2 QOM'I 13 - Biblía Axweesantá Hhohho' ar Mungú 2004

Slaqwarár Abiya nee Yeroboamu

¹ Abiya waawuti'iima ngiwa iimu/ún baraá Yudawo, a kurkú mibaá nee dakaát oo waawuti'iimár waawutmo Yeroboamu.

² Kureeraá tám dír ngiwa waawuti'ín a Yerusalemu. Aayoorós a Ma'aka dasír Urieli kuduú Gibea. Abiya nee Yeroboamu tana slaáqw.

³ Abiya slaqwaruusér kume tsiire tsiyáhh ar miguuse gana amohhe'eés, nee Yeroboamu slaqwaruusér kume tsiire dakaát gana amohhe'eés as tiwa tlampa'aasiya'.

⁴ Waawutmo Abiya iri sihhiít gawaá ságw tloomár Semaraimu tidár baraá tla/eeraá tlom'aá Efraimu, Yeroboamu nee múk Israeli giri báy, «Aníng iiarí qaasaré', kuúng Yeroboamu, nee mukók sleémeero oo Israeli!

⁵ Xáy, a xua'akáhe adór AAKOÓ MUNGÚ, Munguú Israeli, Daudi nguwa alqadór i oó' ar baloó warqawaaká iwa kaahi, waawitá sleémeero oo múk Israeli dír iwa ti'iiti a baraá xwaylár Daudi?»

⁶ Ala Yeroboamu garmoó Nebati, sagadiyusmoó Solomon garmoó Daudi, ina dee/anuút dír aakoowose.

⁷ Aluuwo múk barawaslén guna dinkwár i burumbuúr, inooín Rehoboamu garmoó Solomon nguri al/ayiyé'. Tidá' inooín ta slai gari tleéhh, qoomaarihe inós ila/aro gina harslaaqaát asma a masoomoó aa kwa/iiká.

⁸ Hamí daxta kuungá' ka xua' waawuti'iimár AAKOÓ MUNGÚ ila/aro aqo alesleerá'a, tidá' inós aa xwaylár Daudi haniís, asma kuungá' slaqwaruusér yaariir a koondá' nee slaqsa'aá damaay kudá' Yeroboamu aa tlehhiít ar sahaábu tawa munguihúng.

⁹ Xáy, kuungá' kaahamuusér AAKOÓ MUNGÚ tidár xwaylár Aroni nee múk tlahhoó Laáwiwo iga gusi'iikáhe, kaahamuuserhúng kari qasi'iíke adór xoordaá hatlá'? Umuúqo heewo oo naa dirhúng i hardah ar awu, laqaá gwaandaawér faanqw, un paratlá' tawa kaahamusmoohúng.

¹⁰ «Ala bartarene, AAKOÓ MUNGÚ an Mungú, slám ugwa baloó geexawaniiká, kaahamuusér Mungú ar ta koomaan ar tlahhoó Aroni, tidá' AAKOÓ MUNGÚ sagadiyuus, kin alee/iimiis nee múk tlahhoó Laáwi.

¹¹ Umuú matlaatle nee tsiindoowo kaahamuusér Mungú ilahhooár da/a/aangw kan AAKOÓ MUNGÚ i hanmaamiis, nee mooyángw tsuua, nee mikaátér Mungú tidá' taa qaás gawaá meésaadá' taa tleéhh ar sahaábú hhohhó', nee kitángw tsaa'aso kay qamin ngun amohhe'eemisiyá', kudá' taa tleéhh ar sahaábu, as tsaa'aso kawa oohamiisi umuú tsiindoowo. Atén adoodá' AAKOÓ MUNGÚ, Munguúrén, i slai an tlehhiitaán, ala kuungá' inós ugwa geexeeré'.

¹² Ga/aawaak, Mungú inósuú kilá' an geeraharusmoorén, nee kaahamuusér Mungú i taruumbetadaá koón, taa amohhe'és ufahharo, as tawa layár slaqwara imu/uuma nee kuungá'. Kuungá' múk Israeli, ma slaqwara' nee AAKOÓ MUNGÚ, Munguú baabi'iihúng, asma kuungá' a baloó baalinda'aaká.»

¹³ Ala qoomaarihe Yeroboamu slaqwaruuse bahh'alé gana ya/aáw as slaqwaruusér Yuda kawa aluú wa haramamahhati, slám slaqwaruuse tooka i geerií dirí'.

¹⁴ Múk Yuda tawa alií qaytsiít tari da'ayuút, kawa ár kaa harweér, niri /aa/iyé' dír AAKOÓ MUNGÚ, kaahamuusér Mungú tarumbeetadu giri ufáhh.

¹⁵ Naagáy slaqwaruusér Yuda tay tseé' ar afór slaqwara, adoorí kawa tleéhh, Mungú arba/ati gay haniís. Mungú Yeroboamu nee slaqwaruusér Israeliro giri baál dír geeraá Abiya nee slaqwaruusér Yuda wa ale.

¹⁶ Múk Israeli iri goów geeraá múk Yuda wa alé, Mungú giri haniís gawaá dabaá múk Yuda.

¹⁷ Abiya nee slaqwaruuseerós slaqwaruusér Israeli kari ló'wa tsuú/. Slaqwaruusér miguuse ar Israeli kaa tsuú/ a kume tsiire kooán.

¹⁸ Gawaá adoorihe, múk Israeli deeloodae iri ya/aa/án, múk Yuda arba/ati gana sláy daanduú múk Israeliro, asma inooín AAKOÓ MUNGÚ nguna harahhifiyé', Munguú baabi'ii'ín.

¹⁹ Yeroboamu kuri guús nee Abiya kway gixsadu hayóh. Gixsadaá taa hayóh a kuká': Beteli, nee Yeshana, nee Efroni, dinkwa nee ayeemaá isaapoó gixsaduuká'.

²⁰ de'emaá Abiyawo Yeroboamu /uuru gwaa baloó slayká. Aluuwo kuri slaáhh nee AAKOÓ MUNGÚ, iri gwaá'.

²¹ Ala Abiya iri kumiít, /uuru guri ló'wa sláy. Tlaawoó mibaá nee tsiyáhh guri duxuút, na/aá daaqaay ngaa laqwaál a mibeeri tsár nee tsár, nee awa dasu a mibaá nee lahhoó'.

²² Tlehhma'aá hatlá' awa Abiya nee gadiyér aa tleéhh nee /aymi'iwose kaa gooín baraá kitaábuú alki/ituú aarusmo Ido.