2 QOM'I 10 - Biblía Axweesantá Hhohho' ar Mungú 2004

Dee/aanuú tlahh'aá bihhaá /iya

¹ Naagáy Rehoboamu iri tláy baraá Shekemu amoodá' múk Israeli sleémeero i burumburiít as inós kuwa waawutmoó wa qaasi.

² Qoomár Yeroboamu garmoó Nebati adoorí ngiwa axaás (qoomaarihe inós i baraá yaamaá Misri, ina amoodá' i goów asma Solomon) nay amór yaamaá Misrír wa hardáh.

³ Ala Yeroboamu múk Israeli guna afór i ya/aáw. Aluuwo inós nee múk Israeli sleémeero Rehoboamu kuna i daqáy kway báy,

⁴ «Atén baabuúwók tina huwár iloóí tsa/aás, gám huwaarí /aareseek, atén kuúng un sagadiyusaán.»

⁵ Rehoboamu gay báy, «Bál tame ki/aaré', aníng kuungá' daqaní nu mu/aywaáts.» Naagáy inooín tari waátl.

⁶ Aluuwo Rehoboamu hara'aya gari leéhh dír bariiseedár hara'ayuusér baabuúwós, qoomár baabuúwós iwa slafi, gari báy, «Xáy, kuungá' ma katá', mukwí mu báw?»

⁷ Bariiseedá' gway mu/aywáts, guri beér, «Mukwí bura sa hhooeér, nee bura sla'atís, nee bar aga /ayma'aá tsuuár axwés dir'ín, daqaní kuúng u sagadiyuusiyá' ay kureér.»

⁸ Ala Rehoboamu hara'ayadár bariise gana waaqaá', iri tláy masoombár qartós gari yaahaás, tidaádár hara'ayuuseerós.

⁹ Naagáy giri yaahaás, «Xáy, kuungá' ma katá', mukwí mu báw, kwí aníng i babáw, ‹Huwaadá' ur ar baabuúwók naa atén i tsa/aás /aareseek?› »

¹⁰ Masoombadár qartós gway beér, «Muksíng kuúng ugwa bay, ‹Baabuúwók taa huwár iloó i tsa/aás ala kuúng /aareseek.› Kuúng inooín ki adoorí beér, ‹Diitsar'eé' ar na/áy kaqo ló' wa yangaariir ta tla/ángw baabuúeene.

¹¹ Huwár kuungá' baabuúeé' nay tsa/aás ka ur, ala huwár aníng nuy tsa/aas ka iloo' ta tidár baabuúeene. Baabuúeé' kuungá' nuna muúx ar qawaay, ala aníng kuungá' nun muúx ar xiiraawe.› »

¹² Naagáy muu nee Yeroboamu bál tame nay ki/iyé' dír Rehoboamu, adoodá' aáng ngira báy, «Ki/aaré' bál tame.»

¹³ Waawutmo Rehoboamu mukdá' gway mu/aywaáts ar xarasleema, hara'ayadár bariise gana waaqaá',

¹⁴ ar masoombár qartós gari eehár iri oó', «Baabuúeé' kuungá' nuna huwár iiloó i tsa/aás, ala aníng huwár iiloeemawo ar baabuéé' ga baa/ ngin gawaahúng i tsa/aás. Baabuúeé' kuungá' nuna muúx ar qaw'i, ala aníng kuungá' nun muúx ar xiiraawe.»

¹⁵ Gawaá adoorihe, waawutmo mukwí gwaa iiárií qaasiiká, asma gaarí ar dákw Mungú as axweesantá AAKOÓ MUNGÚ tidá' aa oó' dír Yeroboamu garmoó Nebati ar loohír Ahiya oo Shilo iwa bo/.

¹⁶ Múk Israeli kawa tsaáhh adór waawutmo ngira gaárí xuiiká, nguri mu/aywatsiyé', «Dinku'uumár atén nee doó Daudi a milá? Aalír ta koomaán i káhh dír garmoó Yesewo. Aá múk Israeli, umuú heewo i watli amór do'ós. Aá Daudi, do'ók kilók Ga/aaweek.» Múk Israeli iri waátl amór maray'ín.

¹⁷ Ala Rehoboamu múk Israeli kudá' baraá gixsadaá Yuda hoót guna sawaawuti'ín kilós.

¹⁸ Aluuwo waawutmo Rehoboamu Hadoramu, kudá' úr oo gadiyér /uuru ga sagesihhmiít, guri ya/aáw amór múk Israeli, kuri tlaquút ar tlaa/e, kway gaás. Waawutmo Rehoboamu gaárirós gari i tsa/án ar gaanslaay, iri ta'aaín ay Yerusalemu.

¹⁹ Gawaá adoorihe iimír baalaadae tlahhi'iidá' mibaangw awa xoorór Israeli niri si'iyé' kiwa sawaawuti'in nee tlahhoó Daudi ay laarí.