2 QOM'I 12 - Biblía Axweesantá Hhohho' ar Mungú 2004

Múk Misri iwa haraatláy Yuda

¹ Qoomár waawuti'iimár Rehoboamu /uuru nguwa sleér, inós nee mukós sleémeero dabér AAKOÓ MUNGÚ ngina mayé' ilaiwa/amero.

² Asma inooín niwa inkihhimu wasleesiyé' dír AAKOÓ MUNGUHE, qoomár kurkú kooán oo waawuti'iimár Rehoboamuwo, Shishaki, waawutmoó Misri, gixsár Yerusalemu gay i haratláy.

³ Gaardu ngi kon a kumuú wák nee tsiire tsár, nee múk faras gwaa i tsa/an a kume mibeeri lahhoó'. Slaqwaruuse ka yaariir, faarooro ka aleeslayká, tidá' yaamaá Misrír daahh dinkwa nee inós: Múk Libya, nee oo Suki, nee oo Kushi.

⁴ Gixsaduudá' koo/i gawden awa Yuda giri hayóh iri hardáh ay Yerusalemu.

⁵ Naagáy aarusmo Shemaya waawutmo Rehoboamu nee geeraharuusér Yudawo gina i daqáy, kudá' naa burumburiitiye' Yerusalemu as tawa goów Shishaki wa ale, giri báy, «AAKOÓ MUNGÚ i kaahi, ‹Kuungá' aníng iga geexeeré', ala gawaá adoorihe aníng kuungá' naa geexáw, nee nuri haniís dír waawutmo Shishaki.› »

⁶ Naagáy ala waawutmo nee geeraharuusér Israeliwo tiri niinaweesiyé', tari oó', «AAKOÓ MUNGÚ adór ganaa' gaa tleéhh.»

⁷ Qoomár AAKOÓ MUNGÚ ngiwa ár adór mukdá' inooín tira niinaweesiyé', Shemaya axweesantá AAKOÓ MUNGÚ gari axaás i kat, «Inooín taa niinaweesiyé', i hhaamisaaká, alaá deelór niinawe i tuú/. Gixsár Yerusalemu a qwaareesaaká ar buhhtaeé' ar loohír waawutmo Shishaki.

⁸ Ala inooín ngu sagadiyusiyá', as kahhó' kawa tsaahhi adór aníng tir sagadiyuusi tar dimbé nee waawutuú baraakaá yaamuwo kuwa sagadiyuusi.»

⁹ Naagáy waawutmo Shishaki gixsár Yerusalemu gari i haratláy, xosluudá' taa baraá Doó Mungú i baáts, nee doó waawutmowo gari ar tláy, nee umuú gaaro, nee gaambuudá' ta tleéhh ar sahaábu nee waawutmo Solomon sleéme giri ar tláy.

¹⁰ Kitángw gaambór sahaábuwo waawutmo Rehoboamu gambu giri tleéhh ar muqslír sirdaa/aat, nee giri haniís dír xuumuusér afkú doó waawutmo.

¹¹ Umuú daqto qoomár waawutmo bir baraá Doó AAKOÓ MUNGÚ káy, xuumuuse gambu gin aluuwós wa gagát, aluuwo ngiri ki/isiyá' amór doó xuuma.

¹² As adoodá' inós tiwa niinaweés, AAKOÓ MUNGÚ mune gay guú/, Mungú gwaa ak hhaamisiiká. Tam adoorihe yaamaá Yuda nay hhooayé'.

Gwa'arár Rehoboamu.

¹³ Waawutmo Rehoboamu /uuru guri sláy baraá Yerusalemu nee iri waawuti'i'ín. Qoomár waawuti'iima ngiwa iimu/ún, kureeriiwós a mibeeri tsiyáhh nee wak. Inós kureeri ngaa /aáy mibaá nee faanqw baraá waawuti'iimár Yerusalemuro, gixsadá' AAKOÓ MUNGÚ aa tsawaár baraá gixsadaá Israeli sleémeero as inós kuwa baraadá' wa sluufmiisi. Aayór Rehoboamu a Na'ama, tidár xoorór Amoni.

¹⁴ Rehoboamu tlakweema gina tleéhh, asma AAKOÓ MUNGÚ gwaa leelehhiiká ar muunuuwós sleémeero.

¹⁵ Tlehhma'aá waawutmo Rehoboamu iimír iimu/úngw wa tleemu ay alhhe'eesaay kaa gooín baraá kitaábuú iinslaaslángw aarusmo Shemaya, nee baraá kitaábuú iinslaaslángw tlahhi'i oo iigu'utusmo Ido. Qooma sleémeero slaqwara i daadeer tla/ángw waawutmo Rehoboamu nee Yeroboamuwo.

¹⁶ Aluuwo Rehoboamu iri gwaá' kway foól baraá gixsár Daudi, nee garmaawós Abiya kuri waawutmoó wa qaás kitaangós wa aleeró.