2 QOM'I 11 - Biblía Axweesantá Hhohho' ar Mungú 2004

Aaru'uumár Shemaya

¹ Rehoboamu iwa Yerusalemúy hardáh, inós slaqwaruusér slaqwara ga ló'wa baal ar tlahhoó Yuda nee Benyamini, gari burumbuúr. Dinkwaaro a kume tsiiruú wák nee mibeeri dakaát. Adoorí gana tleéhh as kahhó' tawa slaqwi nee tlahhi'iidá' mibaangw awa Israeli, nee as waawuti'iima ngiwa amoorós i ki/isi.

² Ala Shemaya, heé Mungú, axweesantá AAKOÓ MUNGÚ gari axaás, iwa kat,

³ «Rehoboamu garmoó Solomon, waawutmoó Yuda, nee múk Israeli kudá' sleémeero baraá Yuda hoót, nee oo Benyaminír hoót, ki beer,

⁴ ‹Anuú AAKOÓ MUNGÚ a kah, Ma slaqwarár awaara' amór hhaeehúng, umuú heewo i amór do'ós i watli, asma gaarí amór i dahh a amor'eé'.› » Naagáy inooín axweesantadár AAKOÓ MUNGÚ ngay iialooeesiyé', tari waátl, slaqwarár nee Yeroboamu ngay mayé'.

Rehoboamu gixsadu ngiwa gawdeés

⁵ Waawutmo Rehoboamu iri hoót Yerusalemu wa alé, nee gixsaduudaá Yuda sleémeero giri ku/aá gawdén i tleéhh.

⁶ Gixsadaá aa tleéhh a kuká': Betilehemu, nee Etamu, nee Tekoa,

⁷ nee Bet-suri, nee Soko, nee Adulamu,

⁸ nee Gati, nee Maresha, nee Sifu,

⁹ nee Adoraimu, nee Lakishi nee Aseka,

¹⁰ nee Sora, nee Ayaloni nee Hebroni. Gixsaduuká taa koo/i gawdeés i baraá yaamaá Yuda nee awa Benyamini.

¹¹ Koo/ír gixsaduuká' gay tleehha hhe'eés, baraadae geeraharuusér slaqwara gari qaás, nee maraá kuuntoó muruú /ayma kway babaatsi giri tleéhh, nee di/i nee difaái.

¹² Baraá umuúqo gixsaro gaambaá uren nee lawluwo giri qaás, gixsaduudá' giri ló'wa gawdeés. Naagáy yaamaá Yuda nee awa Benyamini inós giri óh.

Kaahamuusér Mungú nee múk tlahhoó Laáwi tawa lóh baraá yaamaá Yuda.

¹³ Kaahamuusér Mungú nee múk tlahhoó Laáwiwo, kudá' baraá yaamaá Israeli diriiá', nguri i daqayé' baraá yaamaá Yuda.

¹⁴ Múk tlahhoó Laáwi yaamuuín nee qawtanti'ine ngay geexayé' niri loohiyé' baraá yaamaá Yuda nee Yerusalemu, asma Yeroboamu nee daaqaywós ngina ilaa/iyé' Mungú nguwa sagadiyuusiya' adór kaahamuusér AAKOÓ MUNGÚ wa ale.

¹⁵ Yeroboamu kaahamuuseerós gana tsawaár ar gadiyuus wa/ameedár gawaá gongoama' ar munguaá hatlá' kiwa sluufmiisi nee neetlaameero nee slaqsa'aá damaay.

¹⁶ Mukdá' sleémeero AAKOÓ MUNGÚ, Munguú Israeli, slaá' ar muunuú tsáp baraá tlahh'aá Israeliro, nee múk tlahhoó Laáwi tari alkoné' ay yaamaá Yerusalemu as AAKOÓ MUNGÚ Munguú baabi'ii'ín nguwa ilahhooár muruú ta tsu/í hanisiyá'.

¹⁷ Gawaá adoorihe inooín waawuti'iimár yaamaá Yuda ngay /uurií qaasiyé', har afiqoomár kureeraá tame. Rehoboamu garmoó Solomon nguna dawa oohiyé', waawuti'iimarós /uuru gway sleér, tay hoót ar adoodá' tara hoót qoomár waawuti'iimár Daudi nee ar Solomonuwo.

Múk doó Rehoboamu.

¹⁸ Rehoboamu Mahalati dasír Yerimoti garmoó Daudi gari duúx. Aayoorós an Abihaili dasír Eliabu garmoó Yese.

¹⁹ Inós daaqoó tám gway laqwál, umer'ín a tí: Yeushi nee Shemaria nee Sahamu.

²⁰ Aluuwo Rehoboamu Ma'aka dasír Absalomu gari duúx, inós iri laqwál: Abiya, nee Atai, nee Sisa nee Shelomiti.

²¹ Rehoboamu tlaaway ngu kon a mibaá nee dakaát, /ameenár quturmo wasl a mibeeri lahhoó'. Daaqaay ngwaa laqwaál a mibeeri tsár nee dakaát, nee dasu ngu kon a mibeeri lahhoó'. Ma'aka dasír Absalomu gaa ló'wa slaá' baraá tlaawaywose nee /ameenadár quturmo wasle.

²² Gawaá adoorihe, Rehoboamu Abiya garmoó Ma'aka guri uráy wa qaás dír hhaeewose, asma gana slaá' nguwa waawutmoó wa qaasi.

²³ Rehoboamu ina fuqurín daaqaywós oo hatlá' guri loohatís baraá yaamaá Yuda nee awa Benyamini, giri qaás baraá gixsadaá koo/i gawden. Inooín giri muruú /aymár yaariír i haniís nee umuú garmaawo guri tlaawoó yaariír i sláy.