2 korinto 11 - Biblía Axweesantá Hhohho' ar Mungú 2004

Paulo nee Ya/abuusér lama

¹ Aníng qoomár bar dakti'iimar'eé' káh, alók geera án kuungá' in sa qiqtliindá'. Ar ló', án kuungá' i tsuwa sa qiqtliindá'.

² Aníng gura' iga óh as kuungá'. Guruuwí aníng iga oh, amór i dahhi a amór Mungú. Asma kuungá' a adór /amaatliito'ór hhoohhoo' ar taa kwatiitiiká. Aníng al'axweesani aga haniís, /amaatliito'oorí ngiwa haniis dír hhawaatuú wák. Nee hhawaatuuwí an Kristo.

³ Ala aníng a daimiít as kuungá' tunduwa al/ayi baraá inslawayhunge, tam kuungá' sla'aarirhúng tidá' ur ar hhoohhoo' ar Kristo kuwa sla'a' kari geexeerá', adoodár dayshamooduú al/aymusmo aáng Hawa ngira al/aáy.

⁴ Asma kuungá' umuúqo heewo oo naa hardah amorhúng un sa qiqtliindá', kudá' kángw Yesú hatlá' gu alki/iít. Yésuudá' inooín ta alki/iiti a kudá' atén taa alki/itaniiká. Slám kuungá' qeeruú hatlá' u ya/a/aandá'. Inós a Qeeruudá' hhoohhooeeká oo kuungá' taa ilaoté'. Nee slám kuungá' Ya/abtór hho' ar hatlá' an ilaoohiindá'. Ya/abtoorí a tidá' atén naa dirhúngií alki/itaniiká.

⁵ Án ngi slaá' ya/abuuserhúng tidá' ló'wa uren gár aníng iwa ba/ i káhh.

⁶ Ala tam aníng axweesani alki/ituuwo a xuaakahe, ala kangwdá' aníng ni axwees u xuú'. Gaarí atén nga gwa/atisaán dirhunge umuúqo daqto nee ar umuúqo loohiro.

⁷ Qoomár aníng Ya/abtór hho' ar Mungú ngiwa alki/iít dirhunge, gár aníng naa ilaóh dirhúng wa ale i káhh, aníng tina niinaweés as kuungá' tawa múk urén tleehhita'. Xáy aníng adoorí ngiwa tleéhh ana dakuúsi?

⁸ Qoomár aníng gadiyeé ngiwa tleéhh tla/angwhúng wa ale, aníng tina qáy nee kríshaanoó dimbadimbé oo yaamaá hatlá', as kuungá' nuwa sagadiyuus.

⁹ Qoomár aníng niwa amorhúng i dirii', tam gaa ngiwa slaá', aníng heé naa daawitimís dirhunge i kaahh. Asma hhaeedá' Makedoniár dahhá', muruudá'sleémeero aníng naa slaá' nguna huwiyé'. Aníng ana ló'wa ilakaahareés as kuungá' munduwa diitsakwár ar áw. Nee slám aníng an adoodár kumaamiít.

¹⁰ Adoodá' looeemaá Kristo ir baraaeé' i dirii'iya', xirfuuwí ku baloó hingeesiiká dir'eene baraá yaamaá Akaya sleémeerowo.

¹¹ Asma milá gár adoorí án ngis kah? A an kuungá' nun sla'aakáhe? Aasla'áy. Mungú ga xuu' adór aníng kuungá' nur slaa'.

¹² Ala aníng a kumiít adoorí ngiwa tlehhiit, as masók mukduú hatlá' pa/aangw munguwa sláy, oo tiwa kilooín xirfayeemisiya' tawa ooi, «Atén gadiyér Mungú an tlehhiitaán adoodár inooín wa ale.»

¹³ Asma múk adoorí a ya/abuusér loeeká, ala a ya/abuusér lama. Inooín a múk gadiyér tleéhh ar al/ayma, nee slám inooín kilooín tin slaqsoó ya/abuusér Kristó tlehhiitiyá'.

¹⁴ Ala a gár waa/oo/amoorooká. Asma tam Neetlaangw inósuú kilá' tin warqeemiis tawa slaqsoó malaykamoó gwa/aateema.

¹⁵ Gawaá adoorihe a gár waa/oo/amoorooká sleeme sagadiyuuseerós tiwa warqeemis tawa adór sagadiyuusér gan'amu. Ala alhhe'eesaywo inooín sakwasleema kan sláy, ar adoodá' tlehhemi'ii'ín i dirii'iya'.

