2 korinto 8 - Biblía Axweesantá Hhohho' ar Mungú 2004

Ohmér sla'aari

¹ Hháe, atén a sla'aán kuungá' tsuuqaadá' Mungú aa haniís dír múk kríshaanáy oo baraá yaamaá Makedonia kiwa xua'.

² Inooín kaa ló'wa iiara'ár ar slahh'amuudá' yaariír oo taa slasláy. Ala tam adoorihe qwal/uuín ina ló'wa tlaáhh, tam ohmér yaariir kari ló'wa duxún, ala tam inooín a narkuutér kilae.

³ Adoodá' inooín ohmeedá' kara hanmiís a lamabu'uúm, asma kaa hanmiisiiká ar adoodá' aleesleemuuínií dirii'i, ala kana ló'wa hanmiís ar adoodá' aleesleemuuín ba/a. Slám kana hanmiís ar muunuú /awaák.

⁴ Inooín atén tina harhheehhe'eemisiyé' nee tiri firiné' as inooín sleeme qwal/uudá' kuwa slay oo alee/isaydá' kuwa haniisi dír múk hhohhó' oo Mungú.

⁵ Inooín adoodá' taa tleéhh a adór atén taa haraxuaniiká. Asma gár har geera a inooín tina kilooín haniisiyé' dír Mungú, nee slám tiri diréní haniisiyé' ar adoodá' Mungú aa slaá'.

⁶ Tito an heé gadiyeérí gaa iimu/un. Gawaá adoorihe atén inós kuri harakeesaán, as inós iwa kumiiti gadiyeérihe, nee tlehhemuuwí oo sla'aari nguwa boo/eesi dirhunge.

⁷ Kuungá' a ló'wa daqaare baraá umuúqo gaaro, baraá haratlintaaooro, nee baraá axweesanaywo, nee baraá xu'uti nee baraá ilakaaharu sleémeero, nee baraá sla'aarirhúng, tidá' atén tiwa sla'a'a. Gawaá adoorihe adór kuungá' tar daqaare baraá ohmeesíng ta hanisa'a laqaamaak sleeme.

⁸ Aníng adoorí a kaahaaká as nuwa hara'ayiyiim. Ala aníng kángw múk hatlá' un káh, adór inooín ilakaaharu kura tlehhiít baraá alee/isaywihe. Kaangwí aníng una káh as sla'aarirhúng ngiwa tsaahh adór tar ar ló'.

⁹ Asma kuungá' gurtleemuú Aakoorén Yesu Kristo u xuá' adór inós geeraawo ta daqaarmo, ala iri narkutmo tleehhiít as kuungá', as kuungá' tawa daqaari'ita' ar narkuuwós.

¹⁰ Gár án ni kah a tí, a tsiní dirhunge gadiyeérí kurkú /isá' taa iimu/uundé' kawa alhhe'esa' daxta. Kuungá' a múk aa giirin tleehhamooro, ala a baraá tleehhamo kiloseeká, ala sleeme ana giiriindé' kawa sla'a' tleehhamooro.

¹¹ Gawaá adoorihe kuungá' daxta gár tunduwa hariím, a gadiyeérí taa iimu/uundé' an alhhe'eesá'. Ohmeerí alhhe'eesaak haniisaro ar adoodá' muruudá' ta koonda'.

¹² Asma kuúng gaa barnaxes a slá' haniisaro, yaareema nee niinaweema a gaarooká. Mungú gár i slai a tidá' kuúng ta koon kawa hanis, ala a tidá' kuúng ta koondaaká.

¹³ Aníng adoorí a kaahaaká as inooín amohhooa ngiwa slaya', nee kuungá' slahh'amu kuwa sleera'. Ala masók mura' sleémeero i alqón.

¹⁴ Kuungá' qoomaarihe muruú yaariír u koondá'. Gawaá adoorihe a gár hariím kuungá' inooínaadá' baraá slahha'amaayérí diriiá' kiwa alee/isa'. Asma daqtakaaro wané kuungá' a slahha'amaayér koondá', daqaní inooín bir muruú koná', inooín nu alee/iisiyá'. Gawaá adoorihe sleémeero tari qoondá'.

¹⁵ Adoorí an adoodá' Gooi i kat, «Heé muruú yaariír gwa burumbuur, inós muruuwós aa tlahhiiká, nee kudá' muruú niiná gwa burumbuur, inós gár gu wa /aaruur i káhh.»

Tito nee mukós kudá' ti koomá'

¹⁶ Aníng Mungú un sluufmiís, kudá' Tito gwa muunuú i haniis oo kuungá' nuwa alee/iimisi adór atén wa ale.

¹⁷ Inós atén una firiimaán niwa amorhúng i hardihi, nee inós iri ya/án. Ala atén tam qoomár nguwa firiimaniikahe, inós inqo tawó daqeemuú slaa' kilós alé.

¹⁸ Hhiyaako sleeme ngun ya/aawaán dinkwa nee inós. Kwí an kudá' taa xirfayeés nee kríshaanáy sleémeero, as gadiyeédá' i tlehhiiti ar Ya/abtór hho' ngiwa alki/iiti.

¹⁹ Ala a har tí kiloseeká, ala inós kuna tsawaár nee kríshaanáy sleémeero as nee atén tawa al'aa'aá kawaan, qoomár bar alee/isaywí oo sla'aari bur huwaán, alee/isaywí atén ta sagadiyuusaan. Adoorí kana tleéhh as Aako iwa xirfuuti, nee as sla'aarirén niwa geehhoouur adór alee/iimis kur sla'aán.

²⁰ Adoorí atén gár kasa tleehhaán a axweesanoó muu un baqamiimaán as kahhó' matawa oó', alee/isaywí úr ku amohhe'eemisiiká ar loohír hariím.

²¹ Gár atén ta sla'aan diirihe a adoodá' hhoo' an tleehhaán, ala a dír ilaá Mungú kiloseeká, ala tam dír ilaá muko sleeme.

²² Hhiyoó hatlá' ngu malé ya/aawaán dinkwa nee inooín. Inós atén ngwa araán daqtá yaariire, kuri tsaahhaán adór inós tar heé ilakaahaár. Nee qoomaarihe ilakaaharuuwós aa ak ló'wa doogín, asma haraxu'utír ur ga kón dirhunge.

²³ Gawaá daanduú Titowo án gár ni oo' a tí, inós a alee/isusmooeé' oo gadiyér tleéhh dinkwa nee aníng as kuungá'. Hhaeerén kudaá hatlá', inooín a múk tinda ya/aáw nee kríshaanáy sleémeero, nee Kristo xirif gu sláy as inooín.

²⁴ Gawaá adoorihe múk kríshaanáy daxta ngi ari, adór kuungá' inooín kir ló'wa sla'á'. Nee ngiwa tsaahhiya' sleeme adoodá' atén naa ooaán adór tar ló', qoomár kuungá' nuwa xirfayeemisaán geeraaín wa ale.