2 korinto 6 - Biblía Axweesantá Hhohho' ar Mungú 2004

¹ Atén a gadiyuusaán dinkwa nee Mungú. Gawaá adoorihe atén kuungá' nu gurbu'uumaán sleeme, kuungá' tsuuqaá Mungú kudá' taa ilaoté' mi qwaareesara'.

² Asma Mungú i kaahi, «Qoomaadár gurtleemuuwo aníng kuúng una iiárií qaás. Nee bál ba/amaro aníng kuúng una alee/iís.» Ga/aaweek, qoomár gurtleemu an hamí, nee slám baalár ba/ama an laarí.

³ Baraá umuúqo gaaro atén hee u dukuutsmoó i qaasanaaká, as gadiyeérén makawa niqimís.

⁴ Ala baraá umuúqo gaaro atén tin laqaqamaán adór tar sagadiyuusér Mungú. Atén an qiqtliimaán ar qitluú yaariír baraá haleeleeamituuwo nee baraá slahh'amaayero nee tam baraá daero.

⁵ Atén taa muúx sleeme nee tiri tsegiít, nee tiri i haratlatláy nee muu. Atén gadiyeé ana ló'wa tlehhiitaán, nee slám ana dalaa'aán, nee ana qwárkwár hootaán. Baraá muruuwí sleémeerowo atén ana qiqtliimaán.

⁶ Atén tin laqaqaamaán tawa sagadiyuusér Mungú ar adoodá' tara hootaán ar slafíngw hhohhó', nee ar xu'uti, nee ar qitla, nee hhooeema, nee ar Qeeruú hhoohhoó' oo Mungú kuwa koomaan, nee sla'aaridár ló'.

⁷ Nee slám tin laqaqaamaán tawa sagadiyuusér Mungú ar looeema kiwa alki/iitaan, nee ar /uuruú Mungú. Hotángw ganaá' a xooslaarén ar slaqwara ar tir baqamiimaan dákw doó /iyáy nee oo basayhe.

⁸ Nee slám atén ti adoodár laqaqaamaán barnaxes muu ti xirfayeemiis, laqaá barnaxes ti mureekeemiis, nee barnaxes ti muruú tlákwií káh, laqaá barnaxes a muruú hhó'. Atén tiwa xui nee muu, a lamuuse, ala laatí atén a múk looeemaá káh.

⁹ Atén tiwa xui a múk xuaawaslén, ala laatí atén a múk ta xu'uti hhe'eesi nee muu sleémeero. Atén a adór múk aa qaatl, ala laatí atén a slafaán. Atén ti muxaaxín, ala ti tsu/iiká.

¹⁰ Atén ti gurhaamír i qamín, ala laatí atén a múk qwalalaá/ umuú deélooro. Atén a narkuute, ala laatí atén múk yaariír ugwa daqaari'iitisaán. Atén a múk gaa wásl, ala laatí atén mura' sleémeero u koomaán.

¹¹ Kuungá' múk Korinto, atén kuungá' nun i axweesaán ar axweesanoó /awák. Atén muneerén ka /awak dirhunge.

¹² Atén muneerén aga gweeraán dirhunge, ala kuungá' munerhúng aga tsegé' direne.

¹³ Án daxta a axweés nee kuungá' adór baabá nee na/iiwós, kuungá' munerhúng gweeraak direne sleeme, adoodár atén toorén ngira dirhúngií gweeraán.

Atén a Doó Munguú

¹⁴ Kuungá' mutunduwa altsegiít baraá taaqwantá wák dinkwa nee mukdá' aa haratlintii'iiká, as tawa gadiyusa' dinkwa nee inooín. Asma adoorí i ya/aandaaká. Asma gan'amu nee dee/aanu adór tir slaya' a adoomá? Slám gwa/aateema nee giwti adór tir slaya' a adoomá?

¹⁵ Nee slám Kristo nee Neetlaangw adór tir axweesani slaya' a adoomá? Laqaá heé Krishaanmo nee heé Krishaanmowooká, gár tiwa slaya' a milá?

¹⁶ Slám Doó Munguú nee munguaá hatlá', adór tir slaslaya' a adoomá? Asma atén an Doó Munguú kudá' slaáf. Asma Munguú ina oó', «Aníng a baraaín wa hoót, nee nay baraá tla/angw'ín wa hi'iimiít. Aníng tari Munguúín, nee inooín tari muk'eé'.»

¹⁷ Gawaá adoorihe Aako i kaahi, «Ti'iité' baraá tla/angw'ine, nee ti partle' dir'ine. Muruú slasla/arén muu kwatmiitara'. Daqaní án kuungá' nu ya/aám,

¹⁸ nee aníng tari Baabuúhúng, nee kuungá' tari daaqay'eé' nee dasuueé'. Adoorí an adoodá' Aakoó Aleesleemusmoó mura' sleémeero aa oó'.»