2 QOM'I 15 - Biblía Axweesantá Hhohho' ar Mungú 2004

Muruú Asa aa qwaáts.

¹ Qeeruú Mungú ina hardáh dír Asariya garmoó Odedi.

² Inós iri tláy waawutmo Asa guri al'áy gway báy, «Aá waawutmo Asa, nee muu sleémeero oo Yuda nee oo Benyaminiwo, aníng iiárií qaasaré', AAKOÓ MUNGÚ a dinkwa nee kuungá', barnaxes kuungá' a dinkwa nee inós. Kuungá' bura leelehhé' u sleerá', ala bura geexeeré', inós sleeme kuungá' nu geexáy.

³ Asma har afiqoomár yaariire múk Israeli tana hoót Munguú ló' dir'ine i kaahh, nee kaahamusmoó gaa intsaahhatimis i kaahh, nee dabe i káhh sleeme.

⁴ Ala qoomár slahh'amuuine inooín niwa warqayé' amór AAKOÓ MUNGÚ, Munguú Israeli, nguri leeleehhiyé', inós ngway slayé'.

⁵ Qoomaadár aange heé aa tlay niri waátl ar saxareema i kaahh, asma xwataalór yaariir yaamuloouusér aya gana haleelé'.

⁶ Aahhír yaariir ina háts baraá yaamuwo, xooro nee tiqá' tan slaaqw, gixsa nee tiqá' tan slaaqw, asma Mungú muu guna amoqwanoó slahh'amaayér dimbadimbé huúw.

⁷ Ala kuungá' ma mune siaara', ma daba' tsatiitara', asma kuungá' slaqwér gadiyérhúng a sleerá'.»

⁸ Qoomár Asa axweesanoó aarusmo Asariya, garmoó Odedi, nguwa axaás, dabaá gadiyeé giri sláy. Slaqsi'iidaá munguaá hatlá', kudaá baraá Yuda nee Benyamini giri hingeés, nee kudaá baraá yaamuudá' naa hayóh awa baraá tlom'aá Efraimu aqo gina hingeés sleeme. Inós kitangwduú ilahhooár AAKOÓ MUNGÚ kawa hanmaamisi, kuduú baraá matla/angwduú Doó AAKOÓ MUNGÚ, guri /abeés tleehhamooro.

⁹ Asa muu sleémeero oo Yuda nee oo Benyaminiwo guna ateét, nee múk hatlá' kuduú baraá yaamuuwós hoót, múk Efraimu nee Manase nee Simeon. Kuká' tina paraatliyé' dír múk Israeliro, niri hotaá ayé' baraá yaamuuwós qoomár kawa ár AAKOÓ MUNGÚ, Munguúwós, tawa dinkwa nee inós.

¹⁰ Inooín sleémeero tana burumbuuriít Yerusalemúrií ale, qoomár slahhángw tám oo kurkú mibá nee kooán oo waawuti'iimár Asa.

¹¹ Baalaarihe inooín AAKOÓ MUNGÚ nguna ilahhooárií haniisiyé' ar muruú ta tsu/i ar awér tsiire faanqw nee bee/ángw kume faanqw, kudá' tinda haasaáng wa huúw.

¹² Inooín alqado ngiri qaasiyé' ar AAKOÓ MUNGÚ, Munguú baabi'ii'ín, nguwa leelehhiitiya' ar muner'ín sleémeero, nee ar qeereemooín sleémeero.

¹³ Ala umuúqo heewo oo AAKOÓ MUNGÚ, Munguú Israeli, gu leelehhiitaaká, ta masoomo laqaá ta heé aa urayi, laqaá ta hhawaata laqaá ta /ameeni, gár kus hariím aqo gaasa.

¹⁴ Lo'o ngina /ayiyé' dír geeraá AAKOÓ MUNGÚ wa ale ar afór ur, nay ló'wa tseeiyé', tarumbeétadu kari ufaáhh nee xareemiwo.

¹⁵ Múk Yuda sleémeero tana ló'wa qwalaá/, asma lo'o ngiwa /ayiyé' ar muner'ín sleémeero, asma Mungú nguna leeleehhiyé' ar muner'ín sleémeero, nguri slayé'. Inooín AAKOÓ MUNGÚ gay waydií haniís badu sleémeero.

¹⁶ Waawutmo Asa aayoorós Ma'aka gana hiingeés baraá waawuti'iimaro, asma slaqsaydá' ta waki ta bay Ashera guna tléhh. Asa slaqsaywí guna geeqáy, gway daá/, gway kwaáhh baraá xatstá ta bay Kidroni.

¹⁷ Ala tam adoorihe, wa/angwduú gawaá gongoama' tawa ilahhooár hanmaamisi dír munguaá hatlá' baraá yaamaá Israeliro kwa fee/iiká. Ala Asa i inkihhimuú kón dír Munguhe baraá hotaawós sleémeero.

¹⁸ Xooslaadá' sleémeero baabuúwós aa paraátl as Doó Mungú gana ki/is, nee tidá' inós aa paraátl sleeme. Xooslarí ta ki/ís a xooslár peésa nee ar sahaábu nee xooslár hatlá'.

¹⁹ Tana hoót ar wayda baraá yaamuwo ay kurkú mibeeri tám nee kooán oo waawuti'iimár Asa.