayká dír kudá' gan'amuú tlehhita'aakahe, laqaá kudá' barqaantír tlehhiitá', laqaá dír kudá' slukmár /ayá'.»

⁸ Slám baraá gixsár Yerusalemuwo Yehoshafati múk tlahhoó Laáwi nee kaahamuusér Munguhe gana qaás, as kwasleemadudaá hara'ayár AAKOÓ MUNGÚ kawa máy ngiwa tlaaqiya', nee qaa/oó hatlae. Inooín gadiyér'ín ngiri baraá Yerusalemúr wa tleehhiyé'.

⁹ Giri hara'ayín, giri báy, «Adoorí an adór gadiyeé kar tlehha' dír AAKOÓ MUNGUHE, masók tundu inkihhím, nee gadiyeé tleehhaak ar munerhúng sleémeero.

¹⁰ Barnaxes hhaeehúng awa baraá gixsadaá hatlá' naa kwasleemadií huwiyé' awa daanduú tsu/uta, nee dabe hhita, nee hara'aya siaasi', laqaá kaahír Mungú siaasi', ló'wa hara'ayimaak as AAKOÓ MUNGÚ mukuwa sadakuús. Kuungá' bar adoorí aga tleehhi'iiká, kuungá' nee hhaeehunge sakwasleemár AAKOÓ MUNGÚ nu sleér. Ala kuungá' adór ganaa' bar aga tlehhé', daqaní dakuús i káhh dirhunge.

¹¹ Ga/aawaak, Amaria kaahamusmoó úr oo Mungú, inós mura' sleémeero oo AAKOÓ MUNGÚ gun sagesihhimiit. Nee Sebadia garmoó Ishmaeli, ga/aawusmoó yaamaá Yuda, inós mura' sleémeero oo waawuti'iima gu sagesihhimiit. Múk tlahhoó Laáwi an geeraharuuserhúng. Mune hhe'eesé', nee AAKOÓ MUNGÚ ta dinkwa nee múk hhó'.»