2 korinto 4 - Biblía Axweesantá Hhohho' ar Mungú 2004

Xooslár tleei

¹ Gadiyeérí atén ta tleehhaan Mungú ngina atén i haniís as gurtleemuuwós. Gawaá adoorihe atén a mune siaanaaká.

² Atén tlehhemi'iidá' sleémeero awa getlakw nee awa murér koomá' iga mawaán. Al/ayma a tlehhiitanaaká, nee slám axweesantá Mungú a warqeemisanaaká. Ala atén tin kiloorén xu'utisaán dír umuúqo heewo, ar looeema kiwa alki/iitaan ar geehhooeema dír geeraá Munguhe.

³ Ala Ya/abtoorí hho' atén ta alki/iitaan barnaxes kaa tuuntuúk, a kana tuuntuúk dír mukdá' qwaqwadiima.

⁴ Asma múk haratlintatiaaká, muner'ín kaa taampúy nee munguú yaamuuká'. Gawaá adoorihe inooín gwa/aateemaadá' ló'wa gwa/aatá' arto ngi aleeslay'aaká. Gwa/aateemaadá' amór i dahhiya' a amór Ya/abtór hho' ar xirfuú Kristo. Nee Kristo an slaqsoó Mungú.

⁵ Asma atén ti kilootén alki/iitanaaká, ala a Kristo Yesu un alki/iitaán adór inós tar Aako, nee adór atén tar sagadiyuuserhúng as Yesu.

⁶ Asma Munguúdá' aa oo', «gwa/aateema i gwa/aatiye' baraá giwtír wa ale,» inós gwa/aateemaawós gina gwa/atís baraá muneerén wa ale. Inós adoorí gana tleéhh, as atén xu'uti kawa slawaan, nee xirfuú Mungú kuwa tsaahhaan, kudá' gawaá gitsee/aá Kristó i dirií'.

⁷ Ala ateéká' daqaari'iimarí koomá', atén a adór xooslaadár tleei. Mungú adoorí gana tleéhh, as kaangwí iwa geehhouy adór /uuruuwí úr amór i dahhi tar amooreneeká, ala a amór Mungú.

⁸ Atén bihhe sleémeero ti slahh'eemiis, ala taa tsamemeeiiká, a xuruumitaán, ala tam adoorihe a mune siaanaaká.

⁹ Atén ti slahh'eemiis, ala taa hhaamisiiká, nee slám taa yaamií daraáhh, ala taa tsu/iiká.

¹⁰ Umuúqo daqto atén gwa'arár Kristo an baraá slaqoorén ar gagariimaán, as masók slafíngw Kristo sleeme iwa geehhoouy ar baraá slaqoorén.

¹¹ Baraá slafiingwrén sleémeerowo atén tin amór gwa'arár i hanmiis umuúqo daqto as Yesu, as masók slafiingós i geehhoouy ar baraá slaqoorén kuká' qatlá'.

¹² Gawaá adoorihe gwa'ara i gadiyús baraarén wa ale, ala slafiingw i gadiyuus baraahúng wa ale.

¹³ Ala atén haratlintaao a koomaán. Gooi i kat, «Aníng haratlintaao a koóm, gawaá adoorihe aníng a axweés.» Atén sleeme qeeruuduú kilá' oo haratlintaao u koomaán, gawaá adoorihe atén sleeme a axweesaán.

¹⁴ Asma atén a xuaán Mungú, kudá' Aako Yesu gwa waasle/atis baraá múk aa qaátl wa ale, Munguúwí atén sleeme ti waasle/atis dinkwa nee Yesu, nee tiri hardahaas dír geeraawós i alé dinkwa nee kuungá'.

¹⁵ Asma muruuwí sleémeero in tleehharuumiit as kuungá', as tsuuqaá Mungú iwa ak hardihiya' dír múk yaariír i alé. Nee gawaá adoorihe múk yaariír Mungú guri sluufmiis. Nee Mungú iri xirfuut.

A hootaán ar haratlintaao

¹⁶ Gawaá adoorihe atén a mune siaanaaká. Asma slaqoorén i hhitirumitiyá', ala tam adoorihe atén ti /abeemií ki/imis baraá muneerene umuúqo deelooro.

¹⁷ Slahh'amaayeerén ka niina nee slám ar har qoomár niina. Ala gár ni hup direne a xirfuú úr ló'wa ale oo baloó faakaaká.

¹⁸ Asma atén muruudá' gehhó' u ga/aawanaaká, ala muruú ta ga/aawaan a kudá' getlákw. Asma muruudá' gehhó' oo har qoomár niina kilós, ala kudá' getlákw oo alhhe'eesay wasle.