2 korinto 9 - Biblía Axweesantá Hhohho' ar Mungú 2004

ohme as múk Mungú

¹ Geeraawo a gár hariimaaká barwá ngiwa gooiim amorhúngií alé as daanduú ohmeedá' ta haniisi tawa alee/isoó múk hhohhó' oo Mungú.

² Asma aníng a xuú' adór kuungá' muuná kur koondá' oo alee/isaywí kuwa hanisa'. Slám án kuungá' nuna xirfayeés dír geeraá múk yaamaá Makedoniár i alé gawaá kaangwihe, niwa oó', «Múk Akaya tina amohhe'eés alee/isaay haniisaro iimír kurkú /isá'.» Muunaáhúng kwisíng múk yaariír baraaine gwaa ilakaaharuú i qaás.

³ Ala án hamí hhaeeká' ngin ya/aáw as axweesanayrén kudá' atén kuungá' nuwa xirfayeemiisaán gawaá kaangwihe, miwa axweesanoó tawo tleehhiít, ala masók a kuungá' tina amohhe'esé' adoodá' kara kaahaán.

⁴ Asma múk Makedonia barnaxes nee aníng naa al hardahaán, adór kuungá' tara hhe'eesi'iiká kari ar, atén daqaní aga muruutaán as adoodá' kuungá' nuwa haraxuaán. Ala mureerí a tooín kiloseká, ala tam kuungá' sleeme.

⁵ Gawaá adoorihe aníng ana ár, a gár afhhamít hhaeeká' ngiwa firiim iwa giirina' hardahamu amorhunge, as alee/isaywí kuwa amohhe'esa', kudá' kuungá' naa qaroó al'axwesé' haniisaro. Asma alee/isayhúng barnaxes ngwa qaroó amohhe'esé' qoomár án binda hardáh, gár i laqaqaan a kuungá' kiloohúng ana slaé' kawa hanisa', nee a qahaángwár hanmisa'aaká.

⁶ Kuungá' adoorí inslawaak, «Heé dahaasíngw niiná qamiím, inós bu'úngw i slay sleeme ku niiná. Nee heé dahaasíngw yaariír qamiím, inós bu'úngw i slay sleeme ku úr.»

⁷ Umuúqo heewo gár kuwa hariím a inós kilós gan aldaakw baraá muunaáwós i alé áx gár i haniisi a milá. Daqaní gadá' ngi haniisi ar sla'aarirós ar kilá', ala ar /uurutisarooká. Asma heé hanmiís ar qwal/amaaye, inós ku slaa' nee Mungú.

⁸ Nee Mungú i aleesleemuú kón oo kuungá' nuwa tsuuqi ar yaareema ar umuúqo loohiro. Adoorí gan tleehh as kuungá' umuúqo deeloro nee baraá umuúqo loohiro masók mura' sleémeero u koondá', kudá' ta sla'a' baraá slafingwhunge. Nee slám a muruudá' kuungá' ta sla'a' kiloseeká, ala dirhunge in tlaahh, as kuungá' kawa aleesleera' umuúqo gadiyér hho' kawa alee/isa'.

⁹ Asma Gooi i kat, «Inós gaa tawó qasmiís, gari liitlakuusér i hanmiís. Hhooeemaawós i hootiyá' ay alhhe'eesay wasle.»

¹⁰ Mungú kudá' dahaasiingw gu hanmiís dír dahaasusmo, nee oo mikaáte ga hanmiís as /ayma, inós dahaasiingw ngu amorhúng i haniis, nee balangwdá' guri ureemiis. Slám inós bu'uungw guri dook as kahhó' kuungá' múk hatlá' alee/iisaro kuwa aleesleera' ar bu'ungwdá'.

¹¹ Mungú kuungá' nu daqaari'iitis, as kuungá' ar yaariir kawa aleesleera' haniisaro ar baraá umuúqo loohiro. Gawaá adoorihe múk yaariír Mungú guri sluufmiis as gadiyeérí taa tleehhaán.

¹² Asma gadiyeérí ta tlehhiitaan gár i huwahup a tí kiloseeká, gídaabá múk Mungú kudá' baraá slahha'amaayér i dirií' alee/isaay gwa sláy. Ala gár i huwahup a tí sleeme, a múk yaariír Mungú gu sluufmiis as alee/isaywí.

¹³ Alee/isaywí gár i laqaqan a haratlintaaorhúng. Nee inooín Mungú ngun sluufmisiyá' as haratlintaaorhúng. Asma haratlintaaoorí a kaahanaaká Ya/abtór Kristo an tawó katá', ala ana iialooeemisé' sleeme. Asma muruudá' ta koonda' una hanimisé' ar yaareema dir'ín i alé tam dír muu sleémeero.

¹⁴ Gawaá adoorihe inooín tsuuqaá Mungú awa waa/oo/amór koomá' kudá' naa amorhúngií haniís ki tsaahh, nee kuungá' tunduri aleefiriirín nee tunduri ló'wa slaá'.

¹⁵ Masók Mungú un sluufmiisaán as tsuuqaawós kuká' ló'wa ur tam alki/it ngu ya/aama'aaká.