2 korinto 7 - Biblía Axweesantá Hhohho' ar Mungú 2004

¹ Sla'aaruuser'eé', al'axweesantí sleémeero a toorén. Gawaá adoorihe, atén ti kilootén hhoohhooeesaán baraá umuúqo slasla/aruú gawaá slaqwa nee oo baraá qeeruuwo. Nee tawa hootaan ar slafíngw ló'wa hhohhó', Mungú kuwa ilaiwawa/aan.

Qwal/uú Paulo

² Kuungá' munerhúng amooréní haniisare'. Atén tam heé wák ugwa gár tlaákw i tleehhaniiká. Atén heé taa qwaareesaán i kaahh, laqaá heé atén taa al/ayaán i kaahh as atén slaasláw kawa slawaan.

³ Aníng adoorí a kaahaaká as kuungá' nuwa sakwasleemuut. Asma án adoodá' kuungá' tar baraá muneeréní dir'a' ngaa qaroó oó'. Atén nee kuungá' a dinkwa baraá slafiingo nee tam baraá gwa'araaro.

⁴ Aníng a xuurumitaaká daandeemoohunge. Aníng ti ló'wa xirfayeemiís as kuungá'. Gawaá adoorihe aníng taa ló'wa gurkwa/ás, nee qwal/amaayér ló'wa ur aga sláw baraá slahh'amaayeerén tí ta koomaana.

⁵ Tam qoomár atén niwa hardahaán yaamaá Makedoniár i aleeró, amohhooa aga slawaaniiká. Ala atén slahh'amu una slawaán umuúqo bihheero. Tsee/aawo gár dáw a gila, baraá muneerene gár dáw a dae.

⁶ Ala Mungú, kudá' múk aa haleeleeiit gu gurkwa/amís, inós atén tina gurkwa/ás as adoodá' Tito niwa hardáh.

⁷ Ala a as hardahamuuwós kiloseeká, ala tam gurkwa/amisuudá' inós aa dirhúng wa sláy. Asma inós kangwhúng nguna dirénií alki/iít adór kuungá' kar ló'wa sla'á' aníng iwa aanda', nee slám adór kuungá' tar gurhaamutá', nee adór kuungá' aníng ir aleekal/aandá'. Gawaá adoorihe, aníng niri ló'wa qwalaá/.

⁸ Ala tam barwaádá' kuungá' naa gurhaamír ar eeri, ala aníng a gurhaamuutaaká as adoodá' ngiwa gooiím. Án geeraawo alók a gurhaamuút qoomár ngiwa ár barwár'eé' kuungá' naa gurhaamír ar eér, tam har qoomár niinawe.

⁹ Ala aníng hamí a qwalalaá/. Ala a as gurhaamirhungeeká. Ala gár nis qwalalaa/ a adoodá' gurhaamirhúng tidá' hhu'u'uungw nguwa húp baraá munerhunge. Asma gurhaamirhúng a adoodá' Mungú aa slaá'. Gawaá adoorihe slahha'amaayér kuungá' taa sleeré' i káhh as adoodá' atén taa tleehhaán.

¹⁰ Asma gurhaamír adoodá' Mungú aa slaá', gár i huwahup a hhu'u'ungwdá' ba/amár huwahuúw. Heé gurhaamír adór tí gaa slay, inós i ooiiká gurhaamirí geera alók ana slawiiká. Ala gurhaamír adoodá' yaamu i slaiya', gár i hup a gwa'ara.

¹¹ Ga/aawaagáy, gurhaamirí Mungú aa slaá' adór Mungú ngira ar gadiyuús dirhunge. Asma gurhaamirí gár naa húp dirhunge a ilakaaharuú úr, nee tiwa ló'wa aleekal/aanda', nee slám muruú tlákw kuwa i buhhabuhha' nee kuwa da'ayuumita'. Nee slám kuungá' ana ló'wa slaé' aníng niwa hardah. Kuungá' ilakaaharu una ló'wa tlehhé', tam tlakweema ina sakwasleemuté'. Gawaá adoorihe baraá umuúqo gaaro kuungá' tin laqaandá' adór gár hhoo' kara tlehhé' baraá kaangwihe.

¹² Gawaá adoorihe, aníng tam barwaádá' ngaa gooiimi, aga gooiimiiká as heedá' aa dakuus, laqaá aga gooiimiiká as heedá' taa sadakuús. Ala aníng ana gooiím as ngiwa laqaam dír geeraá Munguhe adór kuungá' atén tir ló'wa sla'á'.

¹³ Gaarí an gár atén tisa gurkwa/amís. Ala a tí kiloseeká. Atén ana ló'wa qwalaa/aán, asma adoodá' Tito iwa qwalaá/. Asma kuungá' sleémeero Tito ngwa ló'wa gurkwa/asé' baraá muunaáwose.

¹⁴ Ala bar án kuungá' naa xirfayeés dír geeraawós wa ale, aníng taa mureekeesiiká. Asma axweesanayrén kudá' kuungá' nura xirfayeemisaán dír geeraá Titó wa ale, aa geehhooúy adór tar axweesanoó ló', adoodá' axweesanaydá' sleémeero atén naa dirhúngií kaahaán adór tar ló' sleeme.

¹⁵ Kuungá' inós una ilaiwa/amér i tlehhé', nee una ilaoté' ar dae nee daaraxaay. Inós qoomár adoorí birngaa insláy, sla'aarirós dirhunge i ló'wa tlahhaatláhh.

¹⁶ Aníng a qwalalaá/ asma aníng a insareehhír koomaaká daandeemoohunge baraá umuúqo gaaro.