2 korinto 12 - Biblía Axweesantá Hhohho' ar Mungú 2004

Iigu'utu nee geehhoeemis

¹ Aníng gár tiwa hariím tin kilooeé' xirfayeemiís, tam adoorí gár i bu' i kahha. Ala daxta aníng a kumiít axweesanto kángw iigu'utu nee geehhooeemisuuduú Aako naa aníng i laqán.

² Aníng heeko wák u xuú' oo baraá Kristo. Kureeraá mibaá nee tsiyáhh naa waarahhii'i heewí kuna ar tláy gawaá doori ay baraá dooraá tám. (Inós qoomaadae tim slaqwtá kón, aníng a xuaaká, laqaá tim slaqwtá konká, aníng a xuaaká, Mungú ga xuu'.)

³ Aníng heewí u xuú'. (Ala inós tim slaqwtá kón, laqaá tim slaqwtá konká, aníng a xuaaká, Mungú ga xuu'.)

⁴ Aníng a xuú' adór inós kura ar tláy ay didá' amohhoo'. Axweesanoó ooaro ta aleeslayká guri axamiís, axweesanaydá' tawa ya/anká hee nguwa axweesi.

⁵ Daanduú heewihe aníng ti xirfayeemiís, ala aníng ti kilooeé' xirfayeemisaaká, ala aqo har daqaatlakwer'eé' kilós.

⁶ Ala aníng tam ti kilooeé' xirfayeemisa, aníng a adór daktantooká, asma gár aníng ni oo' a ar ló'. Ala aníng ti máw kilooeé' xirfayeemisuuwo, as hee miwa oó' ti ak úr ta adoodá' ir ara'ari, nee i axamiisi dir'eene.

⁷ Geehhoeemisuudá' urén oo tinda aníng i haniís i ló'wa waa/oo/amór kón. Gawaá adoorihe laqaymo kunguna gawaá slaqwte'eénií dahaás, as aníng mawa daar/uút as daanduú geehhoeemisuudá'. Laqaymoowí naa sláw a malaykamoó Neetlaangw, oo tinda ya/aáw as aníng iwa slahhi, as aníng mawa daara/uút.

⁸ Gawaá daanduú gaarihe aníng Aako una firiím sagaáwa tám wa ale, as gaarí iwa qutl dir'eene.

⁹ Ala Aako iri báy, «Gurtleemuueé' i bu'uut diroge. Asma /uuruueé' ku ak úr, kuúng burtu daqaatlaákw.» Gawaá adoorihe aníng tin xirfayeemiís ar qwal/uú yaariír as daqaatlakwer'eé', as /uuruú Kristo iwa baraaeé' wa hooti.

¹⁰ Gawaá adoorihe aníng a qwalaá/ aníng barnaxes ti daqaatlaákw, laqaá tam ti muruú tlákw i tlehhiít, laqaá tam a daawimiít, laqaá tam ti gusiisín, nee laqaá tam ti slahh'eemiís as Kristo. Asma aníng barnaxes ti daqaatlaákw, daqaní aníng a /uuruú koóm.

Sla'aarír Paulo dír múk Korinto

¹¹ Aníng niwa adoorír axweés a adór daktani. Ala kuungá' aníng ina harakesé'. A hariímarhúng geeraawo aníng iwa xirfayeemisa'. Asma aníng tam a gaarookahe, ala gár aníng iga wa /aaruur i káhh ta ya/abuuserhúng tidá' urene.

¹² Qoomár aníng gadiyeé ngiwa tleéhh tla/angwhúng wa ale, tlehhemi'iidá' sleémeero ina tleéhh ar qiqtliingw, kudá' aníng i laqaqaamá' adór tar ya/abusmo. Layu ina tleéhh, nee tlehhema'aá waa/oo/amo, nee tlehhema'aá aleesleemuú laqaaqamá'.

¹³ Gár dirhunge aníng naa /itiím i káhh, baraá tidá' naa haniís dír múk kríshaanáy oo yaamaá hatlae. Ala aqo har tí kilós, kuungá' naa huwár ar awiiká. Án gurtlawaaré' as nuwa sadakuús adoorír alé.

¹⁴ Qaytsité', gaarí a sagaáwa tám aníng niwa amorhúngií daqeemuú slaa'. Nee án kuungá' nu huwár ar awaaká. Asma aníng gár ni leelehhiit a muruuhungeeká, ala a kuungá'. Asma a hariímarooká na/ii mura' nguwa burumburina' as xwaylité, ala a xwaylité mura' gun burumburiín as na/ii.

¹⁵ Aníng barte'eene a qwalaá/ muruueé' sleémeero nguwa haniis, nee slám ánuú kilá' tiwa haniis as munerhúng. Xáy, kuungá' sla'aarirhúng i /aaruúra dir'eene, as adoorí án kuungá' nuwa ak ló'wa slaa'?

¹⁶ Ala kuungá' a kata', «Ar ló', kuúng taa huwár ar eeriiká. Ala as kuúng tawa al/aymusmo, kuúng atén taa al/ák ar lamtók.»

¹⁷ Ahaá, garhúng ar aníng naa sláw iqo deéro dír dabaá mukdá' aníng naa amorhúngií ya/aawi?

¹⁸ Aníng Tito una firiím niwa amorhúng i daqay, nee hhiyaaduú hatlá' una ya/aáw nee inós tiwa kona'. Xáy, Tito gár dirhunge aa sláy i deéro? Qeeruú hhoohhoó' oo Mungú kudá' aníng i geeraharahaár, a kudá' inós sleeme gu geeraharahaáraáke? Nee slám hotaangós a adór kwe'eeneekáhe?

¹⁹ Án ngi slaá' qoomaarí sleémeero kuungá' a kata' atén gár tas adoorír axweesaan a tin kiloorén aleekal/aamaán dír geeraahunge, aasla'áy, a adoosingeeká. Tí ta axweesaan, an axweesaán ar baraá Kristo, dír geeraá Mungú wa ale. Ala sla'aaruuser'eé', tí sleémeero ana axweesaán as kuungá' tawa kwa/a'.

²⁰ Asma aníng gár ni da'ayumiit a tí, án binda amorhúngií hardáh, án kuungá' adoodá' nur slaa' dooqa nu adoodá' i awaaká. Nee slám a da'ayumiít as kuungá' aníng iwa aanda' ar adoodá' kuungá' ta sla'a'aaká. A da'ayumiít dooqa án kuungá' dír ni aw a baraá gila, nee gur'e nuwa ohiin, nee xaraasleema, nee fola, nee tloqmis, nee kaantiingw, nee daara/aangw nee tlaahhi.

²¹ Aníng a da'ayumiít asma binda malé hardáh amorhúng, Munguúeé' aníng i malé mureekees dirhunge, nee aníng niri gurhaamuút as múk yaariír oo aa hhu'u'unká tam ay hamí, kudá' tlakweema gaa tlehhiit iimír qoomaadá', tari kumiít baraá slasla/aruuine, nee baraá tsaatu'uumaro nee tam baraá fuqti'ín tidá' taa tlehhiiti.