2 Petro 1 - Biblía Axweesantá Hhohho' ar Mungú 2004

¹ Anuú Simon Petro, lawaalmoó Yesu Kristo nee ya/abusmoowós, aníng barwaárí ngina gooiím amór mukdá' haratlintaaór afhhamít gaa slay, adór atén wa ale, ar loohír gan'amuú Mungú nee Ba/amusmoorén Yesu Kristo.

² Tsuuqaá Mungú nee wayduuwós i ló'wa doogine' dirhunge, as kángw Mungú nee oo Aako Yesu kuwa xua'.

Ateetamór Mungú nee tsawdo

³ Mungú atén tina ateét ar xirfuuwós nee /uuruuwós. Inós atén nguri xuaán. Aluuwo inós mura' sleémeero nguri atén i haniís ar /uuruuwós kuduú munguiima, muruudá' sleémeero atén ta sla'aan as tawa hootaan ar slafíngw Mungú kuwa ilaiwawa/aan.

⁴ Gawaá adoorihe tam al'axweesanoó urén nee oo afhhamít ugwa slawaán ar xirfuuwós nee /uuruuwós. Kuungá' al'axweesanaywí bura haratlintié', hhitiru'uumár baraaká' yaamu daqaní ilagowto a aleesleerá', nee tlehhmuú munguiima u sleerá'.

⁵ Gawaá adoorihe kuungá' ilakaaharu tleehhaak, baraá haratlintaaorhunge hhooeema doogaak, nee baraá hhooeemaahunge xu'uti doogaak,

⁶ nee baraá xu'utirhunge harqoomaay doogaak, nee baraá haraqoomayhunge qiqtliingw doogaak, nee baraá qiqtlingwhunge ilaíwa/amér Mungú doogaak,

⁷ nee baraá ilaiwa/amerhunge sla'aarír hhae doogaak, nee baraá sla'aarír hhaeewo sla'aarír muu sleémeero doogaak.

⁸ Asma muruuwí sleémeero barnaxes i deer dirhunge, nee bira doogiigín, kuungá' daqaní a tawó iwiwita'aaká, nee slám slafingwhúng daqaní muruú hhó' ngu huuw, nee Aakoorén Yesu Kristo u ló'wa xu'uti hhe'esá'.

⁹ Ala heé muruuwí gu koomaaká, inós a heé ila' naa boo/aye', nee a taampa. Asma aa gunqaruút adór tlakweemaawós kudá' aáng kira hamaátl.

¹⁰ Gawaá adoorihe, hháe, ilakaaharu ló'wa tleehhaak as ateetamorhúng kawa gawdesa', nee tsawdorhúng. Ala kuungá' bar aga hoté' ar adoorí, kuungá' daqaní gár dirhunge dukutsmo tleehhiit i káhh.

¹¹ Daqaní kuungá' a datá' baraá waawuti'iimár alhhe'eesay wasl, ar Aakoorén nee Ba/amusmoorén Yesu Kristo tidá' taa amohhe'eés as kuungá'.

¹² Gawaá adoorihe, aníng gár ni slaa' a kuungá' nun inslawtimís daanduú muruuwihe umuúqo daqto, ala tam kuungá' muruuwí ugwa xui'i, nee tam aga gawduuri'i baraá looeemaadá' taa ilaoti'i.

¹³ Án ngi slaá' a gár hariim aníng kuungá' nuwa inslawtimis umuúqo daqto daanduú muruuwihe qoomaarí án niwa slaaf.

¹⁴ Asma aníng a xuú' adór qooma ira naká/ ar aníng niwa gwaá'. Asma Aakoorén Yesu Kristo aníng iga ádbáy.

¹⁵ Gawaá adoorihe aníng ilakaaharu un tlehhiít as kahhó' kuungá' muruuwí kuwa inslasleera' umuú daqto, tam qoomár aníng bara gwaá' sleeme.

Múk xirfuú Kristo gwaa ar

¹⁶ Asma atén tiitár tawo ar sagalooa aga eeharaharaaniiká qoomár atén kángw /uuruú Aakoorén Yesu Kristo nguwa dirhúng i alki/iitaán, nee kángw ki/imaawós. Ala atén awa kilá' inós una araán ilaarene, nee xirfuuwós oo munguiima.

¹⁷ Asma Mungú Baabá guna ilaiwa/amér i haniís nee xirif, qoomár afoodá' baraá xirfuú úr daahh nguwa i hardát, tidá' kah, «Kwí an Garmaaeé', sla'aarusmooeé', oo aníng iga qwal/atis.»

¹⁸ Aténaá kilá' afór gawaá dooraá daahh ana axaasaán, qoomaadae atén tawa dinkwa nee inós gawaá tloomadá' hhoohhooe.

¹⁹ Gawaá adoorihe atén axweesantadá' aaruuse aa alki/ít an ló'wa haratlintiaán. Kuungá' adór hho' aga tlehhé' barnaxes axweesantadá' aga alqaytsité'. Asma axweesantadá' a adór tsaa'astá baraá giwtír wa oh, ay dír iimi i /awaakuur, nee ay dír tsatsee/ír Haymú i geehhouur baraá munerhunge.

²⁰ Ala kuungá' /aymuuwí xuaak, aaru'uuma i káhh baraá Gooír hhoohhooe ar hee i ilaharmiisi ar adoodá' inós i slai.

²¹ Asma axweesantá aaru'uuma kinga baloó huwiiká as adoodá' hee i slai. Ala muu axweesantá Mungú gana axweés kiwa geeraharahaár nee Qeeruú hhoohhoó' oo Mungú baraá muner'ine.