Slahh'ámaayér Paulo aa sláy tawa adór Ya/abusmo

¹⁶ Xaa aníng kuungá' nu malé firiím kuungá' ma kaahara' aníng a daktani. Ala adoosíng bar katá', aníng ya/aamaré' tawa daktani, as pa/aangw nguwa slaw tiwa kilooeé' xirfayees gár niinawe.

¹⁷ Asma gaarí án ni kah i amór Aakoó dahhká, ala xirfayeemisuueé' kwí aníng tiwa kilooeé' xirfayeemiis, un tlehhiít adór daktantá wa ale.

¹⁸ Asma múk yaariír i deer oo ti kilooín xirfayeemiís as muruú baraakaá yaamu, ala tam aníng sleeme tin adoodár xirfayeemiís.

¹⁹ Asma kuungá' a ló'wa sla'á' daktana kawa sa qiqtliinda', kuungaásingá' ló'wa sagalooár koomá'.

²⁰ Kuungá' a qiqtliindá' hee kuungá' burna lawaale tleéhh, laqaá hee bira daqaari'iít ar daqaari'iimarhúng, laqaá hee bur naa ohín, nee laqaá hee bur naa waaqaqaá', nee laqaá hee bur naa tlaaqarma' muúx.

²¹ Aníng adoorí an káh ar mure, asma atén qoomár tawa amorhúng i diriiaan, adoorí tlehharo aga qiitlaniiká. Aníng daxta an oo' adór daktantá wa ale, hee bir deer oo qiítl oo ti kilós xirfayeemiís gawaá umuúqo gaaro, aníng sleeme a qiítl tiwa xirfayees.

²² Inooín a múk Ebraniáro? Tam aníng sleeme. Inooín a múk Israelíwo? Tam aníng sleeme. Inooín a xwaylár Abrahamúwo? Tam aníng sleeme.

²³ Inooín a sagadiyuusér Kristówo? Aníng daxta an adór slarhhamá wa axweés, aníng a sagadiyusmoó Kristo oo ak hhoó' ta inooine. Aníng gadiyeé ana ak tleéhh ta inooine. Aníng tina tsegiít daqtá yaariire ta inooine. Nee slám aníng tina ak muúx ta inooine. Aníng afkú bohoongw ngun wa kikií/ daqtá yaariire ta inooine.

²⁴ Tina muúx sagaáwa kooán wa ale nee múk Yahudi, qaway mibeeri tám nee gwaleél umuúqo muxtaaro.

²⁵ Tina muúx sagaáwa tám wa ale nee múk Roma, ar hhara, nee tina tlaquút ar tlaa/e sagaáwa wake. Sagaáwa tám miringamo ina qeqtín baraá tlawto aníng ana hoót baraá ma'áy wa ale, xweera nee tlaatla/aango.

²⁶ Baraá aaiieé' awa yaariire tsaxwaá yaariir in wa /akumaamiít, tsaxwaá yau, nee tsaxwaá fisuuse, tsaxwa as múk xooror'eé', nee as múk xoordaá hatlá' sleeme, tsaxwaá baraá gixsadu nee tsaxwaá baraá darma, tsaxwaá baraá tlawi, tsaxwa as mukdá' káh inooín a hhae, ala laatí inooín a hhaeewooká.

²⁷ Aníng aga daawimaamiít as gadiyér yaariir. Daqtá yaariire ana dalaá', nee slám ana slahhahhaá' as qwari nee waxe. Daqtá yaariire muruú /ayma ugwa slawiiká, ana slahhahhaá' as tsaaqwa nee /aankwets.

²⁸ Tí sleémeero bar mawaana, huwár hatlá' ar ni koom i deer umuúqo daqto as daanduú kríshaanáy sleémeero.

²⁹ Asma heeko bur ku daqaatlaákw baraá haratlintaaoorose, aníng sleeme ti daqaatlaákw. Laqaá barnaxes kooko aa huú' baraá tlakweemaá i alé, aníng a ló'wa gurhaamuút.

³⁰ Aníng barnaxes gár tiwa hariím, a tin xirfayeés, aníng tin xirfayeés as daqaatlakwer'eé'.

³¹ Mungú, Baabuú Aako Yesu, kudá' xiríf ay alhhe'eesay wasle, inós ga xuu' adór aníng lama ngir kaahaaká.

³² Qoomár aníng niwa baraá gixsár Damasko, ga/aawusmoó waawutmo Areta inós gixsár Damasko gana xún as án tiwa oohi.

³³ Ala aníng tiri aweeriís ar lakwaanti ar pa/ángw baraá koo/ír gixsa, gawaá adoorihe niri ba/ám baraá dabaawose.