2 korinto 3 - Biblía Axweesantá Hhohho' ar Mungú 2004

Sagadiyuusér alqadoodá' /aben

¹ Kuungá' ka ga/eera', atén daxta tin malé kiloorén xu'utimisána? Laqaá atén gár tiwa hariím a barwár xu'utisa an koomána, laqaá ar amorhúng daahh?

² Kuungá' kilá' an barwaárén, tidá' taa baraá muneeréní gooín, ar ta xui nee ar ta soomuusi nee muu sleémeero.

³ Asma a gár geehhoo' adór kuungá' tar barwaárén ar amór Kristó daahh. Barwaárí kana gooín ar gadiyeérén. Kaa gooínká ar wiíno, ala kana gooín ar Qeeruú Mungú kudá' slaáf. Kaa gooinká gawaá parhheemaá tlaa/e, ala kana gooín gawaá /aare'eeraá fu'unaay, an baraá munér muu.

⁴ Atén adoorí an kaahaán, asma atén Mungú ugwa i tlintiaán ar baraá Kristo.

⁵ Asma atén kiloorén aleesleemuú taa koomaan i kaahh. Gawaá adoorihe atén a ooanaaká gaarí a gadiyér atén taa tleehhaan. Aleesleemuurén dír i dahhi a dír Mungú.

⁶ Asma inós an kudá' atén taa aleesleemuú i haniis tawa sagadiyuusér alqadór /aben tleehhitaan. Ala alqadoorí a tidár hara'ayár gooirooká, ala a tidár Qeeru. Asma hara'ayár gooi i tsu/út, ala Qeeru i slafimis.

⁷ Hara'ayaadár Mose kana gooín gawaá parhheemaá tlaa/e, nee qoomár hara'ayaadá' kingiwa huúw, xirfuú Mungú iri geehhooúy. Xirfuudá' tam a xirfuú gaanslár waaraahha, ala tam adoorihe múk Israeli gitsee/aá Mose i qaytsitaro kaa aleeslayká as adoodá' gitsee/aawós iwa qwiirii/iya'. Ala hara'ayaadár gooi, tidá' gadiyeérós gwa'arár huwahuuw barnaxes xirfuú úr oo adór kwí gun koón,

⁸ xáy, xirfuú gadiyér Qeeru ku ak úreéke ló'wa ale?

⁹ Gadiyeédá' sakwasleemár alki/iit daandeemoorene barnaxes xirfuú úr oo adór kwí gu koón, xáy, gadiyeédá' atén ti ádbabaw tiwa gan'amií harafaari, xirfuuwós ku ak úreéke?

¹⁰ Gadiyeédár aáng xirfuú koom, i hariindaaká de'emaaká' kawa babay i xirfuú koón, barnaxes kaa alqoomeés nee xirfuú de'emaká' oo ak úr ló'wa ale.

¹¹ Asma tidá' waaraahh i xirfuú koón. Ala tidá' kumiit ay alhhe'eesaay wasle, xirfuuwós ku ló'wa úr.

¹² Atén haraxu'utír adoorí kawa qo koomana, pihh'uuma a koomaán.

¹³ Atén a adoodár Mosewooká. Inós gitsee/aawós gina tuuntuúk ar warqamo, as múk Israeli xirfuudá' /aaruurúw, gawaá gitsee/aawós i dirii', mukuwa ár iwa ilaaín wa qwaari.

¹⁴ Ala fuqurangw'ín ina gawdúy. Nee tam ay hamí fuqurangw'ín kwaa tuuntuúk ar warqamoodá', qoomár gooír alqadoodá' qaren bar ka soomuus, as gídaabárós makawa tsaáhh. Asma warqamoodá' dír kuwa hingeés a baraá Kristo kilós.

¹⁵ Tam laarí sleeme qoomár inooín kitaaba'aá Mose birki soomuus, warqamoodá' fuqurangw'ín gun tuuntukún.

¹⁶ Ala qoomár bar hee aa warqáy amór Aako, warqamoodá' kun sangw hingees.

¹⁷ Gawaá adoorihe Aako inós an Qeeru, nee didá' Qeeruú Aako i dirii'i, an didá' muu kuwa gwediiti baraá lawaali'iimaro.

¹⁸ Ala ateéká' sleémeero awa gitsee/eerén warqamoó kooma'aaká, atén xirfuú Aako un araán ar adór baraá looa. Xirfuuwí oo amór Aakoó daáhh, atén tin warqees as tawa slaqsaywós tleehhitaan. Gawaá adoorihe atén xirif un iimirí wa slawaán, nee iri doogiigín direne. Adoorí Qeeruú Aako gan tleehh.