2 QOM'I 14 - Biblía Axweesantá Hhohho' ar Mungú 2004

Waawutmo Asa múk Kushi nguwa baál

¹ Aluuwo Abiya iri gwaá', kuri foól baraá gixsár Daudi, garmaawós Asa kitaangós gway óh. Qoomár waawuti'iimár Asawo wayda iri deeruút baraá yaamuwo ay kureeri mibaangw.

² Asa dabaá hhohho' gina tleéhh nee hhooeema gina tleéhh geeraá AAKOÓ MUNGUHE, Munguúwós.

³ Baraá yaamuwo kiteeraá munguaá hatlá' kiwa sluufmiís gina hingeés nee wa/ameedár gongooama' ar munguaá hatlá' kiwa slufmiisi gari hingeés nee uheemidaá giri tlaáq, slaqsi'iidaá Ashera giri supín.

⁴ Asa múk Yuda guna ádbay, AAKOÓ MUNGÚ, Munguú baabi'ii'ín nguwa leelehhiya', nee dabeerós nee hara'ayarose ngiwa iialooeesiya'.

⁵ Inós sleeme kiteeraá munguaá hatlá' kiwa sluufmamisi, kudaá gawaá gongooama' nee kiteeraá mooyángw tsuú' kuwa hanmamisi, gina hingeés baraá gixsadaá Yuda sleémeero, nee yaamuuwós niri waydúr hootiyé' qoomár waawuti'iimarose.

⁶ Qoomár yaamu iwa wayduú kona', Asa gixsadaá koo/i gawden gina tleéhh baraá Yudawo, slaqwara naa ti'iitiká baraá kureeridae, asma AAKOÓ MUNGÚ wayda nguwa haniís.

⁷ Inós múk Yuda guri báy, «Gimsé', gixsaduurén i harweeraán ar koo/ír gawit, nee /aampu nee afe kay tseegaán. Yaamu i gawaá dabaarén i diri'iyá', asma atén AAKOÓ MUNGÚ, Munguúrén una leelehhaán. Inós atén una leelehhaán, tiri waydií haniís umuú barto.» Naagáy inooín gixsadu ngiri aleeslayé' tleehharo.

⁸ Waawutmo Asa slaqwaruusér gaambaá koom nee ar lawlaá koom ngi kon a kume tsiire tám baraá múk Yudawo, nee baraá múk Benyaminiwo a muu kume tsiire tsár nee mibeeri dakaát, oo gaambaá koóm nee oo lawlaá koóm. Kuká' sleémeero an miguusér slaqwara.

⁹ Sera heé yaamaá Kushi yaamaá Yuda gina i haratláy ar slaqwaruusér kume kumuú wák nee gaardaá tsiire tám, iri geerií kumiít ay Maresha.

¹⁰ Asa iri tláy as nee inós tiwa doogiya'. Inooín tsaraawo tiri amohhe'eesiyé' baraá xatstá Sefata tidár iisaapoó Maresha.

¹¹ Asa iri /aá/ dír AAKOÓ MUNGÚ, Munguúwós, iri oó', «Aá AAKOÓ MUNGÚ, diroge dimbé i káhh gár ta alee/iimis bar slaqwaruusér /uuruú koom laqaá ar daqatlakw. AAKOÓ MUNGÚ, Munguúrén, atén kuúng ti alee/is, asma atén kuúng ugwa harahhifaán, ar baraá umuuwoge atén naa slaqwarár awaán dír slaqwaruuseérí yaariir. Aá AAKOÓ MUNGÚ, kuúng an Munguúrén, ala kuúng ma ya/amaar nee hee tiwa tlampa'asa'.»

¹² Naagáy AAKOÓ MUNGÚ múk yaamaá Kushi guri baál geeraá Asa nee múk Yuda. Múk Kushi iri goów.

¹³ Waawutmo Asa dinkwa nee slaqwaruuseerós mukdá' kway guús ay Gerari, múk yaariír oo Kushi kuri tsuú/, tam oo aa meet i kaahh, asma inooín kaa baál nee AAKOÓ MUNGÚ nee slaqwaruuseerós. Slaqwaruusér Yuda haasaánguú yaariír guri hayoohiín.

¹⁴ Gixsadaá iisapoó Gerari giri arbaá/, asma múk baraá gixsaduudá' ina da'ayuút as AAKOÓ MUNGÚ. Slaqwaruusér Yuda haasaánguú yaariír guri ar tleér, asma baraadae muruú yaariír i ló'wa deer.

¹⁵ Slaqwaruusér múk Yuda sleeme de'eemuusér bee/aangw gana /amatsék, kiri bee/aangw hayóh nee aaraawo nee angamíaro. Nay ki/iyé' ay Yerusalemu.