2 QOM'I 1 - Biblía Axweesantá Hhohho' ar Mungú 2004

Waawutmo Solomon sagalooa ngiwa firín

¹ Solomon garmoó waawutmo Daudi waawuti'iimarós gana gawdeés. AAKOÓ MUNGÚ Munguúwós i dinkwa nee inós, inós kuri iiatleereés nee Mungú.

² Waawutmo Solomon múk Israeli sleémeero guri ateét dinkwa nee geeraharuusér slaqwaruusér kume nee ar tsiire, nee geeraharuusér Israeli sleeme nee har'ohuusero nee múk urén oo tlahhi'i.

³ Naagáy Solomon nee inooín tari alkoné' tari sluufmisuú áy didár gaawaá gongoamo ar sluufmis ar baraá Gibeoni. Tana amoodá' káy, asma heémaadár Mungú i amoodá', tidá' aáng Mose sagadiyusmoó AAKOÓ MUNGÚ aa tleéhh baraá xaanxáy wa ale.

⁴ [Ala Sandakmoó alqadór Mungú, Daudi gwaa qaroó ar tláy amór Kiriat-yearimu wa alé ay Yerusalemu didá' aa amohhe'eés nee aa heémárí siíhh.]

⁵ Kitangwduú ilahhooa oo muqslír sirdaa/aat, kudá' Besaleli garmoó Uri, garmoó Huri aa tleéhh, i dír geeraá heémár AAKOÓ MUNGÚ, Solomon nee mukdá' Mungú ngway didá' wa firiné'.

⁶ Waawutmo Solomon iri tláy ay dír geeraá kitangwdú muqslír sirdaa/aat oo dír geeraá AAKOÓ MUNGÚ i dirií', kudá' baraá heémár Mungú i dirií', ilahhooár da/a/aangw oo kumuú wák gay gawaadá' i haniís.

⁷ Xweeradaá kilae Mungú tiri geehhooeés dír Solomon gway báy, «Gár kuúng ta sla' firiimang, aníng ngi haniís.»

⁸ Solomon Mungú guri báy, «Kuúng daqisleém sla'aarír ur ar warqawaaká aga laqaán dír baabuúeé' Daudi, nee hamí aníng iga qás kitaangós wa alé as tawa waawutmo.

⁹ Aá AAKOÓ MUNGÚ, Mungú, gimáy daxta al'axweesantadá' taa ó' dír baabuúeé' Daudi boo/eseek. Asma aníng kuúng iga waawutmoó wa qás oo mukwí yaariír adór hhasaangw oo faarooro ni aleeslawaaká.

¹⁰ Gimay daxta sagalooa nee xu'uti haniisang, as kahhó' mukók kwí nguwa sawaawuti'iima ar adór ganaa', asma bar adooriheeká mukók kwí adoorír yaariír adór ngur aleeslaw sawaawuti'iimaro a adoomá?»

¹¹ Mungú Solomon guri mu/aywaáts, nguri báy, «Kuúng tsawdór taa tléhh i ganá'. Asma tí taa firiín iwa baraá muunaáwók i diri', ala daqaari'ima aga firindiiká, laqaá diihhooa, laqaá ilaiwa/ame, laqaá wakuuseerók kawa hhaamis, laqaá hotaá tleer, ala kuúng gár taa firiín a sagalooa nee xu'uti as muk'eé' kuwa sawaawuti'iin, mukdá' aníng kuúng uwa waawutmooín wa qaás.

¹² Aníng sagalooa nee xu'utiro ngi haniís, nee aníng sleeme daqaari'iimár ur ngi haniís, nee diihhooaro, nee ilaiwa/amér ur tidá' handá' waawutmoó geerawoge gaa slay i kaahh, laqaá oo sleeme aluuwoge ga sangw sláw i kaahh.»

/Uuruú waawutmo Solomon nee daqaari'iimaro

¹³ Solomon niri kií/ amoodár gawtá wa ale, amoodá' tawa sluufmamisi ar baraá Gibeoni, didá' geera heémár Mungú i diri' iri waátl Yerusalemu. Inós múk Israeli guri sawaawuti'ín.

¹⁴ Solomon gaardaá farás i uuruxun giri burumbuúr nee múk farsú tsa/a/ám. Nee gaardu dinkwaaro ngi kon a kumuú wák nee tsiire tsiyáhh, nee múk faras gu i tsa/aa/ám a kume mibaá nee tsár. Mukwí guri qaás baraá gixsaduudaá gaardu i dirii'iya', nee dirós tidár Yerusalemu.

¹⁵ Qoomár waawuti'iimár Solomonuwo, peésa nee sahaábu ki ló'wa ur baraá yaamaá Yerusalemuwo, a adór tlaa/e, nee xaa'aá sahhta ki ló'wa ur adór /aantsír baraá Shefela.

¹⁶ Solomon faras amór nguwa sláy a baraá yaamaá Misri nee awa Kilikia, asma halanuuseerós nguna amoodá' wa tlaxuún.

¹⁷ Inooín gaárír faraasi gár ngira Misrír wa tlaxwiyé', a shekeéli tsiire lahhoó' ar peésa, nee faraásír wák a shekeéli tsiiruú wák nee mibeeri kooán ar peésa. Gawaá adoorihe farsuudá' nee gaarduuwo kiri weeramiís dír waawituú Aramu nee oo múk Hiti.