2 QOM'I 16 - Biblía Axweesantá Hhohho' ar Mungú 2004

Múk Israeli nee oo Yuda tiwa paraatliyé'

¹ Kurkú mibeeri tám nee lahhoó' oo waawuti'iimár Asa oo Yudawo waawutmo Ba'asha oo Israeli yaamaá Yuda giri i haraatláy, nee gixsár Rama tleehhamoro gay iimu/ún as muu nguwa ilaa/i, kudá' ti'imiít laqaá kudá' daráh baraá ayaá waawutmo Asa oo Yuda.

² Naagáy waawutmo Asa oo Yuda peésa nee sahaábuwo, tidár baraá Doó AAKOÓ MUNGÚ nee baraá do'ose gina leéhh, as ngiwa ya/aawi Damasko dír Ben-hadadi, waawutmoó múk Shamu, nee kuwa bay,

³ «Gám qwaláng, a dinku'usaán adoodá' taati'iirén naa tleehhiyé'. Gám qaytsiít, peésa nee sahaábu ngaa haniís as ilaá hho'. Wakaari qaaseek nee waawutmo Ba'asha, daqaní dooqa múk Israeli gila gi máy daandueene.»

⁴ Waawutmo Ben-hadadi kangwdá' waawutmo Asa i kaahi guri ya/án, slaqwaruuse gari ya/aáw as gixsadaá yaamaá Israeli kiwa hayoohi. Gixsadaá ta i haraatláy a kuká': Iyoni, nee Dani, nee Abel-maimu nee gixsadu sleémeero, nee maraydá' muurú /ayma kway baabatsi awa baraá yaamaá Naftali.

⁵ Waawutmo Ba'asha ngiwa axaás adór kura i haraatláy, gixsár Rama tidá' i tlehhiiti gari máy tleehharo, gadiyeede aa kumitiiká.

⁶ Aluuwo waawutmo Asa múk Yuda sleémeero guri burumbuúr, tlaa/eedá' nee peehháydá' ta gixsár Ramár ar tlehhiiti nee Ba'asha, giri loohatís. Asa xooslarí gari gixsár Geba nee Mispár ar tleéhh.

Iigu'utusmo Hanani

⁷ Qoomaarihe iigu'utusmo Hanani iri tláy ay dír waawutmo Asa oo Yuda, gway báy, «Kuúng slaqwaruusér waawutmoó Aramu ana haraahhíf ta AAKOÓ MUNGÚ, Munguúwoge, gimáy slaqwaruusér waawutmoó múk Aramu aa gawaá dabaawók wa kotsqót.

⁸ Xáy, múk Kushi nee oo Libyawo slaqwaruuser'ín ka ureéke? Nee gaarduuín nee múk faras ngwaa i tsa/ani ki yaariíreéke? Ala kuúng qoomaadae AAKOÓ MUNGÚ una haraahhíf, nee inós inooín ngay haniís gawaá dabaawók i alé.

⁹ Asma AAKOÓ MUNGÚ daanduú yaamu sleémeero gu tsee/aarín as kudá' inkihhimuú koomá' dirose ngiwa /uurií doogi. Ala kuúng daktu'uma aga tléhh, gawaá adoorihe slaqwara i lakitká baraá ayaawoge.»

¹⁰ Axweesantír iigu'utusmo Hanani waawutmo Asa guna buhhtís, Hanani kway dahaás baraá doó tseegamo kway ya'a' tsegiít ar peehhoó iló'. Qoomaadár kilae waawutmo Asa muu bahh ale gway iimu/ún slahh'emisuwo.

Alhhe'eesoó waawuti'iimár Asa

¹¹ Tlehhma'aá Asa awa iimu/uungw nee ay alhhe'eesay kaa gooín baraá kitaábuú waawituú Yuda nee oo Israeli.

¹² Kurkú mibeeraá tám nee gwaleél oo waawuti'iimár Asawo, waawutmo Asa tiqtír ya'a' guna eér. Tiqtidá' guri ló'wa slahhe'és. Ala tam qoomaarihe inós alee/isaay gwaa firiniiká dír AAKOÓ MUNGÚ, ala inós alee/isaay guna leelehhiít dír qwaslaarér wa ale.

¹³ Aluuwo Asa iri gwaá' kurkú mibeeri tsiyáhh nee wak oo waawuti'iimarós.

¹⁴ Kuri foól baraá baa'adá' aa foól baraá tlaa/arí alé, tidár baraá gixsár Daudi. Kuri qaatiís baraá sandakmoó ta mooyángw daa'awemaá dimbadimbé qamaamín, nee asltá ur kari oohiís as ilaiwa/amerós.