2 korinto 10 - Biblía Axweesantá Hhohho' ar Mungú 2004

Paulo ti aleekal/án

¹ Anuú Paulo kuungá' nun harhheehhe'eemiís, ar tsatsaa'areema nee ar hhooeema ar adoodár Kristo. Kuungá' a kata', aníng a heé da'ayusmo qoomár bar dír geeraahúngií dirií', ala aníng a heé xaraásl qoomár án bir ti saáw dirhunge.

² Aníng kuungá' nu firiím, aníng mi harakeesara' xarasleemaeé' ngiwa laqaam qoomár binda amorhúngií hardáh. Asma aníng a xuú' xarasleema i aleesláw dír mukdá' heeuumar'ín eeharahara.

³ Ar ló', atén a múk baraakaá yaamu, ala atén a slaqwanaaká adór slaqwarár múk baraaká' yaamu.

⁴ Xooslaadár slaqwara ar atén tar slaqwaan a tidár múk baraakaá yaamuuwooká, ala a xooslaadár slaqwara ar Mungú, tidár /uuruú koom. Xooslaarí an tidá' koo/ír gawit kar fee/aan. Gár atén ta fee/itaan a axweesanayduú lama, kudá' Munguú tlaampa'aamiís.

⁵ Nee slám gár atén ta fee/itaan a umuúqo inslawaywo, kudá' il/aám, oo daara/ángw koóm, oo taa tleéhh as hee kángw Mungú munguwa xuú'. Atén umuúqo inslawaywo un ohiimaán, nee kuwa iialooesaan dír Kristo i alé.

⁶ Nee kuungá' bar aga hhe'esé' iialooémisuuwo, atén daqaní a ya/aamaán umuúqo iawasle kiwa sakwasleemuutaan.

⁷ Kuungá' muruudá' dír geeraahúng i dirií' na ga/aawaak. Xáy, hee i deéro oo ti haraxuú' adór inós tar heé Kristo? Bir deer, adoosíng i qoón. Ala inós gár kuwa hariím a kaangwí nguwa aldakwi adór atén sleeme tar múk Kristo adór inós wa ale.

⁸ Asma aníng adoorí a samurumitaaká, aníng dooqa aga harwaaraáhh tiwa kilooeé' xirfayeemiis, as aleesleemuudá' tinda haniís nee Aako. Ala aleesleemuuwí una sláw as kuungá' nuwa kwa/amis, a as nuwa fee/aaká.

⁹ Kuungá' ma ooara' aníng gár ni slaa' a kuungá' nuwa dae tlaaq ar barwaduueé'.

¹⁰ Asma kuungá' daqtakaaro a kata', «Paulo baraá barwaduuwose a heé xaraásl nee oo /uuruú koóm. Ala inós bar i dinkwa nee atén, inós a heé da'ayusmo, nee slám axweesantós gár i koon i káhh.»

¹¹ Heé adoorír axweés ngi xui kangwdá' ni gooiim baraá barwaduueene, aníng qoomár birti saáw dirhunge, an kangwdá' ni tleehh barnaxes naa amorhúngií hardáh.

¹² Atén a qiitlanaaká tiwa alqoomeesaan nee mukwí ti kilooín xirfayeemiís, laqaá tiwa amor'ín i harafaaraan. Inooín a daktana, asma ti kilooín alqoomeemesiyá' ar har qoomay'ín kilooín, nee ti kilooín slaqamisiyá' ar slaqsay'ín oo kilá'.

¹³ Ala atén birti kiloorén xirfayeemisaán, xirfuurén i harki/isoó kón. Harki/isaydá' Mungú guna qaás as gadiyeérén, nee kuungá' a baraá harki/isaydá' i dir'á'.

¹⁴ Asma atén nina geerií dirhúngií hardahaán, as Ya/abtór hho' ar Kristo ngiwa alki/ituú awaán. Gawaá adoorihe qoomár atén barnaxes ti xirfayeemisaán as kuungá', harki/isayrén ugwa harwaarahhaniiká.

¹⁵ A hariímareneká atén tiwa xirfayeemisaan daanduú gadiyér múk hatlá' aa tlehhiít didár tsee/aá harki/isayrene aa waarahh. Ala gár atén ta haraxuaan a haratlintaaorhúng bira gawduúr, atén daqaní pa/aangw u slawaán oo gadiyér ak ur kawa tleehhaan dirhúng wa ale, baraá harki/isaydá' Mungú naa atén i qaasi.

¹⁶ Daqaní atén Ya/abtór hho' alki/ituuwo a aleeslawaán baraá yaamaá ak saawe ta koohunge. Ala a dahaanaaká baraá yaamaá heé hatlá' gadiyeé ngiwa iimu/ún, as atén mitiwa xirfayeemisaán as gadiyér heé hatlá' aa tleéhh.

¹⁷ Gooi i kat, «Heé ti xirfayeemiís, ti xirfayeemisi as Aako.»

¹⁸ Asma heé ti kilós xirfayeemiís, inós ku ya/anká nee Aako, ala heé ta ya/an a kudá' Aako aa xirfayeés.