2 korinto 2 - Biblía Axweesantá Hhohho' ar Mungú 2004

¹ Ala gár án naa tsaát baraá muunaáeene geeraawo a tí, aníng a sla'aaká niwa amorhúng i hardah malé alé nuwa gurhaamír ar aw.

² Asma aníng geeraawo kuungá' barnaxes nuna gurhaamír ar áw, múk geera aníng i qwal/atís daqaní iqo deéro? Asma geera múk aníng i qwal/atís a kuungaásingá' hamí án naa gurhaamír ar áw.

³ Gaarí an gár aníng kuungá' nusa barwaádá' i gooiím. Asma aníng aga slaiiká niwa amorhúngií hardah, nee kuungá' aníng iri gurhaamír ar eerá'. Asma kuungá' gár tunduwa hariím geeraawo a aníng in qwal/atisá'. Asma aníng bar aga qwalaá/, kuungá' sleémeero a qwala/á' sleeme.

⁴ Aníng barwaádá' ngina gooiím ar muunuú iiloó' nee oo gurhaamír yaariir ga koóm, nee ar hhirhheeraá yaariir. Ala ngaa gooimiiká as kuungá' nuwa gurhaamír ar aw, ala as kuungá' kawa tsahha' adór aníng kuungá' nur ló'wa slaa'.

Heedaádá' aa dakuus gurtlawaak

⁵ Ala heé gurhaami ngaa huuw bir deer, aníng iga gurhaamír ar ayká, ala a kuungá' sleémeero nuna gurhaamír ar áy. Ala dooqa an oo', a kuungá' sleémeeroowooká, as aníng lama mawa oó'.

⁶ Ala heedá' gurhaami ngaa huuw, sakwasleemár aa sláy aa bu'út daxta, asma múk yaariír dirhunge inós gwa sakwasleemuút.

⁷ Gawaá adoorihe a tsiní kuungá' bura gurtleeré' daxta, nee kuwa gurkwa/amisa', as inós gurhaamirós tidá' yaariir munguwa ak qwaarés.

⁸ Gawaá adoorihe án kuungá' nu firiím, daxta heewí sla'aak.

⁹ Asma gaarí an gár aníng kuungá' nusa barwaádií gooiím sleeme, as aníng kuungá' nuwa iiar, nee ngiwa tsaahh, adór kuungá' tara iialooesé' baraá mura' sleémeerowo.

¹⁰ Asma heé kuungá' taa gurtleeré', heedá' aníng sleeme ugwa gurtláw. Asma aníng gár naa gurtláw, aga gurtláw, barnaxes gaa i deer ar nguwa gurtlaw. Slám gadá' naa gurtláw, aga gurtláw as kuungá' dír geeraá Kristó wa ale,

¹¹ as atén Neetlaangw mitiwa al/aáy. Asma gár inós i slai atén a xuaán.

Daawitamér Paulo baraá Troaro

¹² Qoomár aníng niwa Troárí hardáh as Ya/abtór hho' ar Kristo ngiwa alki/iit, gár naa ár a pa/ángw amohhoó' kunguna haniís oo aníng gadiyér Aako ngiwa tleehh didae.

¹³ Ala tam adoorihe aníng amohhooa aga ariiká baraá muunaáeene, asma hhiyaaeé' Tito, ugwa ariiká amoodae Gawaá adoorihe aníng deelo ngiri dir'ínií oó', niri tláw ay yaamaá Makedonia.

Arba/ati ar loohír Kristo

¹⁴ Ala Mungú i xirfuuti, asma inós atén tin geeraharahaar arba/ati kawa slaslawaan deelo sleémeero baraá Kristowo. Nee inós atén tin ar gadiyuus as kangós kuwa tsiyaayaaxi umuúqo diiro, adór mooyángw tsuú' wa ale.

¹⁵ Asma atén a adór mooyángw tsuú' oo Kristo dír geeraá Munguhe, dír mukdá' ta ba/amiimisi, nee dír mukdá' qwaqwadiima.

¹⁶ Asma dír mukwí qwaqwadiima atén a adór mooyángw baraá gwa'arár daáhh, oo gwa'arár huwahuúw. Ala dír mukdá' ta ba/amiimisi atén a adór mooyángw baraá slafíngw daáhh, oo slafíngw huwahuúw. Ala heé muruuwí gu aleesláw a heemá?

¹⁷ Asma atén axweesantá Mungú a halaanu'uumár ar tlehhiitanaaká as slaasláw kawa slawaan, adoodá' múk yaariír i tlehhaahhiiti. Ala atén axweesantá Mungú an alki/iitaán ar muunuú /awaák ar baraá Kristo, adór múk Mungú aa ya/aáw nee oo geeraawósí sihhiít.