2 QOM'I 17 - Biblía Axweesantá Hhohho' ar Mungú 2004

Yehoshafati kuwa waawutmoó wa qaás

¹ Yehoshafati kitángw baabuúwós Asa guna aál oo waawuti'iima, nee inós /uuru gway sláy daanduú múk Israeliro.

² Inós slaqwaruuse gana qaás baraá umuú gixsár Yudawo, kudá' koo/ír gawit ngi koomá', nee wa/ángw hatlá' baraá yaamaá Yudawo, nee baraá gixsadaá yaamaá Efraimuwo, kudá' Asa baabuúwós naa hayóh, gari xuumuuseérí qaás.

³ AAKOÓ MUNGÚ tari dinkwa nee Yehoshafati, asma inós slaqsoó baabuúwós kuduú geera guna eehár. Inós munguaá hatlá' awa Ba'ali gaa harahhifiiká.

⁴ Ala inós Munguú baabuúwós guna leeleéhh, dabér Mungú gana ilaiwawaá/. Inós adór waawituú hatlá' oo Israeli gaa eehariiká.

⁵ Gawaá adoorihe AAKOÓ MUNGÚ waawuti'iimár Yehoshafati gari gawdeés daanduú yaamaá Yudawo, nee muu sleémeero ohme gari huúw dirós i alé, iri daqaari'iít iri iia tleerúy.

⁶ Muunaáwós guna baraá lohaá Mungú xu'ús, inós wa/angwduú gawaá gongoama' kudá' munguaá hatlá' kiwa sluufmaamisi guna feé/, nee slaqsi'iidaá munguaá Ashera kudaá baraá yaamaá Yuda giri hingeés.

⁷ Kurkú tám oo waawuti'iimarós Yehoshafati mukós kudá' urén guri ya/aáw baraá gixsadaá yaamaá Yuda, as muu nguwa intsaahhatisiya'. Mukdaá ya/aáw umer'ín a tí: Ben-haili, nee Obadia, nee Sekaria, nee Netaneli nee Mikaya.

⁸ Mukwí tina alkoné' nee múk dakaát oo tlahhoó múk Laáwi nee kaahamuusér Mungú ar tsár. Múk tlahhoó Laáwi umer'ín a tí: Shemaya, nee Netania, nee Sebadia nee Asaheli, nee Shemiramoti, nee Yehonatani, nee Adonia, nee Tobia nee Tob-adoniya. Kaahamuusér Mungú a Elishama nee Yehoramu.

⁹ Inooín kitaábuú hara'ayár AAKOÓ MUNGÚ nguna taataahhiyé', múk Yuda nguri intsaahhatisiyé' baraá gixsadu sleémeerowo awa Yudawo.

Uroó waawuti'iimár Yehoshafati

¹⁰ AAKOÓ MUNGÚ waawitaduú inslaawaay gway dae tlaáq, nee slaqwarár nee xoorór Yuda nee Yehoshafati ngiri naa/iyé'.

¹¹ Múk Filisti qeemuú yaariír nguna huwiyé' nee ohmér peesaaro dír Yehoshafati. Múk Ma/araábu bee/ángw kume faanqw nee tsiire faanqw nee gurtaawér kumér faanqw nee tsiire faanqw ngina huwiyé'.

¹² Yehoshafati /uuruuwós iri ak doogín, inós koo/ír gawit nee kuuntayhe giri tleéhh baraá gixsadaá Yuda.

¹³ Inós gadiyér yaariir gari tleéhh baraá gixsadaá Yudawo, nee baraá Yerusalemuro geeraharuusér slaqwaruuse gana qaás,

¹⁴ ar adoodá' tlahhi'ii'ín i dirii'iya': Adna an geeraharusmoó slaqwaruusér tlahhoó Yuda, slaqwaruuse ngi kon a kume tsiire tám.

¹⁵ Heé tsár uraywo a Yehohanani, inós slaqwaruuse ngi kon a kume tsiire tsár nee mibeeri dakaát,

¹⁶ nee oo tám a Amasia garmoó Sikri. Inós slaqwaruuse ngi kon a kume tsiire tsár. Amasia tina ló'wa haniís ar sla'aari baraá gadiyér AAKOÓ MUNGÚ.

¹⁷ Geeraharusmoó slaqwaruuse oo tlahhoó Benyamini a Eliada, heé ilakaahaár. Inós slaqwaruusér gaambaá koom nee ga/alduwo ngi kon a kume tsiire tsár.

¹⁸ Heé tsár uraywo a Yehosabadi, slaqwaruuseerós ar taa amohhe'es slaqwaraaro a kume tsiiruú wák nee mibeeri dakaát.

¹⁹ Mukwí waawutmo nguna sagadiyuusiyé' baraá Yerusalemúr wa ale, slaqwaruuse bahh'alé gana qaás baraá gixsadaá koo/i gawden awa baraá yaamaá Yuda sleémeero.